Nəsillərə örnək ömür yolu
"Əziz
Əliyev Azərbaycan xalqının görkəmli nümayəndələrindən biridir. O, lap əvvəldən
qeyri-adi insan idi. O həm həkim, həm alim, həm də səhiyyə təşkilatçısı idi. O,
dövlət xadimi, nazir, çətin illərdə Azərbaycanın rəhbərlərindən biri, XX əsrin
ən ağır illərində Dağıstanın birinci rəhbəri idi, Moskvada, sonra isə
Azərbaycanda məsul işdə çalışmışdı. Ancaq eyni zamanda, onun həyatı heç də asan
keçmirdi, maneələrlə, çətinliklərlə, özünə qarşı edilən bir çox haqsızlıqlarla
rastlaşırdı. Amma bunların hamısını aradan qaldırır və yolundan dönmürdü”.
Görkəmli dövlət xadimi Əziz Əliyevin anadan olmasının 100 illik yubileyində ulu
öndər Heydər Əliyevin səsləndirdiyi bu fikirlər, XX əsrdə Azərbaycan xalqının
yetişdirdiyi daha bir görkəmli şəxsiyyətin həyat və fəaliyyəti ilə qürur
duymağa səsləyir. Dərin bilik və düşüncəyə, rəhbərlik etmək qabiliyyətinə,
zəngin həyat təcrübəsinə malik bir insanın ömür yolu, gerçəkdən, böyüyən
nəsillər üçün örnəkdir.
İrəvan
quberniyasından başlayan yol
Əziz Əliyev 1897-ci ilin yanvar ayında qədim
Azərbaycan torpağı olan İrəvan quberniyasının Hamamlı kəndində anadan olub. Atası
Məmmədkərim Kərbəlayi Qurbanəli oğlu kənd işləri ilə məşğul idi, anası Zəhra
xanım məşhur İrəvan taciri İbrahim bəyin qızı idi. Əziz Əliyev ilk təhsilini doğulduğu kənddə alıb. 1908-ci ildən sonra isə
Rusiyanın Çita şəhərindəki gimnaziyada oxuyub. 1914-1917-ci illərdə İrəvan kişi
gimnaziyasında təhsil alan Əziz Əliyev, bu təhsil ocağını qızıl medalla bitirir. Maddi cəhətdən təhsilini davam etdirmək üçün məktubla
Bakı milyonçusu, xeyriyyəçiHacı Zeynalabdin Tağıyevə müraciət edir və tezliklə həmin vaxt üçün kifayət qədər
dəyərli vəsait hesab olunan 300 rubl kömək alır. Elə həmin il o,Sankt-Peterburqdatələbkar alimlərin iştirakı ilə aparılan
müsabiqədən müvəffəqiyyətlə keçir və Rusiyanın ən nüfuzlu ali tibb
məktəblərindən sayılan Hərbi Tibb Akademiyasına daxil olur.
Ə.Əliyev elə birinci kursun əvvəllərindən boş
vaxtlarında Sankt-Peterburqda səpkili yatalaqla mübarizə əleyhinə təşkil
edilmiş dezinfeksiya-profilaktika briqadasına işə düzəlir. Aldığı maaşla həm
özünün minimal güzəranını təmin edir, həm də valideynlərinə yardım göstərir.
1918-ci ildə İrəvana gələn Əziz Əliyev, ailəsini
çətinliklə Naxçıvanın Şərur rayonuna gətirib, bir müddət sonra Şahtaxtı kəndinə
köçüb.
Ailənin ağır vəziyyəti və ermənilərin törətdikləri
qırğınların fəlakətli nəticələri Əziz Əliyevin Sankt-Peterburqa qayıdaraq
təhsilini davam etdirməsinə imkan verməyib. 1920-ci ilin may ayında
İrəvanda məskən salmış daşnak qoşunları şimaldan gələn bolşevik havadarlarının
birbaşa dəstəyi ilə silahlı hücuma keçərək, Şərur rayonunu, o cümlədən Şahtaxtı
kəndini yerlə yeksan edərək, amansız qırğınlar törədirlər. Qanlı qırğından
salamat çıxa bilən və didərgin düşən Şahtaxtı əhalisi, o cümlədən Əziz Əliyevin
ailəsiAraz çayını keçir və bir müddətCənubi Azərbaycanın Ərəblər kəndində yaşamalı
olurlar. Ə.Əliyev tibbi xidmətini burada da davam etdirir və həkim köməkçisi
kimi çalışaraq, əhaliyə lazımi tibbi yardımlar göstərir. Anası 1920-ci ildə
Ərəblər kəndində vəfat edir.Bir il sonra onlar Şahtaxtı kəndinə qayıda
bilir və Əziz Əliyev1923-cü
ilin may ayına qədər kənddə orta tibb işçisi, həkim köməkçisi kimi çalışır.
Bakıdan
başlayan yeni dönəm
1923-cü ilin mayında Əziz Əliyev Bakıya köçür.
Bundan sonra onun həyatının yeni mərhələsi başlayıb. Bakıda ilk vaxtlar
Azərbaycan SSR Xalq Komissarları Şurasında iş icraçısı, həmin idarənin ümumi
şöbə müdirinin müavini, katib köməkçisi və nəhayət, Xalq Komissarları Şurasının
katibi vəzifələrini icra edib. O, bu çətin və məsuliyyətli vəzifələrdə
çalışmaqla yanaşı, 1923-cü ildən etibarən yarımçıq qalmış ali tibb təhsilini
Bakı Dövlət Universitetinin tibb fakültəsində davam etdirib, 1927-ci ildə
universiteti əla qiymətlərlə bitirdiyindən daxili xəstəliklər kafedrasında
ordinator saxlanılıb. Əziz Əliyev sonra aspirant, assistent və dosent kimi
fəaliyyət göstərib, 1929-1932-ci illərdə isə Azərbaycan Klinik İnstitutunun
rektoru olub. Həmin illərdə Əziz Əliyevin rəhbərliyi altında əməkdaşlar
tərəfindən Azərbaycan dilində latın qrafikası ilə 45 adda dərslik və dərs
vəsaiti tərtib edilərək, tibb təhsili alan tələbələrin ixtiyarına verilir. Bu,
o dövrün texniki imkanları üçün çox böyük göstərici idi.
1930-1945-ci illərdə Azərbaycan Dövlət Tibb İnstitutunun əməkdaşları tərəfindən
80 adda dərslik və dərs vəsaiti nəşr olunur. Onun 55-i Əziz Əliyevin instituta
rəhbərlik etdiyi beş il ərzindəki yaradıcı və məhsuldar dövrə təsadüf edir.
Bütün fəaliyyəti dövründə tibb nəşriyyatı
yaratmağın, onu təkmilləşdirmək və inkişaf etdirməyin yolları haqqında düşünür.
O, bu sahədəki ideyalarını tədricən həyata keçirməyə başlayır və institut
kollektivinin köməyi ilə "Tibb nəşriyyatı" yaradır. Professorun
təşəbbüsü ilə ilk dəfə "Praktiki və nəzəri tibb jurnalı"nın nəşri
əsaslı surətdə təkmilləşdirilir. 1933-cü ildə o, jurnalın baş redaktoru təyin
edilir. 1933-cü ildə Əziz Əliyevin təşəbbüsü ilə Tibb İnstitutunda "Tibb
kadrları uğrunda" adlı çoxtirajlı qəzetin çapı qaydaya salınır. Hazırda bu
qəzet "Təbib" adı ilə Azərbaycan Tibb Universitetində çap
olunmaqdadır.
Ə.Əliyevin elmi fəaliyyəti çoxşaxəli idi. Görkəmli
alim 87 elmi əsərin müəllifidir. Bu əsərlərin böyük bir hissəsi təbabətin
ayrı-ayrı sahələrinə, bir qismi isə tarixi və siyasi problemlərə həsr olunub.
Səhiyyə
tarixinin bir mərhələsi
Akademik
Mustafa bəy Topçubaşov Əziz Əliyevi Azərbaycan səhiyyəsinin inkişaf tarixinin
bir mərhələsi adlandırıb. Məsul bir dövrü əhatə edən bu mərhələdə səhiyyə
sahəsində böyük və genişmiqyaslı işlər görülür, beləliklə, Azərbaycanın
səhiyyəsi dirçəlir, milli kadrların böyük dəstəsi hazırlanırdı.
Əziz
Əliyev Azərbaycanda səhiyyə işinin təşkilinə xüsusi diqqət yetirib, onun bu
sahədəki əvəzsiz xidmətləri tarixə qızıl hərflərlə həkk olunub. O, Xalq Səhiyyə
Komissarlığı müalicə şöbəsinin müdiri, Bakı Səhiyyə Şöbəsinin müdiri, Xalq
Səhiyyə Komissarlığında müavin, xalq səhiyyə komissarı və digər vəzifələrdə
çalışarkən respublikanın bütün rayonlarını gəzib, bu sahədə problemlərin aradan
qaldırılması üçün əməli tədbirlər görüb. 1930-cu ildə indiki Bakı Dövlət
Universitetinin tibb fakültəsinin bazası əsasında Azərbaycan Dövlət Tibb
İnstitutunun yaradılmasında yaxından iştirak edən Əziz Əliyev, sonrakı çətin
mərhələlərdə instituta uğurla rəhbərlik edib.
Həmin
illərdə bir tərəfdən respublikada yüksək ixtisaslı həkimlərin hazırlanmasına
ciddi ehtiyac duyulması, digər tərəfdən də onların hazırlığını təmin edə bilən
kadr çatışmazlığı, Azərbaycan dilində tibbi ədəbiyyatın və dərs vəsaitlərinin
azlığı, tədris bazalarının zəifliyi, kitab fondunun lazımi səviyyəyə
çatdırılmamağı və digər məsələlər həllini gözləyən problemlər idi. Bu
problemlərin aradan qaldırılması üçün Əziz Əliyev yorulmadan çalışıb,
azərbaycanlı kadrları işə cəlb edərək onların fəaliyyət dairəsini genişləndirib
və beləliklə, ana dilində dərsliklər, dərs vəsaitləri, monoqrafiya və
tövsiyələrin yazılmasına nail olub.
Əziz Əliyev hansı ictimai, inzibati, təşkilati işdə
çalışmasından asılı olmayaraq, elmi axtarışlarını dayandırmayıb. İnstitutu bitirəndən iki il
sonra namizədlik, daha sonra doktorluq dissertasiyalarını müdafiə edib. O,
1941-ci il mayın 13-də SSRİ Elmlər Akademiyasının Azərbaycan filialının Rəyasət
Heyəti nəzdində təşkil edilmiş Elmi Şuranın üzvü, 1956-cı ildə isə professoru
vəzifələrinə seçilib.
Əziz Əliyev İkinci Dünya müharibəsindən həm əvvəl,
həm də sonrakı illərdə Azərbaycanda səhiyyənin təşkili məsələsinə xüsusi diqqət
yetirib və onun bu sahədəki əvəzsiz xidmətləri tarixə qızıl hərflərlə həkk
olunub. O, Xalq Səhiyyə Komissarlığı müalicə şöbəsinin müdiri, Bakı səhiyyə
şöbəsinin müdiri, Xalq Səhiyyə Komissarını müavini, xalq səhiyyə komissarı
çalışarkən respublikanın bütün rayonlarını qarış-qarış gəzib, bu sahədə
problemlərin aradan qaldırılması üçün əməli tədbirlər görüb.
O, həmçinin müharibə illərində alay polkovniki rütbəsində sovet əsgərləri ilə
birlikdə siyasi rəhbər kimi Cənubi Azərbaycana yollanır.Təbrizdə,Urmiyədə,Ərdəbildə,
Mərənddə,Zəncandaolub.
Onunla gedən və mədəni-maarif işi ilə məşğul olan ziyalılardanSüleyman Rüstəm,Osman Sarıvəlli,Qılman Musayev,Ənvər Məmmədxanlı,İsrafil Nəzərov,Əhəd Bağırzadə,Qulam Məmmədli,Mehdixan Vəkilov,Cabbar Məcnunbəyov"Vətən
yolunda" qəzetinin redaksiyasında fəaliyyət göstəriblər. Əziz Əliyev
Cənubi Azərbaycandaİmran Qasımov,Rəsul Rza,Mehbalı Əmiraslanovvə
başqaları ilə yaxın təmasda olur.
Elmi-pedaqoji fəaliyyəti ilə yanaşı, görkəmli alimin ictimai
fəaliyyəti vətənə, xalqa sədaqətlə xidmətdən ibarət olub. O, Azərbaycan SSR Ali
Soveti Rəyasət Heyətinin katibi, Azərbaycan Kommunist Partiyası Mərkəzi Komitəsinin
katibi, 1942-1948-ci illərdə isə Dağıstan MSSR Vilayət Partiya Komitəsinin
birinci katibi vəzifələrində çalışaraq, özünü bacarıqlı dövlət xadimi kimi
göstərə bilib. Əziz Əliyev 1950-1951-ci illərdə Azərbaycan SSR Nazirlər Soveti
Sədrinin birinci müavini, sonrakı illərdə Azərbaycan SSR Elmi-Tədqiqat
Ortopediya və Bərpa Cərrahlığı İnstitutunun direktoru, həmçinin Azərbaycan
Dövlət Həkimləri Təkmilləşdirmə İnstitutunun rektoru vəzifələrində işləyib.
Görkəmli dövlət xadimi I-II çağırış SSRİ Ali Sovetinin, I-III çağırış
Azərbaycan SSR Ali Sovetinin, II çağırış Dağıstan MSSR Ali Sovetinin deputatı
olub. Dağıstanda işləyərkən Dağıstan ictimaiyyəti
Əziz Əliyevə üzərində onun əksi həkk olunan xüsusi medalyon bağışlayır . Həmin
medalyon hal-hazırda Azərbaycan Tarix Muzeyində saxlanılır.
İki ölkənin məhəbbəti
Görkəmli alimin,
həyat yoldaşı Leyli xanımla birgə böyütdükləri övladları vətənə layiq və sadiq
olublar. Onlar atalarının himayəsinə arxalanmadan, heç kimdən kömək gözləmədən
istedadları, bacarıqları hesabına ucalıblar və hər biri öz peşəsi sahəsində
böyük nailiyyətlər qazanıblar.
Vətən
və xalq qarşısında xidmətlərinə görə, 1960-cı ildə Əziz Əliyevə
"Azərbaycan SSR əməkdar həkimi" fəxri adı verilir. Görkəmli şəxsiyyət
dəfələrlə SSRİ-nin, Azərbaycan SSR-in və
Dağıstan MSSR-in Ali sovetlərinin deputatı olub, partiya orqanlarının tərkibinə
seçilib, iki dəfə "Lenin” ordeni, "Qırmızı Əmək Bayrağı” ordeni, bir çox dövlət
mükafatları ilə təltif edilib. Əziz Əliyevin ən böyük mükafatı isə ölkə
xalqlarının ona sonsuz məhəbbəti, Azərbaycanda və Dağıstanda
qurub-yaratdıqlarıdır.
Təranə
Məhərrəmova