Neftin qiymətini artıran əsas səbəblər
Bu
günlərdə dünya birjalarında neftin qiyməti yenə artan xətlə davam edir. Nyu-Yorkun
NYMEX əmtəə birjasında keçirilən elektron ticarət əməliyyatlarının gedişində
WTI neftinin qiyməti 1 barrelə görə 1,49 dollar və ya 2,16% artaraq 70,55
dollar təşkil edib. ICE London qitələrarası birjasında Brent markalı neftin 1
barrelinin dəyəri isə 1,77 dollar ya 2,36% artaraq 76,62 dollar təşkil
edib. ABŞ-ın Enerji İnformasiya Administrasiyasının (EIA) aylıq hesabatında isə
"Brent” markalı xam neftin bir barrelinin bu il üçün orta qiyməti 71 dollar
olacağı qeyd edilir. Belə ki, hesabata görə, "Brent” markalı xam neftin bir barrelinin
orta qiymətinin bu il 71 dollar, 2019-cu ildə 66 dollar səviyyəsində olacağı
nəzərdə tutulur. Qərbi Texas növü "Light” markalı xam neftin bir barrelinin
orta qiyməti cari ildə 66 dollar, gələn il isə 61 dollar səviyyəsində olacaq. "Brent”
və "Light”ın qiymətinə dair bu proqnozlar EIA-nın əvvəlki hesabatındakı
proqnozlarla müqayisədə bu il üzrə 7 dollar/barrel, gələn il üzrə 3
dollar/barrel çoxdur. EIA-ya görə, "qara qızıl”ın qiymətinə dair proqnozun
artması Neft İxrac edən Ölkələr Təşkilatı (OPEC) və bəzi qeyri-OPEC ölkələri
ilə 2017-ci ilin yanvarından bu yana tətbiq edilən neft hasilatının azaldılması
üzrə razılaşma sayəsində, indiyədək qlobal neft ehtiyatlarının gündəlik orta
hesabla 0,5 milyon barrel azalmasıdır. İrana qarşı yenidən sanksiyalar tətbiq
olunacağı təqdirdə, bu ölkənin xam neft istehsalı azalacaq. Qlobal neft
tələbatının artmağa başlaması isə "qara qızıl”ın qiyməti üzərində yuxarı
istiqamətli təzyiq meydana gətirir.
Gəlirlərinin böyük hissəsinin neftdən asılı olan ölkələr üçün artım
tempi hər zaman müsbət qiymətləndirilir. Bu ölkələr arasında Azərbaycan da
daxildir. Bəs görəsən bu qiymət artımı nə qədər davam edəcək? Ümumiyyətlə, qiymət
artımının səbəbləri nədir?
Mövzu ilə
bağlı suallarımızı "Neft Araşdırmaları Mərkəzi”nin rəhbəri,
enerji məsələləri üzrə ekspertİlham Şabana ünvanladıq. Ekspert qiymət artımı
haqda bir sıra məqamları qeyd etdi: "Mayın 8-də Tramp gücləndirilmiş
sanksiyaların tətbiqi ilə bağlı sənəd imzaladıqdan sonra neftin qiyməti 78
dollara qədər artıb. İki gün ərzində qiymətlərdə təqribən 2,5 dollar artım
müşahidə olunub. Əslində bu, gözlənilən idi. Çünki İran kimi OPEC-də və neft
bazarında özünəməxsus bir mövqeyi olan ölkə yenidən ABŞ kimi ölkənin
sanksiyalarına tuş gəlirsə, bu fakt regiona və dünyaya ciddi təsir etməli idi.
Bu məsələyə birjalar da hazırda adekvat
reaksiya verməkdədir. Hələlik birjalarda qırmızı xəbərlər gözə dəyir. Ona görə
də neftin qiyməti artıma doğru gedir. Hesab edirəm ki, qiymətlərdəki artım şoku
bir müddət davam edəcək. Amma rəqəmlərin daha yüksək həddə, yəni 90 dollaradək
artması üçün bu, yetərli deyil. Əgər İran da ABŞ-a qarşı kəskin reaksiya versə
və ABŞ-ın sanksiyalarına digər ölkələr və Avropa da qatılsaydı, bu hal baş
tutardı. Həmçinin, İsraillə İran arasında və ya Suriyada yenidən hərbi münaqişə
davam etsəydi, qısa müddət ərzində neftin qiyməti 90 dollaradək arta bilərdi. Amma hələlik bunların heç birini müşahidə
etmirik. Hazırda təkcə ABŞ və İran arasında gərginlik müşahidə olunur. İran isə
özünü təmkinli aparır. Digər ölkələr də bu sazişdən çıxmadı. Proseslərin
fonunda, İsrail də çox maraqlı gediş etdi. İranın faktiki müttəfiqi olan Rusiyadan
regionda təhlükəsizliklə bağlı qarantiya istədi. Belə olan təqdirdə, düşünürəm
ki, neftin qiymətinin kəskin şəkildə artması davam etsin. Ola bilsin ki,
qiymətlər 70 dollardan da aşağı düşsün”.
Ekspert
bildirdi ki, qiymətlərin 70-75 dollar həddini keçməsi üçün isə bu cür siyasi
risklərin olacağı hələ apreldən bəlli idi: "Bu informasiyalar isə hələ aprel
ayından başlayaraq qiymətləri getdikcə artırırdı. Səudiyyə Ərəbistanı ABŞ-ın bu
addımını dəstəklədi və bu da anlaşılan idi. Çünki Səudiyyə ilə İran arasında
əzəli qarşıdurma var və bu fakt regionda vəziyyəti gərginləşdirən amillərdən
biridir. Qiymətlərə gəldikdə isə hələ ilin birinci rübündə neftin qiyməti 67
dollar idi. 4 ayın nəticələrinə əsasən, brent markalı neftin orta qiyməti 68,5
dollara qədər yüksəldi. May ayı başlayandan isə qiymətlər 70 dollar həddini
keçdi. Bu ayın ilk ongünlüyünə əsasən qiymətlər kifayət qədər yüksək
qiymətləndirilib. May ayı ərzində orta qiymətin 70 dollardan yuxarı olacağı
gözlənilir. Belə olan təqdirdə, proseslər neftin orta qiymətinin artımına
gətirib çıxaracaq. Ümumilikdə isə cari il üçün proqnozlara yenidən
baxılmalıdır. Çünki ilin əvvəlində proqnozlar orta qiymətin 62-63 dollar
olacağını söyləyirdi. Hətta ötən ilin sonunda bu rəqəmin 57 olacağı qeyd olunsa
da, artıq qiymətlər iki dəfə korrektə edilib. Korrektədən sonra beynəlxalq
enerji agentlikləri və maliyyə institutlarının qiymətləri 65-66 dollar proqnoz
edəcəyi gözlənilir. Adətən ilin ikinci yarısı üçün proqnozlar qiymətlərin aşağı
düşəcəyini göstərir. Bu, əslində bir neçə faktordan asılı olan məsələdir. Ona
görə də əvvəlcədən dəqiq proqnoz vermək mümkün deyil. Məsələn, siyasi
faktorların necə dəyişəcəyini və bunun qiymətlərə nə dərəcədə təsir edəcəyini bilmək olmur”.
Şəbnəm Mehdizadə