Obamadan Ankara və Bağdadın mübahisəsinə reaksiya
Mosul və onun ətrafında baş
verənlər son günlərin an aktual məsələlərindən birinə çevrilib. Bölgədə Mosulun
İŞİD-dən təmizlənməsi məsələsi ətrafında gərgin geosiyasi vəziyyət yarandığını
artıq hamı anlayır. Yəni bu məsələ çox uzana bilər. Konkret desək, Mosulun
ikinci Hələbə çevrilməsi təhlükəsi mövcuddur.Qərb, xüsusən də ABŞ vəziyyəti
nəzarətdə saxlamağa, əsas söz sahibi olmağa cəhd edir. Rəsmi Vaşinqton burada
regionun coğrafiyasına deyil, öz maraqlarına uyğun siyasi mənzərə yaratmaqda
qərarlıdır. Məsələnin çox təhlükəli bir aspekti isə regionda müsəlmanlar
arasında məzhəb ixtilaflarının coğrafiyasının genişlənməsi riski ilə
əlaqəlidir.
Beləliklə, bölgə dövlətləri
ilə yanaşı, Birləşmiş Ştatların da qatıldığı münaqişə ilə bağlı ən müxtəlif
versiya, ehtimal və proqnozlar gündəmi zəbt edib. Şəhər ətrafında son duruma
gəldikdə, İraq qüvvələri ölkənin şimalındakı Mosul şəhərini özünü İslam Dövləti
(İŞİD) adlandıran qruplaşmanın əlindən almaq üçün artıq 10-cu gündür ki,
əməliyyat aparır. Ən aktual məsələlərdən biri Türkiyənin regionda iştirakı
məsələsidir. Bəlli olduğu kimi, Mosulla bağlı Türkiyənin atdığı addımlar İraq hökumətinin ciddi narazılığı ilə
qarşılanıb. Türkiyə prezidenti Rəcəb Tayyib Ərdoğanın İraqın Mosul şəhərini
İŞİD-dən azad edəcəyinə söz verməsi rəsmi Bağdadı özündən çıxarıb. İraq hökuməti
türk əsgərlərinin onların ərazisində qanunsuz olaraq fəaliyyət göstərdiyini
bildirib. Ən yüksək səviyyədə qarşılıqlı ittihamların ardı-arası kəsilmir. Belə
bir durumun ona sərf etmədiyini ABŞ da gözəl anlayır.
Ötən gün ilk dəfə
prezident Barak Obama Ankara ilə Bağdad arasında mübahisəyə öz münasibətini
bildirib. Obama türk həmkarı Rəcəb Tayyib Ərdoğanı İŞİD-ə qarşı əməliyyatlar
zamanı Vaşinqton və Bağdadla koordinasiyaya çağırıb. Ağ evdən verilən məlumata
görə, Obama Ərdoğana zəng edib. O, Mosul əməliyyatlarının uğurlu olması üçün
Ankaranın həm Bağdad, həm də Vaşinqtonla əməkdaşlığının vacibliyini vurğulayıb.
Bundan başqa, Obama Ərdoğanı İraqla davamlı dialoqa çağıraraq İŞİD-lə
mübarizədə Türkiyənin iştirakının forması və səviyyəsini birlikdə müəyyən
etməyin zəruri olduğunu söyləyib. Ağ evin məlumatına görə, söhbət zamanı Obama
da, Ərdoğan da İraqın suverenliyini və ərazi bütövlüyün dəstəklədiklərini
bildiriblər.
Bəs Türkiyə Mosulun azad
edilməsində niyə iştirak etməyə çalışır? Bəlli olduğu kimi, Türkiyə Başika
uğrunda döyüşdə kürd dəstələrinə kömək etdiyini bildirir. İraq hökumətinin
etirazlarına baxmayaraq, Türkiyə Mosul şəhərinin İŞİD terrorçu qrupundan azad
edilməsində fəal rol oynamağa çalışır. Türkiyənin atdığı addımın arxasında bir
neçə səbəb dayanır. Ən əsası isə Türkiyə məzhəb zəminində gərginliklə bağlı
narahatdır. Türkiyənin baş naziri Binəli Yıldırım deyib ki, "İraqın məzhəb
müharibəsinə sürükləndiyi vaxtda” Türkiyə sakitcə oturub tamaşa edə bilməz.
Sünni şəhəri olan Mosulda
məzhəb münaqişəsindən çəkinən Türkiyə şiə üsyançılarının buradakı
əməliyyatlarda iştirakına qarşı olduğunu ifadə edib.
Ankara əməliyyatlardan
sonra şəhərin məzhəb və etnik tərkibinin dəyişəcəyi barədə xəbərdarlıq edib.
Mosul və ətrafında həmçinin çox sayda etnik türk olan türkmanlar yaşayır.
Türkiyə özünü bu etnik azlığın müdafiəçisi kimi görür. Ankara hökuməti haqlı
olaraq bildirir ki, hazırda qonşu ölkədə baş verənlər Türkiyənin milli
təhlükəsizliyinə birbaşa təsir edə bilər. Türkiyə İraqdakı Kürdüstan regional
hökumətinin komandanlığı altında olan kürd peşmərgə qüvvələrini dəstəkləsə də,
qətiyyətlə Kürd Fəhlə Partiyasının (PKK) Mosul əməliyyatında iştirakına
qarşıdır. Yeri gəlmişkən, Mosul həm də qardaş ölkə Türkiyə üçün tarixi əhəmiyyət daşıyır. Mosul 400
ildən artıq müddət ərzində Osmanlı imperiyasının tərkib hissəsi olub. Hətta
1923-cü ildə Türkiyənin müstəqillik qazanmasından sonra yeni yaradılmış
parlamentin bəyan etdiyi Milli Paktda Mosul türk torpaqlarının bir hissəsi elan
edilirdi. Həmin dövrdə Mosul Britaniya işğalı altında idi. Britaniya Türkiyənin
iddialarına son qoymaq üçün Millətlər Liqasında şəhərin statusunun
yüksəldilməsinə nail oldu. İlk dövrlərdə Britaniyanın iddialarına müqavimət
göstərən Türkiyə yekunda, 1926-cı ildə Mosulun İraqa verilməsinə dair sazişi
imzaladı. O zamandan bəri zaman-zaman beynəlxalq siyasi mübahisələrdə Mosul
məsələsi qaldırılıb. Ekspertlər hesab edirlər ki, Türkiyə hökuməti bu keçmiş
Osmanlı şəhərinin İŞİD-dən azad edilməsində rol oynaya bilsə, bunun daxili
auditoriyaya da güclü təsiri olacaq.
Bəs görəsən Rusiya niyə baş
verənlərə reaksiya vermir? Ekspertlər hesab edirlər ki, Rusiya üçün prioritet
köhnə dost Suriyadır.Buna görə də Kreml Mosulla bağlı böhranda Hələbdəki
qədər fəal deyil. Hərbi bazalarının yerləşdiyi Suriyadakı hadisələr onun bölgədəki
maraqları baxımından önəmlidir.ABŞ-la əldə edilmiş gizli razılaşmaya
əsasən İraq Vaşinqtona qalıb. Rusiya Hələbdəki əməliyyatlarını gücləndirir,
Mosuldan qaçacaq cihadçıların yeni problemlər yaratmaması üçün strategiya
hazırlayır. Mosul məsələsində İran da antitürk mövqe nümayiş etdirir. Bu
mübahisədə şiə İranının Bağdad hökumətini dəstəkləyəcəyi gözlənilən idi və belə
də oldu. Rəsmi Tehran bəyan edib ki, Türkiyə Mosulun İŞİD-dən geri alınması
əməliyyatında iştirak etmək istəyirsə, İraq hökumətindən icazə almalıdır. "Bu,
qətiyyən yolverilməzdir ki, hər hansı bir ölkə terror və ya hər hansı başqa
cinayətlə mübarizə bəhanəsi ilə başqa ölkənin suverenliyini pozmağa çalışsın” –
deyə İran Xarici İşlər Nazirliyinin sözçüsü Bəhram Qasimi vurğulayıb.
Azər NURİYEV