Nəqliyyat sahəsinin inkişafı üçün yeni addım
Heç şübhəsiz, təyyarə ilə
səfər edənlər aeroport ərazisində fəaliyyət göstərən taksilərin xidmətindən
razılıq etmirdilər. Hava limanında taksi fəaliyyəti göstərənlərin əsas məqsədi
"yağlı müşətri” tutmaq idi ki, bunun da ziyanı sərnişinlərin çiyninə düşürdü.
Gedəcəkləri məsafə üçün dəyərindən qat-qat artıq vəsait ödəmək bir tərəfə
qalsın, üstəlik, aşağı xidmət səviyyəsi ilə də üzləşirdilər. Bu məsələdə ən
ciddi problemlə isə şübhəsiz ki, turistlər üzləşirdilər. Ölkəmizə gələn
qonaqlar üçün hava limanı ilkin təəssürat yeridir. Ancaq əgər bu turist elə
hava limanındaca hansısa taksi sürücüsü tərəfindən aldadılırsa, burda bir
nəfərin yox, bütöv bir ölkənin imicinə zərər dəyirdi. Amma deyəsən, bu sahədəki
problem həll olunmaq üzrədir.
Nəqliyyat, Rabitə və Yüksək Texnologiyalar
Nazirliyi "Bakı Taksi Xidməti” MMC Bakı şəhəri və Abşeron yarımadası ilə
yanaşı, Heydər Əliyev Beynəlxalq Aeroportundan şəhərin istənilən nöqtəsinə
təhlükəsiz, komfortlu və taksometrlə təyin edilən standart qiymətlərlə
sərnişindaşıma xidməti təşkil edir. Nazirlikdən verilən məlumata görə, xidmət
keyfiyyətinin yüksəldilməsi və təhlükəsizliyin təmin edilməsi üçün aparılan bir
sıra islahatların nəticəsi olaraq Hava Limanı ərazisində yerli sakinlərə və
turistlərə yalnız "Bakı Taksi Xidməti” MMC taksi fəaliyyəti göstərəcək. Müştərilərin
sifarişinin rahat qəbul olunması üçün aeroport daxilində məlumat stendi
quraşdırılıb. Taksilərin fəaliyyətinə nəzarət daha da gücləndirilib. Taxometer
cihazı vasitəsilə müştəri yalnız qət etdiyi məsafəyə uyğun ödəniş edir. Taksi
xidməti sahəsində ilk dəfə olaraq "Bakı Taksi Xidməti” MMC-nin sürücüləri
xüsusi uniforma ilə təmin olunub. Eyni zamanda, işə, xüsusi təlim keçmiş və
əcnəbi qonaqlarla rahat ünsiyyət qurmaq üçün dil bilgisi olan şəxslər qəbul
olunur. Yeni fəaliyyətə başlayan "1848”
Çağrı mərkəzi taksi xidmətindən istifadəni daha da rahatlaşacaq.
Fəaliyyətə başlayacaq taksi
xidmətinin növbəti mərhələdə həm turizm, həm də nəqliyyat sahəsində hansı
üstünlüklərə səbəb olacağını öyrənməyə çalışdıq.
Məsələ ilə bağlı daha geniş
məlumat əldə etmək üçün Nəqliyyat, Rabitə və Yüksək Texnologiyalar Nazirliyi
ilə əlaqə yaratdıq. Nazirliyin mətbuat xidmətindən bu kimi taksilərin
avtovağzalda, dəmiryol vağzalında da yaradılıb-yaradılmayacağını, qiymətin necə
müəyyənləşəcəyini soruşduq. Nazirlikdən, hələ ki mexanizm üzərində iş getdiyini
və daha geniş məlumatın sonra veriləcəyini dedilər.
"New ERA Travel”
turizm agentliyinin rəhbəri Elçin Rüstəmov qeyd etdi ki, təhlükəsizlik
məsələsi turistlərin önəm verdiyi ilk vacib məsələlərdən biridir: "İkinci
məsələ isə aldadılma faktlarının aradan qaldırılmasıdır. Təbii ki, bu təşəbbüsü
dəstəkləyirəm. Mövzu ilə bağlı çoxdan müzakirələr gedirdi. Sadəcə, təsdiq
olunmasını gözləyirdik. Zənnimcə, "Bakı Taksi Xidməti” MMC-nin yaradılması bu
sahədə atılacaq çox yaxşı addımdır. Mexanizmin necə işləyəcəyi isə qurumun rəsmilərinin
verəcəyi bir qərardır. Məncə, turistlərin özünü təhlükəsiz hiss etməsi,
ödəmələrin şəffaf şəkildə həyata keçirilməsi üçün vacib addımlardan biridir.
İstənilən taksi sürücüsü artıq başqa bir
qiymət uydurub deyə bilməyəcək. Bu tip şeylər ölkənin imicinə mənfi zərər
vurur. Təyyarədən düşən turist aldadılma faktı ilə üzləşir. Belə ki, 10-15
manatlıq yola 50 manat tələb olunur. Həmin turistin artıq istənilən halda, ölkə
haqqında təəssüratı mənfi olur. İlk aldandığı yerdən sonra turizmlə bağlı digər
xidmət sahələrində də aldadılacağını düşünür və bütün yerlərə tərəddüdlə
yanaşır. Əsas budur ki, "Bakı Taksi Xidməti” MMC yaradılmasa belə, aeroportda
qonaqların daşınmasına xidmət edən taksilərə nəzarət sistemi gücləndirilməlidir.
Yəni hər bir taksiyə taxometer qoyulmalıdır ki, ödəniş konkret olaraq gedilən
məsafəyə görə edilsin”.
E.Rüstəmov bu kimi
problemlərin dünyanın bir çox ölkələrində yaşandığını deyir: "Bu problemlər
qonşu Türkiyədə də səs-küyə səbəb olmuşdu. Sürücülər turistlərdən dəyərindən
qat-qat artıq məbləğdə pul alırdılar. Son nəticədə dövlət bu məsələyə qarışdı,
yəni əlavə ödəmələrin alınması üçün cərimə təyin olundu. Ondan sonra belə
halların qarşısı alındı. Turistlər
arasında sorğu keçirilən zaman da sırf onu vurğulayırlar ki, bizdən taksidə çox
pul aldılar. Ona görə, bu iş nəzarətə götürülməlidir. Digər tərəfdən taksi
sürücülərinin müəyyən dil biliklərinə yiyələnməsi də vacibdir. Beynəlxalq dil
olaraq ingilis dilini müəyyən dərəcədə bilmələri kifayətdir. Buna görə də,
onlar üçün xüsusi təlimlər təşkil edilməlidir”.
Turizm üzrə ekspert Ceyhun Aşurov deyir
ki, hava limanı hər bir ölkənin
giriş qapısıdır, orada göstərilən xidmət və çalışan insanlar dünya
standartlarına cavab verməlidir: "Taksi xidməti ilə bağlı bir çox ölkələr
problem yaşayır. Hətta bəzi Avropa ölkələrində bu məsələ hələ də problem olaraq
qalır. Amma bunun qarşısının alınması, problemlərin aradan qaldırılması daha
məqsədəuyğundur. Hava limanı hər bir ölkənin giriş qapısıdır. Orada göstərilən
xidmət və çalışan insanlar da dünya standartlarına cavab verməlidir. Belə ki, aeroportda
və onun ərazisində fəaliyyət göstərənlər xarici qonaqlarda həmin ölkə haqqında ilkin rəyi
formalaşdırırlar. Təbii ki, ilk təəssürat pis olarsa, bu, digər proseslərə də
öz təsirini göstərəcək. Bu da danılmaz faktdır ki, son dövrlər taksi xidmətləri
ilə bağlı ciddi şikayətlər vardı. Məsələn, sürücünün artıq pul alması, turistlə
nəzakətsiz olması və s. kimi problemlər sadalanırdı. Bunlar da ölkəmizin turizm
imicinə birmənalı şəkildə mənfi təsir edirdi. Hətta bu problemlər mediada da
işıqlandırılırdı. Problemlərin həlli istiqamətində bu kimi addımların atılması,
müasir standartlara cavab verən taksi xidmətinin göstərilməsi təqdirəlayiqdir.
Yəni təkcə avadanlıqların yenilənməsi ilə kifayətlənməyib, xidmət sektorunda
çalışan insanlar da müasir dövrə uyğun, müəyyən təlimlər keçməlidirlər. Düşünürəm
ki, bu addımın atılması ilə turizm sahəsində və ölkəmizin imicinin daha da
yüksəldilməsi baxımından müsbət nəticələr əldə olunacaq”.
Nəqliyyat məsələləri üzrə ekspert Ərşad Hüseynov bu
sahədə ciddi pərakəndəliyin olduğunu düşünür: "Ölkənin bütün girişlərində,
avtovağzalda, dəmiryolu vağzalında, o cümlədən bütün nəqliyyat qovşaqlarında
xidmətlərin müasir və keyfiyyətli, təhlükəsizlik şəkildə göstərilməsi təmin
edilməlidir. Bu sahədə ciddi pərakəndəlik vardı. Fikir versəniz, bu sferada istifadəyə
yararsız olan bir çox avtomobilləri, həmçinin işini qeyri-peşəkar şəkildə
yerinə yetirən sürücüləri görmək olar. Bütün bunlar ölkənin nəqliyyat sisteminə
mənfi təsir edən amillərdir. Hətta müştərilərlə davranışda belə ciddi
problemlər mövcuddur. Bu kimi nüansları sivil qaydada, mədəni şəkildə
tənzimləmək lazımdır”.
Günel
Azadə