“O insanların mərdliyi, cəsurluğu mənə xoş gəlir” - Onun film seçimi
Asudə vaxtımızı dəyərləndirməyin ən yaxşı yollarından biri də film
izləməkdir. Baxdığımız hər bir maraqlı film uzun müddət xatirələrimizdə qalır.
Amma yaxşı filmi tapmaq da bir qədər qəliz məsələdir. Budəfəki film
rubrikamızın qonağı millət vəkili Tahir
Mirkişilidir. Onun gənclərə məsləhət gördüyü 5 filmi sizlərə təqdim edirik.
Millət vəkilinin məsləhət gördüyü ilk film "Axırıncı Aşırım”dır. Deyir
ki, bu filmi ən çox tarixi olmasına görə sevir: "Azərbaycanda Sovet
hakimiyyətinin qurulması zamanı ona qarşı aparılan mübarizə və filmdə təsvir
edilən o insanların mərdliyi, cəsurluğu mənə xoş gəlir. Eyni zamanda, filmdə
Azərbaycanda o dövrün adət-ənənələri çox gözəl əks etdirilib”.
İkinci seçimi sovet
filmlərindən olan "Baharın on yeddi anı”nda
da onun diqqətini çəkən əsas məsələ tarixilikdir: "Burada da o dövrün tarixi
diqqətimi çəkir. İkinci dünya müharibəsi zamanı SSRİ-nin tərkib hissəsi
olduğumuz üçün eyni dövlət sayılırdıq. Filmdə bir kəşfiyyatçının bu qədər
təcrübəli, ağıllı, soyuqqanlı olması diqqətimi çəkmişdi. Bu film həqiqətən çox
xoşuma gəlir”.
Üçüncü, film məsləhəti ABŞ
istehsalı olan "Qartal gözü”dür. Deyir
ki, bu film sırf öz ixtisası ilə bağlı
olduğu üçün diqqətini cəlb edib: "Dünyada idarəetmə formasının müasir
texnologiyalar üzərində qurulması və bu zaman yarana biləcək çətinliklərlə
bağlıdır. Texnologiya ilə bağlı bir film olduğu üçün "Qartal gözü” ən sevimli
filmlərim siyahısında yer alır”.
ABŞ istehsalı olan "Qanunpərəst vətəndaş” da onun sevdiyi filmlər
siyahısındadır. Bildirdi ki, filmdə vətəndaşın qanunu əsas tutaraq qanundan
kənar iş görən məmurlarla mübarizəsindən
bəhs edilir: "Sonda ədalətin qalib gəlməyi, qanuna söykənərək hər bir
qanunsuz fəaliyyətlə məşğul olanlarla mübarizə aparmağın mümkünlüyü təsvir
olunub. Bu, kifayət qədər psixoloji bir film olduğu üçün marağımı cəlb etdi”.
Beşinci məsləhəti isə Türkiyədən oldu. "Möhtəşəm yüz il” serialının adını çəkdi. Deyir ki, bu, son illərdə türkiyəli
kinematoqrafların çəkdiyi ən maraqlı seriallardandır: "Burada əsas qayə tarixi
hadisələrin cərəyan etməsidir, digər tərəfdən tarixi faktların daha çox
reallığı canlandırması maraqlıdır. Eyni zamanda, filmin içərisində o dövrün
siyasi idarəetmə sistemi ilə bağlı verilən qərarların, bu qərarların hansı
səbəblərə söykənməsi əks olunub. Həmçinin, lirikanın eşq dastanının bu qədər
gözəl canlandırılması çox xoşuma gəlmişdi.
Şəbnəm Mehdizadə