Norveç Krallığının səfiri ADU tələbələrinə mühazirə oxuyub - Fotolar
Azərbaycan Dillər Universitetinin (ADU)
Skandinaviya mərkəzinin təşkilatçılığı ilə Norveç Krallığının Azərbaycandakı fövqəladə
və səlahiyyətli səfiri Bard İvar Svendsen ADU-nun Regionşünaslıq və Beynəlxalq
Münasibətlər fakültəsinin Skandinaviyaşünaslıq ixtisasında təhsil alan tələbələrinə
"Norveç dili və ədəbiyyatı” mövzusunda mühazirə oxuyub. ADU-nun İnformasiya
Departamentindən "Kaspi”yə bildirilib ki, tədbirdə çıxış edən Skandinaviya mərkəzinin
baş mütəxəssisi Vüsalə Əfəndiyeva hər kəsi salamlayıb. O, səfir Bard İvar
Svendsenin maraqlı mövzuda mühazirə oxuyacağını tələbələrin diqqətinə çatdırıb.
Səfir tələbələri salamlayaraq onları tədbirdə görməkdən
məmnun olduğunu bildirib. O, Skandinav dillərindən biri olan Norveç dili barədə
məlumat verərək danışıq və yazı dillərinin bir-birindən fərqli olduğunu qeyd
edib. Səfir Bard İvar Svendsen XVI əsrdən XIX əsrə kimi Danimarka dilinin
Norveçdə istifadə olunan standart yazı
dili olduğunu söyləyib. Zamanla skandinav dilinin şərq skandinav dilinə və qərb
skandinav dilinə ayrıldığını bildirən səfir Norveç dilinin qonşu dillərin təsirindən
çıxması üçün ilk işə başlayanlardan birinin İvar Aasen olduğunu söyləyib. Səfir İvar Aasenin Norveçin fərqli yerlərini
gəzərək dialekt və ləhcələri öyrənməyə başladığını qeyd edib.
Norveç ədəbiyyatı haqqında tələbələrə məlumat verən
səfir Bard İvar Svendsen ədəbiyyatın yaranma tarixi və inkişafı barədə danışıb.
O, XIV əsrdən XIX əsrə kimi olan dövrün Norveç ədəbiyyatı üçün qaranlıq illər
olduğunu bildirib və XIX əsrdən etibarən müstəqillik mübarizəsi ilə ədəbiyyatın
yeni dövrünün başladığını sözlərinə əlavə edib. Səfir Norveç yazıçı və şairləri
haqqında danışaraq onların Norveç ədəbiyyatına verdikləri töhfələrdən də söz
açıb.
Tədbir tələbələri maraqlandıran sualların
cavablandırılması ilə başa çatıb.
Qeyd edək ki, tədbirdə ADU-nun Regionşünaslıq və
Beynəlxalq Münasibətlər fakültəsinin dekanı, dosent Anar Nağıyev də iştirak
edib.