Bakı 23°C
Nəinki Qazaxıstan, bütövlükdə Orta Asiya turistləri yollarını Azərbaycandan sala bilərlər
Son
zamanlar qeyri-neft sektoruna diqqət artıb. Xüsusilə də, turizmin inkişafına
həm dövlət, həm də özəl sektorun marağı böyükdür. Belə ki, turizm sahəsi hər
bir ölkə üçün ən dinamik inkişaf edən sahələrdən biri sayılır və inkişafı
istiqamətində ardıcıl olaraq addımlar atılır. Xüsusilə də turizm sahəsində
beynəlxalq forumların, sərgilərin keçirilməsi bu sahənin kifayət qədər diqqət
mərkəzində olduğunun göstəricisidir. Turizmlə bağlı sərgilər və forumlar həm
ölkəmizdə, həm də xaricdə baş tutur. Keçirilən tədbirlərdə fəal iştirakımız, Azərbaycana
turist axınını təmin edir. Aprelin 15-də Almatıdakı
"Kazjol" otelində II Qazaxıstan-Azərbaycan turizm forumu keçirilib. Tədbir,
Azərbaycanın Qazaxıstandakı səfirliyi və "Milli şirkət "Kazakh
Tourism" Səhmdar Cəmiyyətinin dəstəyi ilə keçirilir. Forum çərçivəsində
Qazaxıstan və Azərbaycanın turizm sahəsində əməkdaşlıq perspektivlərinin
müzakirəsi, iki ölkənin turizm imkanlarının təqdimatının keçirilməsi
planlaşdırılır. Forumda həmçinin iki ölkənin biznes dairələrinin qeyri-formal
"B2B" formatında danışıqları nəzərdə tutulub.
Qazaxıstanda keçirilən
forumun Azərbaycan turizminin inkişafı üçün nələr vəd etdiyini, Qazaxıstanlı
turistlərin hansı turizm sahəsinə maraq göstərdiklərini və onların ölkəmizə
cəlb edilməsi üçün hansı addımların atıla biləcəyini öyrənməyə çalışdıq.
Azərbaycan Turizm Assosiasiyasının icraçı direktoru Əhməd
Qurbanov qeyd etdi ki, Qazaxıstan və Azərbaycan
arasında turizm sahəsində hər zaman qarşılıqlı əməkdaşlıqlar olub, indi də bu
əlaqələr daha geniş səpkidə davam etdirilir: "Azərbaycan həmişə Qazaxıstanlı
turistlərin maraq dairəsində olub. Hər ölkənin turistlərinin fərqli seçimi
olur. Məsələn, ölkəmizə gələn ərəb turistləri daha çox şəhər həyatına maraq
göstərirdilər, tarixi yerlərə getmək, abidələri ziyarət etmək onların istəkləri
arasında yox idi. Qazaxıstanlı turistlərin də xüsusi seçimləri var. Onların
müraciətlərinin əsas hissəsi sağlamlıq turizmi ilə bağlı olur. Ölkəmizdə
fəaliyyət göstərən Naftalan, İstisu, Duzdağ və. s kimi müalicəvi yerlərə daha
çox gedirlər. Yəni qazaxlar istər Azərbaycana gələndə, istər başqa ölkəyə
gedəndə həmin yerin tibbi turizm ilə xüsusi olaraq maraqlanırlar. Azərbaycan
Turizm Assosiasiyasının keçən il Qazaxıstanda sərgisi oldu. Həmin sərgidə də
əyani şəkildə şahidi olduq ki, sağlamlıq turizmi onlara necə maraqlı gəlir.
Daha çox bu sahə ilə bağlı suallar verir, ölkəmizin bu sahədəki fəaliyyətini
araşdırırdılar. Ona görə, düşünürəm ki, Qazaxıstanlı turistləri cəlb etmək üçün
böyük promo-kampaniyalar keçirmək, sərgilər təşkil etmək və həmin sərgilərdə
aktiv iştirak etmək lazımdır. Ölkəmizdəki turizm imkanları haqqında nə qədər
çox məlumat versək, bir o qədər çox turist cəlb etmək şansımız olar. Burada
əsas iş, yerli turizm şirkətlərinin üzərinə düşür. Bundan başqa, aviabiletlərin
satışında da müəyyən addımlar atmaqla, Qazaxıstanlı turistlərini yolunu
ölkəmizdən salmaq olar. Belə ki, biletlərin satışını kompaniyalı şəkildə həyata
keçirsək, düşünürəm ki, daha çox turist cəlb edə bilərik”.
"Luna
travel” turizm şirkətinin rəhbəri Rəhman Quliyev deyir
ki, Azərbaycana turist axının mütəmadi olmasını istəyiriksə, bazarı və
xidmətləri genişləndirməliyik: "Nəinki Qazaxıstan, Orta Asiya ölkələrini
tək-tək fəth etmək lazımdır. Dünyada iqtisadi rəqabətin getdiyi dövrdə, bütün
ölkələr iqtisadi artımın böyük hissəsini turizmdən əldə edir. Bu hal bizdə niyə
baş verməsin? Xüsusilə də ölkəmizdə bunun üçün hər cür şərait var. Turizmin
istənilən sahəsinin inkişafı üçün imkanlar yaradılıb. Sağlamlıq turizmindən
tutmuş, ekoturizmə, çimərlik turizminə kimi bütün imkanlarımız var. Bu sahədə
heç də qonşu ölkələrdən geri qalmırıq. Hətta deyərdim ki, bəzi sahələrdə
üstünük. Azərbaycanın yerləşdiyi coğrafi mövqe, iqlimi, təbiəti bütün dünya
turistləri üçün cəlbedici xarakter daşıyır. Bu sadaladıqlarım açıq şəkildə
imkan verir ki, biz turizm bazarımızı genişləndirək. Qazaxıstan bizim üçün
olduqca perspektivli bazardır. Qazaxıstan nüfuz sayı baxımından da digər Orta
Asiya ölkələri ilə müqayisədə böyük dövlətdir. Qazaxıstanlı turistlərin
seçimləri arasında Türkiyə daha çox yer alırdı. Lakin son dönəmlər turizm
sahəsində atılan addımlar və müşahidə olunan inkişaf sayəsində Azərbaycan da
seçimlər arasına daxil olub. İstənilən ölkədən turizm axınını təmin etmək
istəyiriksə, təbliğat, təşviqat, tanıtım işinə önəm verməliyik. Xarici ölkələrdə
keçirilən beynəlxalq sərgilərdə iştirak etməli, turizm potensialımızı maksimum
dərəcədə ortaya qoymağa çalışmalıyıq”.
R. Quliyevdən Qazaxıstanlı
turistlərin daha çox hansı turizm növünə üstünlük verdiklərini soruşduq:
"Ölkəmizə fərqli ölkələrdən turistlər gəldiyi üçün seçimlər də müxtəlif olur.
Məsələn, bu günə olan təcrübəyə əsasən deyə bilərəm ki, qazax turistləri dəniz
turizminə daha çox üstünlük verirlər. Təbii ki, bunu yüzdə yüz bütün qazaxıstanlı
turistlərə aid etmək olmaz. Turist hansı ölkəyə səyahət edirsə, çalışır ki,
həmin ölkənin bir çox turizm növü ilə tanış olsun. Qazaxıstanlılar da həmçinin,
onlar əsasən dəniz turizminə daha çox maraq göstərsələr də, bütün turizm növləri
ilə tanış olurlar”.
Günel Azadə
