Neftin qiymətindəki sabitliyin və artım tendensiyasının səbəbləri
Dünya
birjalarında neftin qiyməti müxtəlif istiqamətdə dəyişir. Fins.az xəbər verir
ki, Nyu-Yorkun NYMEX əmtəə birjasında keçirilən elektron ticarət
əməliyyatlarının gedişində WTI neftinin qiyməti 1 barelə görə 0,07 dollar və ya
0,12% azalaraq 58,29 dollar təşkil edib.ICE London
qitələrarası birjasında Brent markalı neftin 1 barelinin dəyəri isə 0,03 dollar
və ya 0,05% artaraq 64,93 dollar olub.Ümumiyyətlə,
uzun müddətdir ki, neftin qiyməti 65
dollar civarında dövr edir. Mövcud
tendensiya gələn il də davam edə bilərmi?
Neft Araşdırmaları Mərkəzinin rəhbəri, enerji məsələləri üzrə
ekspertİlham Şaban"Kaspi”yə
açıqlamasında bildirdi ki, qiymət artımına müxtəlif amillər təsir edir: "Əgər
biz ötən həftənin trendinə baxsaq, neftin qiymətinin 63-65 dollar arasında var-gəl
etdiyini görə bilərik. Bu da müxtəlif
səbəblərdən irəli gəlir. Belə ki, ötən həftənin ortasında Amerikada neft ehtiyatları
ilə bağlı məlumat dərc edildi. Məlumatın dərc edilməsindən dərhal sonra
qiymətlər 65 dollar həddinə çatdı. Hazırda bazarda müxtəlif tendensiyalar baş
verir. Qiymətlərdə gah bir dollardan artıq enmələr, gah da artımlar olur.
Nəticə etibarilə isə dekabr ayı üzrə
orta qiymət 63 dollar hesab olunur. Bu, dördüncü rüb ərzində və cari il üçün ən yüksək orta qiymət hesab
olunur. Əgər dördüncü rübün ilk ayı olan oktyabrda Brent markalı neftin orta
qiyməti 57 dollar idisə, artıq ilin sonuncu ayında 6 dollar artım müşahidə
edilir. İlin əvvəlinə nəzər salsaq, görərik ki, yanvar ayında orta qiymət cəmi
53 dollar olub. İlin əvvəli ilə sonundakı orta qiyməti müqayisə etsək, 10
dollar artım var. Bu, kifayət qədər yüksək bir nəticədir. Hesab edirəm ki, bu artımda
əsas rol oynayan fakt, sözsüz ki, OPEC
və onu dəstəkləyən ölkələrin atdığı addımlar - dünya bazarında hasilatın 1,8
milyon barrel aşağı salınması oldu. Bunun
nəticəsində ehtiyatlar azalır, tələb-təklif arasında olan münasibətlərdə
tarazlıq yaranır. İndiyə kimi bu tarazlıq yox idi. Məhz 2017-ci ildə OPEC və
qeyri-OPEC ölkələri arasında olan razılaşma və onların ortaya qoyduğu mövqe
bazarda tənzimləmə rolunu oynadı. Hesab etmirəm ki, yaxın dövr üçün bazarda hər
hansı bir yeni sıçrayış - artım və ya azalma tendensiyasına keçid olsun. Vyana
konqresində qəbul edilən qərara əsasən, 2018-ci ilin sonuna qədər bu tendensiya
davamlı olacaq. Əvvəlki dövrlərdən fərqli olaraq, 2018-ci ildə monitorinq
komitəsi fəallığını daha da artıracaq. Hər bir ölkənin üzərinə qoyulan öhdəliyə
necə əməl etməsi, həm hasilat, həm də ixrac məsələləri ilə bağlı kvotaların yerinə yetirilməsi çox mühümdür. OPEC-in əsas
məqsədi həmin ölkələri bu kvotalardan yayınmamağa və bunun çərçivəsində öz
hasilat və ixracatını davam etdirməyinə sövq etməkdir. İqtisadiyyatı neftdən
asılı olan ölkələr gördülər ki, əlbir olub öz mövqelərini ortaya qoyandan sonra
gəlir əldə edirlər. Çünki bazara gündəlik hasilatı milyonlarla barrel artırmaq
və bir-birinin bəhsinə girmək heç kimin xeyrinə deyil. Təkcə Rusiya hasilatın azaldılmasından sonra
2016-cı illə müqayisədə 50 milyard dollar əlavə gəlir qazanıb. Ədalətli neft
qiymətlərinin bərqərar olması üçün Azərbaycan da maraqlı olduğunu bildirdi.
Bəziləri bu addımı hətta qınasa da, ədalətli qiymət bərqərar olduqdan sonra Azərbaycan da bunun
faydasını görür. Baxmayaraq ki, bizdə neft hasilatı faiz etibarilə digər
ölkələrlə müqayisədə kifayət qədər azalıb. Ancaq Azərbaycanın qazandığı mənfəət
bir milyarddan artıq oldu. Bunları da mütləq nəzərə almaq lazımdır”
Ekspert
bəzi məqamları da qeyd etdi: "İŞİD faktoru beş ildən çoxdur ki, gündəmdədir. Terror
təşkilatının fəaliyyət göstərdiyi coğrafi ərazi əsasən Yaxı Şərqdir. Amma biz gördük bu beş il ərzində qiymətlərin
100 dollardan yuxarı qalxması və aşağı düşməsi, sıçrayışlar etməsi İŞİD-in
fəallığı ilə bağlı olmayıb. Məsələn, cari ilin oktyabr ayında qiymətlərdə də sıçrayış oldu və bu amil iki
həftədən artıq davam etdi. Ancaq burada əsas səbəb Kürdüstanın öz müstəqilliyini elan etdikdən
sonra Kərkük-Ceyhan boru kəmərinin dayandırılması idi. Yəni orada İŞİD faktoru
rol oynamırdı. Hətta bu beş ildə İŞİD-lə bağlı informasiyalar birjaların qaynar
xəttinə gəldikdə belə, bazar heç bir təsiri olmurdu. Olsa belə, bu, çox qısa müddətli təsir idi”.
Milli Məclisin İqtisadi Siyasət, Sənaye və Sahibkarlıq
komitəsinin üzvü, millət vəkili Aydın Hüseynov isə deyir
ki, Yaxın Şərqdə baş verən proseslər neftin qiymət artımına kəskin təsir
göstərən faktorlardandır: "Bu günə kimi İŞİD-in təsiri altında olan bölgələrə neft çox
ucuz qiymətə çıxarılıb satılırdı. İndi isə artıq sözügedən zonada stabilləşmə
gedir. Yəni ümumilikdə götürsək, Yaxın Şərqdə gedən tendensiyalar neftin
qiymətinə birbaşa təsir göstərir. Artıq orada stabilləşmə gedir deyə, bu da qiymət
artımına təsir edir. Eyni zamanda OPEC
artıq dünya bazarında neftin qiymətinin balanslaşmasında maraqlı tərəf kimi, qiymətlərə
öz təsirini göstərir. OPEC-in balanslaşdırma siyasəti və Yaxın Şərqdə gedən proseslər
qiymət artımının əsas faktorlarıdır. Hələ qiymətlər kəskin ucuzlaşanda da
iqtisadçılar deyirdi ki, bu, neftin real
dəyərindən dəfələrlə aşağıdır. Bütün proqnozlar onu göstərir ki, bir barrelin
qiyməti 70 dollar ətrafında müəyyənləşməlidir. Yəni gələn il də bu tendensiya
davam də bilər”.
Şəbnəm Mehdizadə