Otel nə qədər ucuz olsa, turist də ölkədə o qədər çox qalar
Turizmin inkişafı üçün tək maddi cəhətdən imkanlı olan deyil, müxtəlif
təbəqədən olan turistlərin cəlb edilməsi istiqamətində işlər görülməlidir. Bu
cəhətdən ölkəmizdə görülməli işlərdən biri də 2-3 ulduzlu otellərin inşasıdır.
Mədəniyyət və Turizm Nazirliyindən Trend-ə verilən məlumata görə, mədəniyyət və turizm naziri
Əbülfəs Qarayev turizm şirkətlərinin nümayəndələri ilə keçirilən toplantıda
deyib ki, yaxın gələcəkdə 2, 3 ulduzlu otellər şəbəkəsinin yaradılması nəzərdə
tutulur: "Son bir neçə ildə ölkəmizdə böyük turizm infrastrukturu qurulub,
brend otellər istifadəyə verilib. Bunun nəticəsində dünya turizm bazarında
Azərbaycan lüks turizm xidmətləri təklif edən ölkə kimi tanınıb. İndi bu sahədə
görülən işlər davam etdirilməkdədir. Yaxın gələcəkdə 2, 3 ulduzlu otellər
şəbəkəsinin yaradılması nəzərdə tutulur. Bununla da ölkəmizə müxtəlif
təbəqələrdən olan xarici turistlərin axını təmin edilmiş olacaq”.
Turizm üzrə
araşdırmaçı Əhməd Əlili qəzetimizə
açıqlamasında bildirdi ki, avropalı turistləri cəlb etmək istəyiriksə, 2-3
ulduzlu otellərin sayını artırmalıyıq: "Sovet insanı, bir çox azərbaycanlı
yanaşmasından baxanda turizm deyiləndə daha çox dəbdəbəli səyahət, maksimum
lüks otellər nəzərdə tutulur. Pulun ala biləcəyi ən bahalısı, ən yaxşısı...
Bizdən xarici ölkələrə gedən imkanlı adamlar xaricdə daha bahalı bir oteldə
qalmağa çalışır. Amma Avropa insanı bir qədər ayrı cür düşünür. Onlar daha az
büdcə ilə yatağı, duşu, səhər yeməyi olan bir oteldə qalmağa, büdcəsinə qənaət
etməyə, həmçinin dünyanı gəzib müxtəlif yerlərin insanları ilə ünsiyyətdə
olmağa üstünlük verirlər. Avropalı turistlər nəzərə alındığı üçün həm Yaponiya,
həm də Asiya, xüsusilə cənub şərqi Asiya ölkələrində 2-3 olduzlu otellərin sayı
kifayət qədər çoxdur. Avropa ölkərində isə belə otellər hədsiz çoxdur. Çünki
avropalılar Avropa daxilində də tez-tez səyahət edirlər. Minimal şəraitləri,
münasib qiyməti olan otellərə üstünlük verirlər. Bir gecə hardasa qalmaq üçün
vacib deyil ki, lüks oteldə nömrə tutasan.
Ona görə də xüsusilə avropalı turistləri cəlb etmək
istəyiriksə, 2-3 ulduzlu otellərin sayını artırmalıyıq. Avropalı turistlər elə
çox pul xərcləməyi sevən adamlar olmasa da, onlar normalda səyahət edirlər,
etibarlı turistlərdilər. Dünyanı gəzməyə marağı olan və bunun üçün maddi imkanı
çatan turistlərdir. Azərbaycanda nəinki 2-3 ulduzlu, hətta ulduzsuz otellərin
tikilməsi vacibdir”.
Ə.Əlili deyir ki, bu cür otellərin həm Bakıda, həm
də regionlarda inşa edilməsi vacibdir. Bu həm də daxili turizmin inkişafına təkan
verəcək: "Ölkəmizin hər bir yerində bu cür otellərin tikilməsinə ehtiyac var. Bakıda
otellər kifayət qədər bahalıdır. Əvvəllər Azərbaycana səyahət edən turist 70-80
manatdan ucuz otel tapa bilmirdi. Bu indi də təxminən belədir. Vaxtilə bu, 100
dollara bərabər bir qiymət idi. İndi manatın məzənnəsindəki dəyişikliklə əlaqədar
bir qədər azdır. Amma yenə də çox bahalıdır. Avropalı turist hansısa ölkəyə səyahət
edirsə, münasib qiymətə otel tapa bilmirsə, deməli o yerə bir də səyahət etməkdə
maraqlı olmayacaq. Bu problem bizdə Bakıda və regionlarda var. Bütün ölkə
boyunca, xüsusilə turist axınından bir qədər əziyyət çəkən bölgələrimizdə bu
cür otellərə ehtiyac var. Məsələn, cənub zonasında infrastruktur o qədər hazır
vəziyyətdə deyil ki, ora ciddi turist axını olsun. Oraya istər-istəməz Azərbaycanın
daxilindən az büdcəli insanlar gedirlər. Belə yerlərdə 2-3 ulduzlu otelləri
tikməklə turist cəlb etmək olar.
Daxili turizmi inkişaf etdirmək, az büdcəli ailələrin
də daxili turizmdə iştirakını təşkil etmək üçün ölkə üzrə hər yerdə 2-3 olduzlu
otellərin tikilməsi vacibdir. Həm daxili, həm də avropalı turistləri cəlb etmək
üçün bu cür otellərə ehtiyac var”.
Ə.Əlilinin sözlərinə görə 2-3 olduzlu otellərdə
qiymət elə olmalıdır ki, turistlərə sərfəli olsun: "Hazırkı otel qiymətlərini
Avropa ilə müqayisə edək. Avropada otel biznesi ciddi rəqabət qarşısındadır. Bu,
otellərin bir-birindən üstün olması rəqabəti deyil, təbii ki. Adi insanlar müəyyən
müddət ölkədən, yaxud şəhərdən kənara çıxırlarsa, qaldıqları evi icarəyə verirlər.
Adi insanlar belə, xüsusilə az ulduzlu otellərlə bir rəqabət təşkil edirlər.
Gürcüstanda öz evlərini turistlərə təklif edən kifayət qədər ev sahibləri var.
Otaqlarının birini qonaqlama üçün hazırlayırlar. Turistlər minimal məbləğ - 20-30
manat ödəməklə orda qala bilirlər. Bunu nəzərə alsaq, Azərbaycanda 2-3 ulduzlu
otellərin qiyməti 30-40 manat arasında olmalıdır. Bundan baha olması heç cür əl
verməz”.
"Luna
Travel” turizm agentliyinin direktoru, hüquqşünasRəhman Quliyev deyir ki, 2-3 ulduzlu otellərin tikintisi üçün bu işi görəcək
adamlara şərait yaradılmalıdır. Kreditlər ayrılmalı, dotasiyalar verilməlidir.
Bu işin görülməsi üçün güzəştlər olmalıdır. R.Quliyev bildirdi ki, əgər biz
ekonom büdcəli turistə otel tikiriksə, ekonom büdcəli turisti cəlb etməyi bacarmalıyıq:
"Ekonom büdcəli turist 20-30 dollarlıq otelə gələcəksə, bileti də ucuz
almalıdır. Dubay-Bakı-Dubay, Tehran-Bakı-Tehran üçün ucuz biletləri nəzərdə
saxlamalıyıq. Gərək xaricdən ölkəmizə gəlib geri qayıdan turistlərlə bağlı
aviakampaniyalar, endirimlər təşkil edək. Brincini biletdən başlaya bilərik.
Turistlər üçün qaynar xətt olmalıdır ki, onlar bu xidmətdən yararlana bilsinlər.
Turistlər təhlükəsizliyinin təmin olunduğuna əmin olmalıdır”.
R.Quliyevin sözlərinə görə, otel nə qədər ucuz
olsa, turist bir o qədər ölkədə çox qalır: "Otelin ucuz olması imkan yaradır
ki, turist ölkəmizdə daha çox qalsın və daha çox pul xərcləsin. Əgər o, 5 gündə
500 avro xərcləyirsə, 10 gün qalıb 1000 avro xərcləyəcək. Çünki otelə çəkdiyi xərci
başqa cür xərcləyəcək. Ölkədə daha çox qaldıqca, istər-istəməz o daha çox pul xərcləyəcək.
Tax-free sistemi olsa, ölkədə daha çox qalan turist çox pul xərcləməyə də maraqlı
olacaq. Valyuta dəyişmə problemi də həll olunmalıdır. Yəni az büdcəli turisti cəlb
etmək üçün otellə yanaşı, müxtəlif addımların atılmasına da ehtiyac var”.
Aygün Asimqızı