OPEC-in toplantısı neftin qiymətinə necə təsir edəcək?
Bu
günlərdə Əlcəzairdə keçirilən OPEC+ Nazirlərinin Birgə Monitorinq Komitəsinin X
iclasında cari ilin avqust ayı üzrə neft hasilatı ilə bağlı Birgə Texniki
Komissiyanın təqdimatı və OPEC-in qlobal neft bazarının inkişaf
tendensiyalarına dair hesabatı dinlənilib. 2018-ci il iyunun 23-də OPEC və
qeyri-OPEC ölkələri nazirlərinin IV iclasında neft hasilatının sutkada 1 milyon
barrel artırılması ilə bağlı qərarının icra vəziyyəti və bazara təsiri nəzərdən
keçirilib. İclasda iştirak edən Azərbaycanın energetika naziri Pərviz
Şahbazovun verdiyi məlumata görə, OPEC+ ölkələri tərəfindən öhdəliklər iyulda
109 faiz, avqustda isə 129 faiz yerinə yetirilib. Bu göstəricilər may ayı ilə
müqayisədə bazarın balanslaşması istiqamətində mühüm irəliləyişlər hesab
edilib: "OPEC+ razılaşmasına hələlik 100 faiz əməl edilməsə də, prosesin
gedişi, ümumən qənaətbəxşdir. OPEC və qeyri-OPEC ölkələrinin ümumi rəyi ondan
ibarətdir ki, hasilatın artırılmasına hazırkı yanaşma, nailiyyətləri ilin
sonuna kimi qoruyub saxlamağa imkan verir və hasilat həcmlərinin
bölüşdürülməsinə zərurət yoxdur”.
İclasda
OPEC+ ölkələrinin iyun qərarının tam şəkildə yerinə yetirilməsi üçün
koordinasiyalı fəaliyyətin və davamlı tənzimlənmənin vacibliyi qeyd olunub.
2019-cu ildən bazarın vəziyyətinin yenidən təhlili və adekvat qərarların qəbulu
məqsədəuyğun sayılıb.
Neft araşdırmaları mərkəzinin rəhbəri, enerji məsələləri üzrə ekspert
İlham Şaban bildirdi ki, Əlcəzair görüşü ilə bağlı əsas
gözlənti kvotaların müəyyənləşdirilməsi idi: "Görüşdə OPEC ölkələri arasında
hasilatın nə qədər artıb-azalacağı
müəyyən edilməli idi. Əslində iyun ayında OPEC ölkələri kvotaların yenidən
bölüşdürülməsinə ehtiyac olduğunu bildirmişdilər. Amma Əlcəzair görüşündə bu
məsələyə toxunulmadı. Bunun əvəzində isə avqust ayının monitorinqinin
nəticələri toplantının gündəliyinə çıxarıldı. Ümumilikdə götürsək, qarşıda
nələrin olacağı bazar iştirakçılarına da bəlli deyil. OPEC-in lokomotivi hesab
olunan Səudiyyə Ərəbistanı, qeyri-OPEC ölkələrinə rəhbərlik etməyə çalışan
Rusiya bir qədər dayanmağı qərara alıb.
Onlar tələsik addım atmamağa cəhd edirlər. Növbəti mərhələdə bəzi
məsələlər yenidən müzakirəyə çıxarılacaq. Bununla yanaşı toplantıda bir neçə
ziddiyyətli rəqəmlər səsləndirildi. Məsələn, İranın nümayəndəsi OPEC+
formatında keçirilən görüşün nəticələrindən razı qaldığını dilə gətirdi və qeyd
etdi ki. İran avqust ayının nəticələrinə görə, hasilatı azaltmayıb. Amma OPEC-in
özünün açıqladığı rəqəmlərə əsasən, İran neft hasilatının 3,58 milyon barreləcən
azaldıb. Digər tərəfdən, beynəlxalq enerji agentliklərinin statistikasına görə,
İranın neft ixracı 2 milyon barreldən aşağı düşür. Avqust ayının nəticələrinə
görə, Cənubi Koreya, Fransa İrandan neft almağı tamamilə dayandırdıqlarını
bəyan ediblər. Çin, Yaponiya, Hindistan da İrandan neft idxalını azaltdıqlarını
rəsmi olaraq elan ediblər. Bu bəyanatlara əsasən deyə bilərik ki, İranın neft
ixracında azalma baş verməli idi. Bu mənada, İran rəsmisinin qeyd etdiyi
statistika qeyri-səmimi idi. Hesab edirəm ki, OPEC bu məsələyə münasibət
bildirməli idi. Eyni zamanda Rusiyanın enerji naziri Aleksandr Novak mətbuata
açıqlamasında bildirib ki, İranın neft hasilatı və ixracatında heç bir
dəyişiklik yoxdur. Bu açıqlama onu göstərir ki, əslində Rusiya və İran real
faktları ortaya qoymur və ABŞ-ın
sanksiyalarına özlərinin münasibətlərini nümayiş etdirirlər”.
Ekspert
bildirdi ki, zamanla qiymətlər stabilləşəcək: "Novak qeyd etdi ki, noyabr
ayında ABŞ sanksiyaları tam qüvvəyə minəndən sonra reallığın necə olacağını
bilmək olmaz. Belə ki, artıq dünya birjalarında neftin qiyməti 80 dollar
baryerini aşdı. Əslində hasilatın ölkələr üzrə artırılması gözlənilirdi. Amma
bu, baş vermədi. Nəticədə defisit riski daha da artdı və bazarlar məsələyə
dərhal reaksiya verdi. Digər tərəfdən, Venesuela özünün iqtisadi vəziyyətinə
görə az qala İran qədər hasilat itirib. Çünki onun milli neft şirkəti əvvəlki
həcmdə neft hasil edə bilmir. Bunun nəticəsində isə hasilat azalır. Bu isə
bazarlarda psixoloji gərginliyə gətirib çıxarır. Nəticədə isə neftin qiymətində
artımlar müşahidə olunur. Belə olan halda, neftin qiyməti hətta 100 dollara
yaxınlaşa bilər. Amma bu, uzun müddət davam etməz. Düşünürəm ki, ilin sonunadək
qiymət dəyişmələri sınıq xətt şəklində davam edəcək. Verilən bəyanatlar bazarda
qiymətləri artırıb azaldacaq. Müəyyən dövrdən sonra isə qiymətlərdə stabilləşmə gedəcək”.
Enerji məsələləri üzrə ekspert Zəfər Vəliyevqeyd etdi ki, qiymət artımı müvəqqəti xarakter daşıyır: "Əlcəzair toplantısı
OPEC ölkələrinin növbəti görüşlərindən biridir. Görüş ərəfəsində KİV-də Vyana
paktına üzv olan dövlətlərinin hasilat həcmlərinin azaltması ilə bağlı
müzakirələrin keçiriləcəyinə dair məlumatlar yayıldı. Görüşdə Səudiyyə Ərəbistanının, Birləşmiş Ərəb
Əmirliklərinin və Rusiyanın neft nazirləri indiki şəraitdə hasilat həcmlərinin
artırılmasına ehtiyacın olmadığını bildirdi. Digər tərəfdən, payız-qış
mövsümünün daxil olması ilə bağlı dünyadakı neft emalı zavodlarında texniki
baxış keçirilir. Yəni, zavodlar öz emal güclərinin 30-40 faizini ixtisara
salıb. Neftə olan tələbat 2018-ci ilin dördüncü rübündə və gələn ilin birinci
rübündə aşağı düşəcək. Bu mənada, hasilat həcmlərinin artırılması qlobal neft
bazarlarında tarazlığın bərpa olunmasına mane ola bilər. Gələn il OPEC-dən
kənar hasilatçı dövlətlər neft hasilatını artıracaq. Proqnozlarda bildirilir
ki, 2023-cü ildə ABŞ-ın neft hasilatı 13,4 milyon barrel təşkil edəcək. OPEC-dən
kənar hasilatçı dövlətlər 60 milyon barreldən çox neft tədarük edəcək. Bütün
bunlara əsasən deyə bilərik ki, indiki şəraitdə neft hasilatını artırmaq
məqsədəuyğun deyil. İndi neftin qiyməti 80 dollardır. Amma bu, müvəqqətidir.
Qısa müddətdən sonra qiymətlərin yenidən düşəcəyi gözlənilir. Çünki qarşıdakı
aylarda neftə olan tələbat azalacaq”
Şəbnəm