“O adamlar haqda Azərbaycan öz mövqeyini göstərməli idi”
Ermənistan
Azərbaycan Respublikasının işğal olunmuş ərazilərinə əcnəbi vətəndaşların
qanunsuz səfərlərini təşkil edərək qondarma rejimi təşviq etməyə cəhd göstərir,
işğal altındakı ərazilərimizin maddi-mədəni irsini və təbii sərvətlərini talan
edir, iqtisadi və digər qanunsuz fəaliyyətləri həyata keçirir. Ermənistanın Azərbaycanın
işğal olunmuş ərazilərində bu kimi əməllərə cəlb etdiyi əcnəbi vətəndaşlara
münasibətdə Azərbaycan Respublikasının qanunlarına müvafiq olaraq zəruri hüquqi
addımlar atılır.
Baş Prokurorluğun
mətbuat xidmətinin rəhbəri Eldar Sultanovunverdiyi məlumata görə,Ermənistanın
Milli Elmlər Akademiyasının Molekulyar Biologiya İnstitutunun əməkdaşı Levon
Yepiskoposyan, İspaniyanın Milli Təbiət Elmi Muzeyinin tədqiqatçısı Yolanda
Fernandes Xalvo (Yolanda Fernandez-Jalvo), Böyük Britaniyanın Blanford
Muzeyinin "Azox layihəsi”nin direktoru Tanya Kinq (Tania King) və Londonda
Təbiət Tarixi Muzeyinin elmi işçisi Piter Endryusun (Peter Andrews) işğal
edilmiş ərazilərimizdə yerləşən Azıx mağarası nda 2002-ci ildən etibarən
arxeoloji qazıntı işlərini həyata keçirmələrinə, İspaniyanın Milli Təbiət
Muzeyi və həmin ölkənin Elm və Texnologiya Nazirliyinin, Böyük Britaniyanın
Qaluay Universitetinin, "Armenian General Benevolent Union”un London
filialının qazıntı işlərinə maliyyə və digər dəstək vermələrinə əsaslı şübhələr
müəyyən edildiyindən, Azərbaycan Respublikası Baş Prokurorluğunun Ağır cinayətlərə
dair işlər üzrə istintaq idarəsində Cinayət Məcəlləsinin müvafiq maddələri üzrə
cinayət işi başlanıb. Həmin fəaliyyətin Azərbaycan Respublikasının
qanunvericiliyinə və beynəlxalq humanitar hüququnun normalarına uyğunluğu
hazırda araşdırılır. İttiham üçün əsaslı şübhələr olduğundan həmin şəxslər Azərbaycan
Respublikası Cinayət Məcəlləsinin müvafiq maddələri ilə təqsirləndirilən şəxslər
qismində cəlb olunmaqla məhkəmənin qərarı əsasında həbs qətimkan tədbiri seçilərək,
barələrində beynəlxalq axtarış elan olunması üçün İnterpola müvafiq sorğu göndərilib.
Bundan
başqa, Avropa Parlamentinin üzvləri - Lüksemburq Böyük Hersoqluğunun vətəndaşı
Frank Engel, Kipr Respublikasının vətəndaşı Eleni Teoxarus və Çex
Respublikasının vətəndaşı Yaromir Ştetina "Dağlıq Qarabağ Respublikası” adı
altında yaradılmış qondarma rejimin beynəlxalq səviyyədə təbliğ edilməsi məqsədilə
kütləvi informasiya vasitələrinə verdikləri müsahibələrində, iştirak etdikləri
beynəlxalq tədbir və konfranslarda işğal altındakı ərazilərimizdə qanunsuz fəaliyyət
göstərən qurumu "müstəqil dövlət” kimi təqdim etmələrinə, Azərbaycan
Respublikasının mühafizə olunan dövlət sərhədinin nəzarət-buraxılış məntəqələrindən
kənarda dəfələrlə, xüsusən sonuncu dəfə 2017-ci il fevralın 20-də Azərbaycanın
işğal olunmuş ərazilərində keçirilmiş qondarma "referendum”da "müşahidəçi”
qismində iştirak etmək üçün keçmələrinə əsaslı şübhələr olduğundan, Azərbaycan
Respublikası Cinayət Məcəlləsinin müvafiq maddələri ilə təqsirləndirilən şəxslər
qismində cəlb olunmaqla məhkəmənin qərarı əsasında həbs qətimkan tədbiri seçilərək
barələrində beynəlxalq axtarış elan olunması üçün İnterpola müvafiq sorğu göndərilib.
Azərbaycan Respublikası öz suverenliyi və ərazi bütövlüyünün pozulması
hallarına yol verilməməsi, eləcə də vətəndaşlarının hüquq və qanuni maraqlarını
qorumaq məqsədilə bu kimi qanunazidd fəaliyyətə cəlb edilmiş əcnəbi şəxslərə
qarşı münasibətdə zəruri və qəti addımlarını bundan sonra da atacaq.
Mövzu
haqda fikirlərini bölüşən ekspertlər bildirirlər ki, Azərbaycan yenə də öz
haqlı mövqeyindədir və hər kəsdən öz ərazi bütövlüyünə qarşı hörmət tələb edir.
Bu, Azərbaycanın ən təbii haqqıdır. Millət
vəkili Fəzail İbrahimli "Kaspi”yə açıqlamasında dedi ki, prokurorluğun bu qərarını
çox haqlı və yerində verilən qərar kimi qiymətləndirir: "Bu, prinsipial
mövqedir və haqqın tələbidir. Çünki bu məsələdə Azərbaycan ədalətli tərəfdir. Və
ərazi bütövlüyünə hörməti digərlərindən də tələb edir. Bizdə yaxşı söz var,
haqq nazilər, üzülməz. Avropa parlamentariləri getsin, Avropanın problemlərilə
məşğul olsun. Burunlarını haqsız olduqları məsələlərə soxmasınlar. Faktiki, belə
bir qanunsuz məsələdə ermənilərə dəstək nümayiş etdirirlər. Onlar Avropa
demokratiyasını eybəcər tərəfdən göstərirlər. Azərbaycanın haqq işinə
avropalılar hələ ədalətli, real dəstək göstərməyiblər. Qətnamələr kağız üstündə
qalıb. Bu cür işğalı, işğalçıları dəstəkləmək, qanunsuzluğu dəstəkləməkdir”.
Millət vəkili Fərəc Quliyev də Baş Prokurorluğun qərarını təqdir etdiyini
dedi. Bildirdi ki, son vaxtlar Azərbaycan Xarici İşlər Nazirliyi ilə Baş
Prokurorluq ortaya keyfiyyətli ortaq fəaliyyət qoyur: "Azərbaycan üçün
arzuolunmaz şəxslərin siyahısının hazırlanması, müxtəlif ölkələrə nota verilməsi,
müxtəlif ölkələrin səfirliklərinə vətəndaşlarının ölkəmizə qanunsuz səfər etməsi
ilə bağlı xəbərdarlıq edilməsi və s. belə işləri XİN görür. Paralel olaraq, ərazi
bütövlüyümüzü şübhə altına almaq istəyən şəxslərə qarşı prokurorluq tərəfindən
cinayət işi açılır. Bunlar çox vacib addımlardır. Bildiyiniz kimi, Lapşin Azərbaycana
ekstradisiya olundu. Onun timsalında bir daha göstərildi ki, ölkəmizə qanunsuz
olaraq daxil olmaq, ölkəmizin maraqlarına zidd açıqlamalarla çıxış etmək,
böhtan atmaq, Azərbaycan qanunlarına hörmətsizlik etmək sonda cəzalandırılma ilə
nəticələnir. Ermənistan tərəfi də bu ekstradisiyadan çox narahat oldu. Başa
düşdü ki, Lapşin Azərbaycana təhvil verildisə, bundan sonra Ermənistan üzərindən
Azərbaycan ərazisi olan Qarabağa kənar adamların gətirilməsində xeyli məhdudiyyət
olacaq”.
Millət vəkili
qeyd etdi ki, "referendum” adlandırdıqları tamaşaya çox az sayda xarici vətəndaş
gəlmişdi. Onlar da dövlət xətti ilə gəlməmişdilər, buna özləri təşəbbüs göstərmişdilər.
Təbii ki, o adamlar haqda Azərbaycan tərəfi də öz mövqeyini nümayiş etdirməli
idi. Qalanları isə xaricdə yaşayan ermənilər idi: "Onlar diaspor nümayəndələri
idilər və fərdi xətlə gəlmişdilər. Gördüyünüz kimi, heç bir dövlət ora rəsmi xətlə
adam göndərməyib. Ora gələnlərin əksəriyyəti ermənilərdir, onların erməni
maraqlarından çıxış etmələri təəccüblü deyil. Qarabağı müstəqil respublika kimi
təqdim etmək yolunda əməllərindən qalmırlar. Həmvətənlərinə dəstək olmaq istəyirlər.
Ora gedən xaricilər isə erməni lobbiçiləri tərəfindən pulla ələ alınan şəxslərdir.
Onlar şəxsi maraqlarına görə Azərbaycan əleyhinə fəaliyyət göstərirlər. Ermənilər
sadəcə, oyun qurublar, imitasiya edirlər. Ora gedənlər pulla tutulmuş
muzdlulardır. Mənasız və heç bir hüquqa söykənməyən referendum oyununun əhəmiyyəti
ola bilməz. Ora kimlərinsə getməyi heç bir məna daşımır, çünki heç nəyi dəyişmir.
Ermənilər hazırda öz daxili auditoriyalarına təsir etməyə çalışırlar. Digər bir
məqsədləri isə prosesi bacardıqca uzatmağa çalışmaqdır”.
Şəfa Tapdıq