Onlar qüsurludur, yoxsa bizim düşüncəmiz?
Ziyanın 30 yaşı var. Əqli
qüsurludur. Rayonda, məhəllə mühitində böyüyüb. Valideynləri ondan utanmayıb,
övladları arasında ayrı-seçkilik etməyiblər. Bütün məclislərdə, əyləncələrdə
Ziya da həmyaşıdları kimi və ən əsası, onlarla birlikdə əylənib. Valideynləri
onun hüquqlarını tanıdığı üçün ətraf da tanımaq məcburiyyətində qalıb. Heç kim
Ziyaya əlilliyi olan şəxs kimi yanaşmayıb, Ziya da özünü qüsurlu və ya fərqli
hiss etməyib. Cəmiyyət üçün pozitiv, həyatsevər, örnək gənc olub.
Lakin sağlamlıq imkanları məhdud
olan bütün uşaqlar Ziya kimi şanslı deyil. Onlar cəmiyyət, hətta ailələri tərəfindən
bərabərhüquqlu vətəndaş sayılmır, hüquqları tapdanır, bir çox hallarda onlara xəstə
kimi yanaşılır. Bəs dövlət tərəfindən onların hüquqları necə qorunur?
"71,7
min sağlamlıq imkanları məhdud uşaq var”
Əmək
və Əhalinin Sosial Müdafiəsi Nazirliyinin mətbuat xidmətinin rəhbəri Fazil
Talıbov "Kaspi”yə
açıqlamasında bildirdi ki, Azərbaycanda
sağlamlıq imkanları məhdud uşaqların sayı 71,7 min nəfərdir. Onların hər birinə "Sosial müavinətlər haqqında” Qanuna əsasən
aylıq sosial müavinət ödənilir və bu müavinətlərin məbləği mütəmadi olaraq
artırılır: "Bu uşaqların reabilitasiyası sahəsində də mühüm işlər aparılır.
Nazirliyin Uşaq Bərpa Mərkəzində ən yüksək standartlara uyğun səviyyədə
reabilitasiya şəraiti yaradılıb. Mərkəzin məqsədi tibbi, sosial, tədris-peşə
reabilitasiya tədbirlərinin aparılması yolu ilə sağlamlıq imkanları məhdud
uşaqların sosial statusunun bərpa edilməsini və onların cəmiyyətə
inteqrasiyasını təmin etməkdir. 2018-ci ilin 6 ayında bu mərkəzdə 1601 nəfər
uşağa stasionar və ambulator qaydada reabilitasiya xidmətləri göstərilib. Eyni
zamanda, Heydər Əliyev Fondunun dəstəyi ilə son illərdə istifadəyə verilən
Xüsusi Qayğıya Ehtiyacı olan Uşaqların Dövlət Reabilitasiya Müəssisəsi ölkəmizdə
sağlamlıq imkanları məhdud uşaqlar üçün tibbi-sosial reabilitasiya imkanlarının
artırılmasına, bu sahədə yüksək standartlara uyğun infrastrukturun
formalaşdırılmasına mühüm töhfədir. Müəssisədə hər il 400 nəfərədək uşağa dünya
psixoterapiya praktikasında özünü doğrultmuş qum terapiyası, habelə artterapiya
üsullarından, müalicəvi vannalardan və s. istifadə şəraitində reabilitasiya
xidmətləri göstərilir”.
Nazirlik rəsmisinin sözlərinə görə,
sağlamlıq imkanları məhdud uşaqlar dövlət tibb müəssisələrində pulsuz ixtisaslı
tibbi xidmətdən istifadə etmək, habelə sanatoriya-kurort müalicəsi ilə təmin
olunmaq hüquqlarına malikdirlər: "Qanunvericilikdə aidiyyəti qurumların həmin
uşaqların və 18 yaşından yuxarı əlilliyi olan şəxslərin məktəbəqədər, ümumi,
ilk peşə-ixtisas, orta ixtisas və ali təhsil almasını təmin etmələri də əksini
tapıb. Nazirliyin 1 və 2 saylı sağlamlıq imkanları məhdud uşaqlar üçün sosial
xidmət müəssisələrində 290 uşaq daimi dövlət təminatında yaşayır. Bu müəssisələrdə
də ən müasir tələblərə uyğun yaşayış və reabilitasiya şəraiti mövcuddur. "Əmək
pensiyaları haqqında” Qanuna əsasən sağlamlıq imkanları məhdud uşağını səkkiz
yaşınadək tərbiyə etmiş anaların bu Qanunun 7-ci maddəsinə uyğun olaraq müəyyən
olunmuş yaş həddi 5 il azaldılmaqla, yaşa görə əmək pensiyası hüququ vardır.
"Sosial müavinətlər haqqında” Qanuna əsasən isə, sağlamlıq imkanları məhdud
övladını 8 yaşınadək tərbiyə edən qadınlar 57 yaşına çatdıqda, yaşa görə sosial
müavinət hüququna malik olurlar. Həmçinin ana vəfat etdiyinə, yaxud analıq
hüququndan məhrum edildiyinə görə, sağlamlıq imkanları məhdud övladını növbəti
nikah bağlamadan təkbaşına 8 yaşınadək böyüdən kişilər 62 yaşına çatdıqda, yaşa
görə sosial müavinət hüququ əldə edirlər”.
Məlumat üçün bildirək ki,
sağlamlıq imkanları məhdud uşaqlar 18 yaşından sonra əlilliyi olan insanlar
kimi qeydə alınırlar və onlara müvafiq əlillik qrupları verilir. Əlilliyi olan
insanların da cəmiyyətdən təcrid olunmaması, tibbi-sosial reabilitasiyası və cəmiyyətə
inteqrasiyası üçün məqsədyönlü dövlət siyasəti aparılır.
"Valideynlər
övladlarının qüsurlu uşaqlarla birgə təhsil almasını qəbul etmirlər”
Ombudsman
aparatının rəhbəri Aydın Səfixanlı bizimlə söhbətində bildirdi ki, sağlamlıq
imkanları məhdud uşaqlar Azərbaycan Respublikasının
Konstitusiyasında və digər normativ hüquqi aktlarda, ölkəmizin tərəfdar çıxdığı
beynəlxalq müqavilələrdə təsbit olunmuş bütün vətəndaş hüquq və azadlıqlarına
malikdirlər: "Dövlət əlillik əlamətinə görə hər hansı ayrı-seçkiliyə yol vermədən
bu qəbildən olan şəxslərə cəmiyyət həyatının bütün sahələrində iştirak etmək
üçün digər şəxslərlə bərabər imkanlar, öz fərdi qabiliyyətlərinə və maraqlarına
uyğun həyat sürməsi üçün lazımi şərait yaradılmasına, əlilliyi doğuran risklərin
aradan qaldırılmasına və ya azaldılmasına, əlilliyi olan şəxslərin
reabilitasiyasına və hərtərəfli inkişafına təminat
verir. Bununla yanaşı, onların təhsil alması və peşə hazırlığı keçməsi üçün
lazımi şərait yaradılmasına təminat verir. Həmçinin əlilliyi olan şəxslərin işgəncələr
və digər qəddar, qeyri-insani və ya ləyaqəti alçaldan rəftar və cəzalara
məruz qalmamasını, onların yaşayış yerində və yaşayış yerindən kənarda
istismarın, zorakılığın, təhqirin bütün formalarından müdafiəsini, şəxsi həyatının
toxunulmazlığını təmin edir”.
Problemlərə gəldikdə isə, qurum rəhbəri deyir ki, əlilliyinin cəmiyyətdə düzgün dərk edilməməsi əsas problemlərdəndir:
"Yaşından, irqindən, cinsindən, dilindən, dinindən, sosial vəziyyətindən asılı
olmayaraq əlilliyi olan insanlar üçün xarakterik olan bir sıra ümumi problemlər
mövcuddur. Belə problemlər sırasında ictimai binaların, sosial infrastruktur,
ictimai-iaşə və s. obyektlərin onlar üçün müyəssər olmaması və bu mövzunun cəmiyyət
tərəfindən düzgün dərk edilməməsidir. Dövlət tərəfindən BMT-nin "Əlilliyi
olan şəxslərin hüquqları haqqında” Konvensiyanın ratifikasiya edilməsi və bu
günlərdə Milli Məclisdə eyniadlı qanunun qəbul olunması, ölkə Prezidentinin
müvafiq sərəncamları ilə "2018–2024-cü illərdə Azərbaycan Respublikasında
sağlamlıq imkanları məhdud şəxslər üçün inklüziv təhsilin inkişafı üzrə Dövlət
Proqramı”nın, "Uşaqlıq dövrünə xas olan əlilliyin erkən
profilaktikası və müalicəsi üzrə 2018–2020-ci illər üçün Milli Fəaliyyət
Planı”nın təsdiqi, paytaxt ərazisindəki yol kəsişmələrində
və səkilərdə pandusların tikinti-quraşdırma işlərinə başlanılması və digər bu
kimi işlər əldə olunmuş irəliləyişlərdəndir”.
Məlum
olduğu kimi, bu qəbildən olan uşaqların ümumtəhsil məktəblərində təhsilə cəlb
olunması məqsədilə Azərbaycanda ibtidai təhsil səviyyəsində inklüziv təhsil
modelinin hazırlanması işlərinə başlanılıb, bunun üçün fəaliyyət planı və yol xəritəsi
hazırlanıb. Lakin qurum rəsmisi deyir ki, ölkəmizdə inklüziv təhsilə münasibət
birmənalı deyil: "Bakı şəhəri üzrə 2015-2016-cı tədris ilində iki eksperimental
məktəb (220 və 138 nömrəli), 2016-2017-ci tədris ilindən isə daha iki məktəb
(252 və 202 nömrəli) seçilib. Göründüyü kimi, inklüziv təhsil modeli hələ də
ölkəmizin bütün ərzisində deyil, yalnız Bakı şəhərinin bir neçə məktəbində, özü
də ancaq ibtidai təhsil səviyyəsində tətbiq olunur. Təəssüflər olsun ki, ölkəmizdə
inklüziv təhsilə münasibət birmənalı deyil. İnklüziv təhsilin tətbiqi və təbliği
istiqamətində dövlət səviyyəsində müvafiq tədbirlərin həyata keçirilməsinə
baxmayaraq, hələ də əhalinin bu sahədə məlumatlılıq səviyyəsi çox aşağıdır. Bir
çox valideynlər öz övladlarının bu qəbildən olan uşaqlarla birgə təhsil
almasını qəbul etmirlər. Hətta bəzi hallarda belə uşaqların ümumi təyinatlı təhsil
müəssisələrinə qəbul edilməsi məsələsi ilə də bağlı maneələrin yaradılması
hallarına rast gəlinir. Buna görə də cəmiyyətin əlilliyə yanaşma tərzinin
müasir dövrün tələbləri baxımından dəyişdirilməsi çox vacibdir. Bu baxımdan
hesab edirik ki, həm ümumi təyinatlı təhsil müəssisələrinin rəhbərliyi,
pedaqoji heyəti, həm də valideynlər arasında inklüziv təhsilin mahiyyəti və əhəmiyyəti,
bu sahədə müsbət beynəlxalq təcrübə barədə geniş maarifləndirmə işləri
aparılmalıdır”.
"Cəmiyyət
yardım etmək istəyi ilə bu şəxsləri təcrid edir”
Beynəlxalq
ekspert Munir Məmmədzadə də təsdiqləyir ki, əsas problem cəmiyyətdə əlilliyi
olan uşaqlara yanaşma ilə bağlıdır. Ekspertin sözlərinə görə, cəmiyyət əlilliyi
olan şəxslərə yardım obyekti kimi yanaşır: "Sağlamlıq imkanları məhdud uşaqlar
Qanunda bərabərhüquqlu vətəndaş kimi qeydə alınsa da, təcrübə bunu göstərmir.
Biz daha çox onları sağlamlıq imkanları məhdud olanlar kimi deyil, "xəstə”, "yazıq”, "şikəst” kimi ifadələrdən
istifadə edərək müəyyən edirik. Bayramdan bayrama onlara yardım etmək məqsədilə
tədbirlər görürük. Sözsüz ki, burada niyyət xoşdur. Yəni insanlar həmin şəxslərə
yardım etmək istəyirlər, amma əslində ən başlıca problem ondan ibarətdir ki, cəmiyyət
yardım etmək istəyi ilə bu şəxsləri təcrid edir. Onların cəmiyyətin bərabər
hüquqlu üzvü kimi tanınmasına yardımçı olmur. Cəmiyyətin yanaşmasının dəyişməsi
üçün böyük işlər görülməlidir”.
Ekspert vurğuladı ki, valideynlər
də öz uşaqları arasında ayrı-seçkilik edirlər: "Hətta valideynlər əlilliyi olan
uşaqları üzə çıxarmaqdan utanırlar. Amma ikinci məsələ də var ki, üzə
çıxarsalar belə, ölkədə ailələrə sosial dəstək göstərən xidmətlər yoxdur. Əmək
və Əhalinin Sosial Müdafiəsi Nazirliyi bu istiqamətdə işlər görür. Amma bu işlərin
daha sistemli tətbiq olunmasına ehtiyac var. Hökumətin iştirakı ilə müəyyən təbliğat,
təşviqat işləri aparılır. Şəhərdə fiziki çıxışın təmin edilməsi üçün müəyyən
işlər görülür. Əlilliyin dərəcəsinin təmin edilməsi elektron şəkildə həyata
keçirilir. Çox yaxşı haldır ki, 2018-2020-ci illəri əhatə edəcək inklüziv təhsillə
bağlı dövlət proqramı hazırlanıb. Amma dediyim kimi, təqdirəlayiq addımlar olsa
da, problemlər hələ də var”.
Ekspertin sözlərinə görə, əlilliyi
olan uşaqların statistikası düzgün aparılmır: "Biz əgər statistikaya müraciət
etsək görərik ki, Azərbaycanda 2 milyon 600 mindən çox 18 yaşı tamam olmayan şəxs
var. Bu şəxslər arasında əlilliyi olan uşaqların sayı rəsmi statistikada 65 minə
yaxındır. Beynəlxalq statistikaya müraciət etdikdə görürük ki, adətən əhalinin ən
azı 5-10, bəzi məqamlarda 10-15 faizini əlilliyi olan şəxslər təşkil edir. Nəzərə
alsaq ki ölkədə hazırda 71,7 min əlilliyi olan uşaqlar qeydə alınıb, bu, 18
yaşı tamam olmayanların təxminən 2,5 faizi deməkdir. Bu da göstərir ki, Azərbaycanda
statistika düzgün aparılmır. Buna səbəb əlilliyin müəyyən edilməsində olan
yanaşmalardır. BMT-nin konvensiyası qəbul olunandan bütün dünyada əlilliyi olan
şəxslərə münasibətdə yeni model tətbiq olunur. Bu model də onların əlilliklə
bağlı məhdudiyyətlərinə deyil, insan hüquqlarına, sosial funksiyalarına daha
çox yönəlib. Amma MDB ölkələrində əlillik hələ də tibbi cəhətdən müəyyən
olunur. Bizim tibbi yanaşmamız və müəyyən stereotiplər olduğundan, uşaqlar
vaxtında diaqnostika keçmədiyindən, uşaqların valideynləri bu məsələlərdə kifayət
qədər məlumatları olmadığından bir çox hallarda bu statistika tam öz əksini
tapmır. Azərbaycanda və digər postsovet ölkələrində ailələr əlilliyi olan
uşaqları internat müəssislərinə yerləşdirirlər. Hazırda dövlət uşaq müəssisələrində
olan uşaqların təxminən 38 faizi əlilliyi olan uşaqlardır. Beynəlxalq
araşdırmalar göstərir ki, uşaqların valideynlərdən ayrılması və kollektiv şəkildə
tərbiyə olunması onların əqli, fiziki və emosional inkişafına mənfi təsir göstərir.
Biz onları internat məktəblərinə yerləşdirməklə, cəmiyyətdən təcrid edirik”.
Aygün ƏZİZ
Azərbaycan Respublikasının
Prezidenti yanında Kütləvi İnformasiya Vasitələrinin İnkişafına Dövlət Dəstəyi
Fondunun keçirdiyi müsabiqəyə təqdim olunur.