Neftin qiyməti qalxacaq?
Əlcəzairdə Neft İxrac edən Ölkələr Təşkilatına
(OPEC) üzv olan və olmayan ölkələrin toplantısında neft hasilatının məhdudlaşdırılması
barədə razılığa gəlinib. Fins.az xəbər verir ki, bu barədə mənbələrinə istinadən
Reuters agentliyi məlumat yayıb. Məlumata görə, OPEC ölkələri neft hasilatının
gündəlik 33,24 milyon barreldən 32,5 milyon barrel səviyyəsinə qədər məhdudlaşdırılması
(azaldılması) barədə razılığa gəliblər.Bu qərar, neft hasilatının gündəlik 740,000 barel
azaldılması anlamına gəlir. OPEC ölkələri razılığa qoşulmaq təklifi ilə digər
ölkələrə müraciət etmək niyyətindədirlər. Yeni saziş noyabr ayında qüvvəyə minməlidir.
Bu fonda, Brent markalı neftin qiyməti 6%-ə yaxın artaraq 48,64 dollara çatıb.
Qərar hələ ictimaiyyətə rəsmən elan edilməyib. Neft hasilatının məhdudlaşdırılması
barədə qərar Əlcəzairdə qapalı görüşdə qəbul olunub. OPEC son səkkiz ildə ilk dəfə
istehsalı azaltmağa gedir. Beləliklə, Səudiyyə Ərəbistanı və İranın 2014-ci ildən
bu yana davam etdirilən "istədiyin qədər istehsal et" yanaşmasının
davam edəcəyini düşünən investorlar pis vəziyyətdə qaldılar.Qeyri-rəsmi də olsa əldə olunan bu razılıq neftin
qiymətinə dərhal öz müsbət təsirini göstərmiş oldu. Bəs görəsən. bu qərar rəsmi
olaraq öz təsdiqini tapacaqmı? Noyabr ayında keçiriləcək Vyana görüşü nələri vəd
edir?
İqtisadçı ekspert Pərviz Heydərovunfikrincə, qərar qəbul olunsa belə, onun icrası yalnız gələn ildən həyata
keçirilə bilər: "Hasilatın dondurulması və yaxud azaldılması haqda söhbətlər
bununla bir neçənci dəfədir ki, dövriyyəyə buraxılır. Ancaq məlum olduğu kimi,
hələ ki real heç bir addım atılmayıb və müvafiq qərar qəbul olunmayıb. Bu dəfə
isə məsələ nisbətən real görünür. Lakin qərar qəbul edilmiş olsa belə, bunun
icrası gələn ildən tez baş tutmayacaq. Çünki burada razılaşdırılası bir çox məqamlar
var. Belə ki, neftin dünya bazarlarındakı bu günki qiymətlərindən hər bir
hasilatçı ölkə zərər çəksə də, onların hər birinin öz iqtisadi və siyasi maraq,
mənafe və məqsədləri var. Məsələn, Səudiyyə Ərəbistanı ilə İran arasında
münasibətlər elədir ki, onların ortaq məxrəcə gəlmələri heç bir halda mümkün
görünmür. Bunu OPEC-in sözügedən qərarına Tehranın nümayiş etdirdiyi reaksiya
da sübut edir. Odur ki, konkret nəsə fikir irəli sürmək və proqnoz vermək hələ
tezdir. Digər bir məsələ isə ondan ibarətdir ki, lap tutaq ki, OPEC üzvləri nəhayət
ki, yekun bir qərara, vahid bir mövqeyə gəldilər, hasilatın azalması ilə təklif
məhdudlaşacaqmı? Fikrimcə yox. Çünki qiymət bahalaşan kimi, ABŞ-da şist neft
hasilatı sənayesi dirçələcək. Artıq orada bunun ilkin simptomları nəzərə çarpmaqdadır.
Belə ki, bir ara qiymətlər üzü aşağı doğru gedərkən, ABŞ-da aktiv neft
quyularının sayı sürətlə azalırdı. Amma neçə müddətdir dünya bazarlarında
neftin 1 barelinin qiyməti 40-45 dollar ətrafındadır. Və ABŞ-da aktiv neft
quyularının sayının azalması prosesi də dayanıb”.
İqtisadçının
fikrincə, hələlik söhbət bazara olan psixoloji təzyiqlərdən gedir və hasilatla
bağlı qəbul edilən heç bir qərar qiymətlərə ciddi təsir göstərə bilməyəcək:
"Ümumiyyətlə, qiymətlər 50 dollardan yuxarı qalxarsa, neft hasilatı genişlənəcək.
Bu isə təklifin daralmasının qarşısını
alacaq. Bundan əlavə, unutmaq lazım deyil ki, neftin dünya bazar qiymətlərinə təsir
etmək üçün ABŞ-ın əlində başqa alət də var. Bu da
dolların kursudur. Federal Ehtiyat Sistemi (FED) baza faiz dərəcəsini artırsa,
dollar möhkəmlənəcək. Bu isə avtomotik olaraq neftin qiymətini aşağı salacaq. Təsadüfi
deyil ki, hər dəfə neft hasilatçısı olan ölkələr bir yerə yığışıb hasilatı
aşağı salmaq və yaxud da dondurmaq haqda bu və ya digər müzakirələr aparmaq istəyərkən,
Canet Yellen (FED-in rəhbəri – red.) dərhal uçot dərəcəsinin artırılacağı haqda
çıxışlar edir. Ona görə də mənim fikrim belədir ki, neft bazarında hələlik
yalnız psixoloji təsirlərdən söhbət gedə bilər. Real olaraq, hasilatla bağlı
heç bir qərar qiymətlərə ciddi şəkildə təsir etməyəcək”.
"Neft Araşdırmaları
Mərkəzi”nin rəhbəri İlham Şaban deyir
ki, OPEC hasilatın
azaldılması ilə bağlı yekun qərarını və ölkələr üzrə yeni kvotaların
bölüşdürülməsi cədvəlini cari il noyabrın 30-da Vyanada keçiriləcək rəsmi
sessiyasında təsdiqləməlidir: "Qərar isə gələn ilin əvvəlindən qüvvəyə minməlidir.
Əlcəzairdə əldə edilən razılaşma əslində
bazarın bu müddətdə "qızdırılması" üçün atılan yaxşı bir addımdır.
Qarşıdakı iki ay birjalara təsiredici amil kimi OPEC ölkələrinin aparıcı neft
hasilatçılarının kvotalarını nə qədər aşağı salması ilə bağlı müzakirələrə sərf
olunacaq və hər bir yeni açıqlanan rəqəm neft qiymətlərinin artıb-azalması və
sonra korreksiyası ilə müşahidə olunacaq”.
İ.Şaban deyir ki, bundan ən çox qazanc götürən
treyderlər olacaq: "Çünki bazarda dəyişkənlik amplitudası nə qədər yüksək
olarsa, bir o qədər çox qazanca ümid etmək olar. Bir sözlə, neft bazarı qızışma
dövrü ərəfəsindədir, ancaq bu qızışmanın məqsədi hələ ki 50 dollar baryerini
aşmaq və mövqeləri bu diapazonda bərkitməkdir. 55 həddi bu günün prizmasından
baxanda, horizontda tutqun havadakı yanıb-sönən mayaka bənzəyir. Çünki 2017-ci
il üçün dünya iqtisadiyyatının real vəziyyəti ilə bağlı mənzərə heç də ürəkaçan
proqnozlarla ifadə olunmur”.
Ekspert qeyd etdi ki, Əlcəzair
görüşündə əldə olunan razılaşma artıq həm Səudiyyə Ərəbistanı, həm də İranın
OPEC ölkəsi olaraq bu razılaşmanın tərkib hissəsi kimi çıxış etməsi deməkdir:
"Yəni hər iki tərəf kvotanın azaldılmasında iştirak edəcək. Noyabr ayının 9-da
OPEC ölkələrinin Vyana görüşündə 2017-ci ildən hər bir ölkənin hansı kvota ilə
neft hasil edəcəyi bəlli olacaq. Bu
razılaşma müsbət istiqamətdə olduğuna görə, bazara da pozitiv siqnallar göndərmiş
oldu. Nəticədə bir gün ərzində neftin qiyməti 46 dollardan 48.5-49 dollara qədər
qalxdı. Əks təqdirdə, belə bir artımdan söhbət gedə bilməzdi.
Qərarın rəsmi olaraq öz təsdiqini tapması və
reallaşması zamana bağlı olan bir şeydir. İlin sonuna kimi müxtəlif bəyanatlar
səsləndiriləcək. Bazar iştirakçılarının əsas
marağı kvotanın azalmasında hansı ölkəyə nə qədər payın düşməsi məsələsidir.
Mühüm məqamlardan biri də kvotanın azalmasında əsas yükü hansı ölkənin öz üzərinə
götürməsidir. Bundan başqa, bəzi ölkələr
götürdüyü öhdəlikdən də boyun qaçıra bilərlər ki,bu kimi amillər mütəmadi
olaraq mətbuatda yayıldıqca, bazarda qiymətlər artıb-azalacaq. Ancaq əsas məsələ
odur ki, gələn il hasilat haqqında hesabatdakı rəqəmlər reallıqla üst-üstə düşməsə,
neftin qiyməti ucuzlaşa bilər”.
Şəbnəm
Mehdizadə