Qalmaqallı Leyla Yunus mühacirətə getdikdən sonra da müxtəlif
platformalardan istifadə edərək hər zaman Azərbaycana qarşı yalan, böhtan və
qərəz dolu çıxışlar edir. Onun Avropadakı erməni şəbəkəsi ilə əlaqəli olması
heç kimə sirr deyil. Azərbaycanda olarkən "hüquq müdafiəçisi” statusundan
istifadə edən bu şəxsin "sülh və demokratiya” pərdəsi altında "siyasi məhbus”
alveri etməsi də hər kəsə bəllidir. Məhz bu pullar hesabına Hollandiyada özünə
mənzillər alan Leyla Yunus çağırıldığı hər yerdə Azərbaycana hədəf alır. O, bu
dəfə Rusiyanın "Nastoyaşee Vremya” telekanalına müsahibəsi zamanı Azərbaycanda
"gördüyü işlər” və "layihələr” barədə sərsəm fikirlərini səsləndirib. Bəs
görəsən Leyla Yunus bu addımları ilə nəyə nail olmaq istəyir?
Mövzu ilə bağlı "Kaspi” qəzetinə açıqlamasında
Milli Məclisin deputatı, hüquqşünas Çingiz Qənizadə bildirdi ki, Leyla
Yunusun məqsədi bəllidir və o, Azərbaycanla bağlılığı olmayan bir adamdır: "O,
heç vaxt Azərbaycan dövlətini, hakimiyyətini, xalqını qəbul etməyib. Leyla
Yunus Azərbaycanda hakimiyyətdə kimin olmasından asılı olmayaraq, istər ulu
öndər Heydər Əliyevin vaxtında, istər prezident İlham Əliyev dövründə, istərsə
də ondan əvvəlki Mütəllibov, Elçibəy dönəmlərində heç bir halda dövləti, onun
rəsmilərini sevən bir insan olmayıb. Onun yeganə məqsədi varlanmaq olub. Bunu
da qeyri-hökumət təşkilatı olaraq xaricdən müəyyən maliyyə vəsaiti almaqla,
onların sifarişi əsasında Azərbaycana, onun siyasi rəhbərliyinə, hakimiyyət
qollarına böhtan atmaqla həyata keçirib. Beləliklə də həmin maliyyə mənbələrini
öz məqsədi üçün istifadə edib. Bilirik ki, hələ burada olarkən xaricdən aldığı
qrantlar hesabına bir neçə mənzil, ofis alıb. Bu faktı vaxtı ilə digər vətəndaş
cəmiyyəti institutlarının rəhbərləri də qeyd etmişdilər”.
Ç.Qənizadə əlavə etdi ki, Azərbaycan-Rusiya münasibətlərinin dostluq istiqamətində
artan inkişafı Ermənistanı narahat etdiyi kimi, erməniləri sevən Leyla Yunus
kimilərini də narahat etməyə başlayıb: "Onlar erməni dostlarının, qardaşlarının
siyasi xəttinə uyğun olaraq Azərbaycanla Rusiya arasında hansısa bir formada
şübhə toxumu səpmək, nifaq salmaq yolunu tutublar. İndi də Leyla Yunus Rusiyanın
hansısa bir mətbuat orqanında Azərbaycanda müstəqil məhkəmə hakimiyyətinin,
mətbuatın, qeyri-hökumət təşkilatının olmaması ilə bağlı yalan, iftira və
böhtan dolu fikirlərini bildirir. Məqsəd aydındır, hədəf Azərbaycan dövlətidir,
siyasi hakimiyyətidir, xalqımızdır. Çünki Azərbaycan siyasi hakimiyyətini xalq
formalaşdırır. Bu adamın yeganə məqsədi Azərbaycan dövləti və xalqına qarşı
qarayaxma kampaniyasında iştirak etməklə, xaricdən daha çox maliyyə vəsaiti
almaq və özünün şəxsi varidatını artırmaqdır”.
Hüquqşünas Sahib Məmmədov da bildirdi
ki, hazırda Leyla Yunusun işi anti-Azərbaycan təbliğatı aparmaqdan ibarətdir:
"O azadlığa buraxılarkən bilinirdi ki, mühacirətə gedən kimi məhz Azərbaycana
qarşı fəaliyyətlə məşğul olacaq. Ölkədə olanda belə, bizə düşmən qüvvələrə
bağlı adam idi. Əslində mediada dönə-dönə bu məsələyə toxunulub. Azərbaycana
qarşı müəyyən qüvvələr var ki, planlı şəkildə iş aparırlar. O cümlədən erməni
şəbəkəsinə bağlı olan qrupların bu istiqamətdə fəaliyyəti var. Leyla Yunus da
bu istiqamətdə fəaliyyət göstərir. Bir
müddət əvvəl Brüsseldə Avropa Parlamentində Azərbaycanı xüsusilə iki
məsələdə ittiham edirdi. Bunlardan biri keçmiş Şaumyan rayonunun 8 kəndindən
ermənilərin deportasiya olunması məsələsi idi. Bu hadisə SSRİ dövründə baş
verib. Digər məsələ isə Tərtərdə cəbhə boyu ərazilərdə həm hərbiçilər, həm də
mülki əhali arasında xəyanət edənlərlə bağlı idi. Yəni belə deyək ki, erməni
xüsusi xidmət orqanları ilə əməkdaşlıqda ittiham olunan bir qrup şəxs həbs
edilmişdi. Leyla Yunusda bu şəxslər barədə tam müfəssəl məlumat var idi.
Görünür bu məlumatları erməni xüsusi xidmət orqanları ötürüb. Leyla Yunus onların
müdafiəsini həyata keçirirdi. Buradan da açıq şəkildə görünür ki, Leyla və Arif
Yunusların məqsədi ermənilərin azərbaycanlıları dünyaya "vəhşi” obrazını
yaratmaq siyasətini təbliğ etməkdir. Onlar Azərbaycanı qeyri-demokratik, insan
haqlarının pozulduğu bir məkan kimi tanıtmağa çalışırlar. Yunuslar bununla
ermənilərin beynəlxalq aləmdə üstün mövqeyini təmin etmək istəyirlər”.
S.Məmmədov vurğuladı ki, Leyla Yunusdakı nifrət hissi onu xəstə edib:
"O belə hesab edir ki, Azərbaycana sanksiyalar tətbiq olunmalıdır, beynəlxalq
aləmdən izolyasiya edilməlidir. Bununla da Azərbaycan Qarabağı güzəştə
getməlidir. Bu səbəbdən də Avropa institutlarını ittiham edir ki, Azərbaycana
qarşı sanksiyalar tətbiq etmirlər. Amma bu Leyla Yunusun arzusundan başqa bir
şey deyil. Hər halda, Avropa və Amerika hansı siyasəti həyata keçirməsini Leyla
ilə məsləhətləşməli deyil”.
BƏXTİYAR