• cümə, 29 Mart, 01:59
  • Baku Bakı 7°C

Nəqliyyat naziri yeni obyektlərin tez sıradan çıxmasından narahatdır

14.01.14 14:10 1401
Nəqliyyat naziri yeni obyektlərin tez sıradan çıxmasından narahatdır
Bu gün Nəqliyyat Nazirliyində müşavirə keçirilib. İclasda avtomobil yollarının mövcud vəziyyəti və qarşıda duran vəzifələr müzakirə edilib.
«APA-Economics»in Nazirliyin mətbuat xidmətinə istinadən verdiyi məlumata görə, nazir işlərin keyfiyyətinə və vaxtında icra olunmasına təsir göstərən, eləcə də istismara verilən obyektlərin vaxtından tez sıradan çıxmasına səbəb olan amillərdən narahatlığını bildirib, yol layihələrinin icrasına kifayət qədər maliyyə vəsaitinin ayrılmasına baxmayaraq, onların yerinə yetirilməsində gecikmələrə yol verildiyini, yol-istismar idarələri tərəfindən xidmət göstərdikləri sahələrdə yolların saxlanılmasının qeyri-qənaətbəxş vəziyyətindən danışıb. Z.Məmmədov bir sıra hallarda icra intizamının aşağı səviyyədə olmasını, bu sahədə ciddi tədbirlər görülməsi ilə bağlı müvafiq tapşırıqlar verib.
Nəqliyyat naziri qeyd edib ki, ümumi istifadədə olan avtomobil yollarının mühafizə zolağında, bəzənsə bilavasitə yolların kənarındakı qanunsuz obyektlərin kənarlaşdırılması işləri zəif aparılır, yolların hərəkət hissəsində kənar təşkilatlar tərəfindən qazılma halları mövcuddur və bu bilavasitə «Azəryolservis» ASC-nin Yolların Mühafizə Xidməti İdarəsinin zəif fəaliyyətinin nəticəsidir.
Z.Məmmədov podratçı və subpodratçı təşkilatlarla, layihə-nəzarət qrupları ilə müqavilələrin bir daha nəzərdən keçirilməsi, keyfiyyət və təhlükəsizlik baxımından müqavilə şərtlərinin daha da sərtləşdirilməsi, gələcəkdə icra olunacaq yol layihələrində yalnız yüksək peşəkarlıqlı şirkətlərə üstünlük verilməsi məsələlərinə də toxunub və bütün bunların yenidən araşdırılaraq müvafiq qərarlar qəbul edilməsi ilə bağlı konkret tapşırıqlar verib.
Nəqliyyat naziri yol infrastrukturunun inkişafı üzrə müəyyən edilmiş tədbirlərin, Bakı-Ələt-Astara-İran dövlət sərhədi avtomobil yolunda aparılan işlərin son durumu, Muğanlı-Yevlax avtomobil yolu istiqamətindəki vəziyyət, o cümlədən Bakı şəhərində müxtəlif səviyyəli yol qovşaqlarının tikintisi, avtomobil yolları şəbəkəsinin təkmilləşdirilməsi və yenidən qurulması, qəsəbə və kənd əraziləri də daxil olmaqla yolların, prospektlərin və küçələrin asfaltlaşdırılması, ümumi istifadədə olan ölkə əhəmiyyətli avtomobil yollarının reabilitasiyası və yenidən qurulması üzrə Nəqliyyat Nazirliyinə həvalə olunmuş işlərin icrası ilə bağlı ciddi xəbərdarlıq edib və aidiyyəti qurumlara müvafiq tapşırıqlar verib.
banner

Oxşar Xəbərlər