Nə yoğurdu, nə yapdı, hazırca kökə tapdı
2016-cı ildə görülən tədbirlər nəticəsində 2005-ci
illə müqayisədə Azərbaycanda piratçılığın səviyyəsi aşağı düşüb. Trend-in
məlumatına görə, bu barədə Müəllif Hüquqları Agentliyinin hesabatında deyilir.
Belə ki, piratçılığın səviyyəsi kitab satışı sahəsində 61 %-dən 29 %-ə,
audio-video məhsul bazarında 90 %-dən 65 %-ə, proqram təminatında 96 %-dən 75
%-ə düşüb.
Hesabat ilində müəllif hüquqlarının təminatı və
əqli mülkiyyət mədəniyyətinin formalaşdırılması məsələləri diqqət mərkəzində
saxlanılıb, ölkəmizdə plagiata qarşı mübarizənin gücləndirilməsi və
piratçılığın səviyyəsinin azaldılması istiqamətində müvafiq dövlət qurumları
ilə əlaqəli tədbirlər görülüb. Agentliyin 960 nömrəli "Qaynar xətt”i və ictimai
əsaslarla fəaliyyət göstərən "Hüquq məsləhətxanası” il ərzində müəlliflərin və
digər hüquq sahiblərinin istifadəsində olub, onların qaldırdıqları problemlərin
həlli istiqamətində Agentliyin səlahiyyətləri çərçivəsində müvafiq tədbirlər
görülüb.
Bəs görəsən piratçılığın ölkəmizdə bu qədər geniş
yayılması hansı səbəbdən qaynaqlanır? Bunun qarşısını tam şəkildə necə almaq
olar? Bu sahədə hansı tədbirlər həyata keçirilir? Mövzu ilə bağlı ekspertlərin
rəyini öyrəndik.
"Altun”
kitab nəşriyyatının direktoru Rafiq İsmayılov hesab edir ki,
piratçılığın yayılmasının bir neçə
səbəbi var: "Problemin kökündə kitab sektorunun sivil şəkildə formalaşmaması faktoru
dayanır. Əsas səbəblərdən biri də
nəşriyyat qiyməti ilə mətbəə qiyməti arasindakı fərqdir. Kitab müəllif
və nəşriyyatın əqli mülkiyyəti hesab olunur. Ona görə də nəşriyyat və müəllif
buraxdığı kitaba istədiyi qiyməti qoya bilir. Sözsüz ki, bu qiymətə həmin kitabın mətbəə xərcindən
başqa digər xərclər də daxildir. Məsələn, müəllifin, dizayner, redaktorun qonorarı
kimi xərclər də kitabın maya dəyərinə daxildir. Ancaq kitab bazarında fəaliyyət
göstərən bəzi işini bilməyən və sadəcə kitab satışı ilə məşğul olan piratlar
fikirləşir ki, mətbəədə kitabı qat-qat aşağı qiymətə çap etmək olar. Ona görə
də onlar bu qanunsuz yola əl atırlar. Lakin əhalidə də buna ikili yanaşma var.
Bir çoxları fikirləşir ki, bizə nə lazımdır, ucuz kitab. Nəşriyyatın buraxdığı
kitab bahadır və ona niyə o qədər pul verək? Ancaq oxucular nəşriyyatın
yuxarıda qeyd etdiyim əlavə xərclərini nəzərə almırlar. Bu səbəbdən də piratçılıq
geniş yayılır”.
R.İsmayılov problemin həlli yollarından da söz
açdı: "Azərbaycan Respublikasının Müəlliflik Haqqında qanununda da bu haqda
xüsusi bənd var. Eyni zamanda Azərbycan
müəllif hüququ ilə bağlı beynəlxalq konvensiyaya da qoşulub. Bu kimi tədbirlər belə halların az da
olsa qarşısının alınmasını təmin edir. Ancaq
bununla belə, günümüzdə xeyli pirat
kitablar satışa buraxılır. Bir kitabın satışı bir ildə min nüsxəni keçdikdə,
onun dərhal pirat nüsxəsi də çıxır. Amma yenə də qeyd edim ki, müəllifin və
nəşriyyatın gəliri yalnız kitabdan asılıdır. Bəzən bir kitab üzərində aylarla,
illərlə iş gedir. Əgər hansısa pirat intellektual əməyə məhəl qoymadan, onu
üzündən köçürüb mətbəədə çıxarırsa, bu həm nəşriyyata, həm də müəllifə böyük
zərbə vurmuş olur. Belə demək olarsa, müəllif öz əziyyətinin bəhrəsini görə
bilmir. Hesab edirəm ki, qanun və aidiyyatı qurumlar bunun qarşısını
almalıdırlar. Əlbəttə, bu, müəyyən qədər də maarifləndirmə işindən asılıdır. Lakin
piratçılıq sırf oğurluq olduğuna görə qanun pozuntusu hesab olunur. Ona görə də
maarfiləndirmə işindən başqa hüquq-mühafizə orqanları daha kəskin tədbirlər
həyata keçirməlidirlər. Düşünürəm ki, qanun da bir qədər sərtləşdirilməlidir”.
İT
mütəxəssisi Namət Məmmədzadə deyir ki, qiymətlərə nəzarət
etməklə bu problemin qarşısını almaq olar: "Piratçılıq birmənalı olaraq hər
zaman qiymət problemindən qaynaqlanır. Proqram təminatı sahəsində isə məhsulun
lisenziyalı olmağı insanları pirat məhsullardan istifadə etməyə məcbur edir. Bu
lisenziyların baha olması problemi daha da dərinləşdirir. Düzdür, insanlarda da
bu məsələyə ikili yanaşma var. Bir çoxları daha çox pulsuz məhsullara meyillidirlər.
Heç kim lisenziya üçün ödəniş etmək istəmir. Hesab edirəm ki, qiymətləri nizama
salmaq və düzgün şəkildə maarifləndirmə işi aparmaqla problemi müəyyən müddət
ərzində öz həllinə qovuşdurmaq olar”.
Bəstəkar,
aparıcı, müğənni Murad Arif bizimlə söhbətində bildirdi ki,
piratçılığın qarşısını almaq mükündür: "Mən İsveçin Stokholm şəhərində yaşadığım
müddətdə müşahidə etdim ki, bu sahədə necə güclü nəzarət var. Əgər orada internet
üzərindən öz kompüterinə mahnı yükləsən, kompüterin İP ünvanı vasitəsilə 10
dəqiqə sonra evinə polis gələ bilər. İnkişaf etmiş ölkələrin hər birində bu
belədir. Pirtaçılıq ən çox internet vasitəsilə yayılır. Lakin pirtaçılığın
qarşısını almaq mümkünsüz bir şey deyil. İstənilən mahnının yüklənməsini
yoxlamaq olur. Problemin qarşısını almaq üçün sənətçilərlə işləmək lazımdır. Əslində
mən belə dşünürəm ki, piratçılığın qarşısını almaq çox asandır. Fikrimcə, bunun
üçün xüsusi qurum yaradılmaldır”.
M.Arif bəzi məqamlara da diqqət çəkdi: "Necə olur
ki, bizim 10 minlərlə pul xərcləyib yazdırdığımız mahnılar disklərdə albomdan
qabaq satılır. Mən hələ özüm albom buraxmamışam. Amma hansısa musiqi dükanına
girsən, orada mənim albomum var. İnternetdən şəkil yükləyib "albom”un üstünə
vururlar. Mənim əmək sərf tediyim mahnılarım pirat albom şəklində satılır. Bunun üçün də tədbir
görmək olar. İcazsəiz heç bir satış obyekti fəaliyyət göstərmirsə, deməli
onların fəaliyyətinə də nəzarət etmək və çox asanlıqla bunun qarşısını almaq
olar. Əgər Azərbaycanda MP3 saytların bağlanması haqda qərar çıxsa, pulsuz heç
kimin mahnılarını kompüterə yükləmək olmayacaq. Bunu idarə edən bir qurum yaransa,
məsələni bir həftə ərizndə həll etmək olar. Əslində buna bizim də çox
ehtiyacımız var. Çünki biz əziyyət çəkirik, amma heç nə sata bilmirik. Bu da
müğənniləri toy biznesinə məcbur edir. Həmin "albom”lar yalnız bir dükanda
satılmır və bu bir şəbəkədir. Tək əldən səs çıxmaz deyiblər. Mən tək heç nə edə
bilmərəm. Tutaq ki, məhkəməyə vermək istəsəm belə, kimi verim? Bu dəqiqə disk
alan demək olar ki, yoxdur. Piratçılıq ən çox internet üzərindən həyata keçirilir.
Misal üçün, mənim rəsmi youtube kanalım var. Heç kim oradan icazəsiz heç nə
götürə bilməz. Çünki youtube həmin mahnının müəllifliyini qoruyur. Kim nəsə yerləşdirmək
istəsə belə, mənə müraciət edir. Bu da onu göstərir ki, deməli, piratçılığın qarşısını
almaq mümkündür. Eləcə də mahnıların pirat disklər şəklində satışının qarşısını
da almaq olar”.
Şəbnəm
Mehdizadə