Olimpiadaya lisenziya qazanan ilk azərbaycanlı bədii gimnast – Portret
Hələ
6 yaşında Birinci vitse-prezident Mehriban Əliyevanın xeyir-duasını alan Zöhrə,
bu gün bədii gimnastikamızın lideri sayılır
Gimnastika, idmanın populyar növlərindən biridir. Azərbaycanda
isə şahmat, güləş və digər döyüş növləri ilə yanaşı, son illərdə ən
sevilib-seçilən növ hesab olunur. Bəli, 17 il əvvəl federasiya rəhbərliyində
edilən dəyişiklik və beləliklə, təşkilatın yenidən qurulmasından sonra ölkədə
gimnastikanın sürətli inkişaf dövrü başladı. Qısa müddətdə bu növ üzrə mühüm
beynəlxalq yarışların təşkilatçılıq təcrübəsi formalaşmağa başladı. 2003-cü
ildə Bakıda ilk dəfə bədii gimnastika üzrə dünya kubokunun mərhələ yarışı
keçirildisə, iki il sonra artıq mundialın ev sahibliyinə yiyələndik. Səmərəli
fəaliyyətin bəhrəsi olaraq, müstəqil ölkə kimi bu günə qədər ardıcıl dörd dövrü
uğurla başa vurub, olimpiadalara vəsiqə qazanmışıq. Bunların üçündə yalnız
bədii gimnastika üzrə təmsil olunmuşuqsa, "Rio 2016"-da idman
gimnastikasında da dördilliyin zirvə yarışınadək irəliləmişik.
Azərbaycanda bir gimnastika ənənəsi formalaşıb və
bu, hər keçən gün daha da genişlənir. Xatırladaq ki, gimnastlarımız cari
olimpiya dövründə artıq dörd lisenziyaya yiyələniblər. İdman gimnastikasında
İvan Tixonov və Marina Nekrasova, bədii növdə isə Zöhrə Ağamirova və qrup
hərəkətləri üzrə komandamız "Tokio 2020"-nin qapısını açıb.
Beləliklə, bu ilin sentyabrında Bakıda təşkil olunan bədii gimnastika üzrə
dünya çempionatında olimpiya lisenziyasını rəsmiləşdirərək, tarixi ilkə imza
atan gənc qızımızdan bəhs edəcəyik.
Hələ
12 il əvvəl alınan xeyir-dua
8 avqust 2001-ci ildə Bakıda, yoşinkan aykido üzrə
dördüncü dan qara kəmər ustası Atil Ağamirovun ailəsində dünyaya göz açan
Zöhrə, gimnastika ilə 3 yaşından məşğuldur. Lakin ilk addımlarını bədii deyil,
akrobatika gimnastikasında atıb. Anası Könül xanımın dediyinə görə, bu, tam
təsadüf nəticəsində baş verib. Belə ki, onlar məhz "bədii gimnastika"
deyib, zala üz tutsalar da, tale onların qismətinə akrobatika məşqçisini
çıxarıb. Beləcə, bir ili əhatə edən müddətdə gimnastikanın ən qədim növü ilə
məşğul olan kiçik Ağamirova, dörd yaşından etibarən gənc məşqçi Elnarə
Hüseynovanın rəhbərliyi ilə bədii gimnastikanın sirlərini öyrənməyə başlayıb.
İki yaşından hərfləri tanıyan, fərqli maraq və bacarıqları ilə adi uşaq
olmadığını nümayiş etdirən Zöhrə, gözlənildiyi kimi, az vaxtda özünü sübut
edir. Bir ay sonra respublika yarışında üçüncü olursa, bir il sonra Rusiyada
keçirilən turnirdə birincilik qazanır. Ümumiyyətlə, balaca Zöhrənin xalça
üzərindəki qətiyyəti, çevik hərəkətləri, çətin elementləri məharətlə icra
etməsi, onu izləyən mütəxəssisləri həmişə heyran edib. Ağamirova hələ 6 yaşında
olarkən, Azərbaycan Gimnastika Federasiyasının prezidenti Mehriban Əliyevanın
diqqətini çəkib. Belə ki, uşaq bağçasının açılışında Zöhrənin təqdim etdiyi
proqramı izləyən Mehriban xanım, çıxışdan sonra onunla söhbət edir, uğurlar
diləyir, xeyir-dua verir.
Əlbəttə, bu, hər bir kiçik yaşlı idmançı üçün olduqca qürurlu, gələcəyə təkan
verən məqamdır.
İslamiada
çempionu, universiada rekordçusu
14 yaşında Bakı birinciliyində qalibiyyət sevinci
yaşayan Zöhrə, 2015-ci ildə Bolqarıstanın Plovdiv şəhərində keçirilən
beynəlxalq turnirdə halqa ilə hərəkətin yekununda gümüş medal qazanır. Növbəti
il isə o, ip və çoxnövçülükdə Azərbaycan çempionatının qızıl, topla hərəkətdə
gümüş, gürzlərlə bürünc medalçısı olur. 2016-cı ildə Estoniyanın Tartu
şəhərində təşkil olunan ənənəvi "Miss Valentin" turnirində gürzlərlə
ikinci olan Ağamirova, top, ip və çoxnövçülükdə ölkəmizə bürünc medalla dönür.
15 yaşlı gimnastın həmin ildə digər nailiyyəti isə Mingəçevirdə keçirilən açıq
Azərbaycan birinciliyinə təsadüf edir. Zöhrə çoxnövçülükdə ən güclü adını
qazaraq, ili tam olaraq aktivinə yazır. 2017-ci ildə Belçikanın Gent şəhərində
baş tutan "Happy Cup" beynəlxalq yarışında birinci olan gənc bədii
gimnast, mayda Bakıda baş tutan IV İslam Həmrəyliyi Oyunlarında da fəxri
kürsünün ən yüksək pilləsində dayanır. Belə ki, tarixdə ilk dəfə İslamiadanın
proqramına salınan bədii gimnastika üzrə yarışda Marina Durunda, Jalə Piriyeva
və Zöhrə Ağamirovadan ibarət Azərbaycan yığması 4 hərəkətin yekununda 128.200
balla birinci olur. Qızlarımıza baş mükafatı Azərbaycan Gimnastika
Federasiyasının prezidenti Mehriban Əliyeva təqdim edir ki, bundan 10 il əvvəl
birinci xanımın xeyir-duasını alan Zöhrənin həmin an keçirdiyi qürur hissini
ifadə etmək üçün əlavə şərhə lüzum yoxdur.
2018-ci ildə Latviyanın paytaxtı Riqada təşkil
olunan "Baltika halqası" turnirində gürzlərlə kompozisiyada gümüş
medal qazanan Ağamirovanın karyerasının ən parlaq dövrü məhz cari ilə təsadüf
edir. 18 yaşının tamamına hələ bir ay qalmış, Napolidə keçirilən universiadada
ölkəmizin aktivinə iki gümüş (gürzlər və çoxnövçülük) medal yazdıran istedadlı
gimnast, 16-22 sentyabr aralığında baş tutan, Bakının tarixdə ikinci dəfə ev
sahibliyi etdiyi mundialda ilk 16 gimnast sırasına düşməklə, olimpiadaya
lisenziya missiyasının da öhdəsindən gəlir. Yeri gəlmişkən, respublikamızın
nümayəndələri Apenində baş tutan sayca 30-cu universiadadan 7 medalla döndü ki,
növlər üzrə keyfiyyət etibarilə ən yaxşı göstəriciyə məhz gimnastlarımız imza
atdı - 1 qızıl, 2 gümüş. Bir universiadada 2 medal qazanmaq isə Zöhrəyə qədər
heç bir idmançımıza nəsib olmamışdı. Bu arada, Bakı şəhər 277 saylı orta
məktəbin məzunu olan rekordçu qızımız, hazırda Azərbaycan Dövlət Bədən
Tərbiyəsi və İdman Akademiyasında təhsil alır.
Yeni
səhifə
Azərbaycan, "Los-Anceles 1984"-dən
etibarən Yay Olimpiya Oyunlarının proqramında yer alan bədii gimnastika üzrə
2004-cü ildən zirvə yarışında təmsil olunur. İlk dəfə Dinara Gimatova lisenziya
qazanmışdısa, "Pekin 2008"də onunla yanaşı, Aliyə Qarayeva və qrup
hərəkətləri üzrə yığma minimum vəzifəni yerinə yetirmişdi. London
olimpiadasında sadəcə, Qarayeva, Rioda isə Marina Durunda ilə təmsil
olunmuşduq. Zədə səbəbindən Afinada Gimatovanı əvəzləyən Anna Qurbanovanın da
ölkəmizin qucaq açdığı idmançılardan biri olduğunu nəzərə alsaq, Zöhrə
Ağamirova fərdi şəkildə olimpiadaya yüksələn ilk Azərbaycan əsilli bədii
gimnastdır. Hər hansı arzuolunmaz hal baş verməsə, heç bir şübhəsiz,
qəhrəmanımızı Tokio arenasında görəcəyik.
"Əsas
iştirakdır" devizi ilə qatılmayacağam"
"Mən əvvəlcədən söz verməyi sevmirəm"
deyir, Zöhrə: "Olimpiadaya lisenziya qazanmaq, o möhtəşəm ab-havanı hiss
etmək hər bir idmançının arzusudur. Bu, çox az gimnasta nəsib olur. Buna görə
özümü xoşbəxt hiss edirəm. Rəqiblərim çox-çox təcrübəli, titulludur. Amma mən
də "əsas iştirakdır" devizi ilə qatılmayacağam. Medal söz verə
bilmərəm, çalışacağam ki, gözəl, yaddaqalan çıxış göstərim".
Nəticələrindən də göründüyü kimi, uğurlu və sevimli
aləti gürzdür. Dediyinə görə, heç kimi özünə kumir seçməyib. Bununla belə,
gözünü açandan Alina Kabayeva, Yevgeniya Kanayeva, Lyubov Çarkaşina kimi
əfsanəvi bədii gimnastları izlədiyini, onların bacarıqlarından faydalandığını
qeyd edir.
Bədii gimnastika, incəsənətin gözəllik və güclə
mükəmməl vəhdətidir. Təsadüfi deyil ki, adətən bu növü, idmandan daha çox,
incəsənətlə bağlayırlar. Hər bir hərəkət musiqi sədaları altında icra olunduğundan,
gimnast xanımlarda olması gərəkən başlıca xüsusiyyətlərdən biri musiqi
duyumudur. Zöhrənin isə musiqiyə qarşı ta uşaqlıqdan böyük həvəsi olub. Yaxşı
da səsi var qızımızın.
Portret
İslamiadanın qızıl, universiadanın ikiqat gümüş
mükafatçısı və olimpiadaya lisenziya! 18 yaşlı bir idmançı üçün kifayət qədər
uğurlu, qibtə ediləcək karyeradır. Ələlxüsus, Zöhrə bu gün Azərbaycan bədii
gimnastikasının 1 nömrəli simasıdır. "Heç nə asanlıqla əldə olunmur,
sadəcə, mübariz olmaq lazımdır" deyən istedadlı qızımız, görünür, öz gözəl
təbəssümü ilə bizi zirvədə hələ çox salamlayacaq.
Sahib