Nə yaxşı ki...
1999-cu ildə
fəaliyyəti bərpa olunmuş "Kaspi” qəzeti bu illər ərzində bir çox gənclərə özlərini
realizə etmələri üçün geniş meydan verib.
Onlardan biri
də mənəm - Xəyalə Rəis. 6 il əvvəl "Kaspi”nin
rəhbərliyi həftədə bir dəfə olmaqla, qəzetin 2 səhifəsinin "Teatr” əlavəsi kimi
hazırlanmasını teatrşünas Vidadi Qafarovla mənə həvalə etdi. Əvvəlcə 2 səhifə
ilə yola başlasaq da, zamanla səhifələrin sayı da artdı. Çox sevinirdik. Artıq
bizim də sözümüzü deməyə bir meydanımız yaranmışdı.
Beləliklə, hələ
tələbə olmağıma baxmayaraq, "Kaspi” ilə əməkdaşlıq etməyə başladım. Hər məqalə
və ya resenziya yazdıqca, jurnalist kimi püxtələşirdim. Səhərin açılmasını səbirsizliklə
gözləyirdim ki, gedib qəzet alım, yazımı təkrar oxuyum. Universiteti bitirdikdən
sonra qəzetdə mədəniyyət müxbiri kimi işə götürüldüm. O gündən
"Kaspi"də fəaliyyət göstərirəm. "Kaspi” mənim üçün yaradıcılıq
baxımından böyük tramplin oldu. Maraqlıdır ki, ailə xoşbəxtliyimi də məhz
burada tapdım. Hazırda özümü "Kaspi”nin bir parçası hesab edirəm.
Fikrimcə, əsas
məqam odur ki, biz işimizi sevirik və buna yalnız iş kimi baxmırıq. Hər bir
insan işini sevərək görərsə, o zaman nəticə də gözəl alınar. "Kaspi” hər
birimizin ikinci ailəsidir desəm, şübhəsiz, yanılmaram. Bu baxımdan, özümü şanslı
hesab edirəm. Biz gənclər üçün sevindirici haldır ki, yolumuz 3 əsrdir başıdik,
qürurla addımlayan "Kaspi”dən keçir.
Baş redaktorun müavini Məğrur Əli Polad gənclərin
gündəlik fəaliyyətdə güvənli məsləhət ünvanı, əsil təcrübə mənbəyidir.
Jurnalistlərə ən çox tövsiyə etdiyi isə, öz yazılarının redaktə olunmuş
variantını hər səhər qəzetdə oxumaq, bədii ədəbiyyata hər zaman vaxt ayırmaq,
söz bazasını daim genişləndirməyə çalışmaqdır.
Redaktorumuz
deyir ki, "Kaspi”nin onun üçün böyük mənası var: "Kaspi mənim üçün çox şey deməkdir.
Onlardan üçünü qeyd etmək istəyirəm. İlk növbədə, "Kaspi” bir tarixdir. 1881-ci
ildən nəşr edilən, artıq 3 əsrin qəzeti olan "Kaspi” - Həsən bəy Zərdabi, Əlimərdan
bəy Topçubaşov, Məhəmməd ağa Şahtaxtinski, Əhməd bəy Ağayev, Əli bəy Hüseynzadə,
Ceyhun Hacıbəyli, Nəriman Nərimanov və digər aydınlarımızın imzası ilə
bütövlükdə parlaq bir Azərbaycan səhifəsi, tariximizin özünəməxsus
stenoqramıdır.
Daha sonra,
"Kaspi” Azərbaycan və rus dillərində gündəlik qəzet buraxılışları, Azərbaycan,
rus və ingilis dillərində internet saytları, "Ədəbiyyat”, "Gənclik”, "Teatr” əlavələri
ilə birlikdə daim və yorulmadan dövlətimizin, xalqımızın və eləcə də cəmiyyətimizin
maraqlarından çıxış və ona xidmət edən maarifçi, operativ, dolğun və əhatəli mətbuat
orqanıdır.
Nəhayət,
"Kaspi” mənim üçün istedadlı, çalışqan və mehriban kollektivinin hər bir üzvü
özünəməxsus, eyni zamanda, hər bir əməkdaşı "Kaspi” bütövlüyünü tamamlayan, 6
ildir fəaliyyət göstərdiyim, hər gecə 1-ci səhifəsinə kimi hazırladığım, saytının yaranan gündən redaktoru olduğum iş yerim, həyatımın
davam edən bir parçasıdır. Bu yubiley günündə haqq dünyasına qovuşmuş sələflərimizi
böyük ehtiramla xatırlayır və "Kaspi”yə daha neçə-neçə əsrin qəzeti olmağı arzu
edirəm!”
Beynəlxalq siyasət yazarımız
Azər Nuriyev deyir ki, heç vaxt həyatını "Kaspi”siz təsəvvür etməyib: "Kaspi” sənin
üçün nə deməkdir” sualını ilk növbədə belə cavablandırmaq istərdim: "Kaspi” mənim
üçün nə demək deyil ki? 16 ilə yaxın müddətdə çalışdığım qəzetə məni ilk növbədə
bağlayan onun kollektivi, mehriban mühiti olub. Hesab edirəm ki, hər bir insan
hansı sahədə çalışırsa-çalışırsan, işini sevməli və ürəkdən görməlidir. Sözün
doğrusu, əvvəllər başqa qəzetlərdə çalışan həmkarlarla rastlaşanda, "sən hələ
ordasan” sualının cavabında bir qədər duruxub qalırdım. Axı adətən jurnalistlər
bir yerdə çox qərar tutmur, tez-tez iş yerlərini dəyişmələri ilə tanınırlar. Səmimi
deyim ki, bu müddət ərzində müxtəlif yerlərdən iş təklifləri də almışam. Amma hər
dəfə qalmaq qərarı vermişəm. Və açığını deyim ki, peşman olmamışam. Qəzetimizə
arzularım nə ola bilər - ilk növbədə, çap mətbuatının yaşadığı çətin dövrdən
alnıaçıq çıxmağı, maddi çətinlik görməməyi arzulayıram. Bir də, bu qəzet necə
ki, mənə doğma olub və onsuz həyatımı təsəvvür etməmişəm, yerdə qalan
"Kaspi”çilərə də onu arzulayıram”.
"Gənclik” əlavəsinin redaktoru Lalə Musaqızı gənc xanım əməkdaşlarımızın
baş məsləhətçisidir. O deyir ki, "Kaspi” onun üçün yalnız maaş aldığı, səhərdən
axşama kimi çalışdığı iş yeri deyil: "Bura həm də ailəm, dostlarım kimi
doğmadır mənə. Xəstələnəndə evdə ailə üzvlərim qayğıma qaldığı kimi, "Kaspi”dəki
ailəmdən də o qayğını görürəm. Dara düşəndə
dostlarımı yanımda gördüyüm kimi, "Kaspi” ailəsi də dar günlərimdə yanımda
olur. Sevincimi evdə bölüşdüyüm kimi, "Kaspi” ailəsində də bölüşməyi sevirəm.
Çünki sevincimə sevinəcəklərinə əminəm”.
Parlament müxbirimiz Rufik İsmayılov isə deyir
ki, "Kaspi” kollektivinin üzvü olana qədər bir neçə mətbuat orqanında çalışıb:
"2012-ci ildən etibarən "Kaspi” qəzetində müxbir vəzifəsində işləməyə
başlamışam. Bütövlükdə çalışdığım hər bir media qurumuna təcrübə məktəbi kimi
baxmışam, hər gün yeni nə isə öyrənməyə, peşəkarlığımı daha da artırmağa cəhd
etmişəm. Bu gün də "Kaspi”də öyrənir, necə deyərlər, ideoloji cəbhənin əsgəri kimi
Azərbaycan xalqına və onun dövlətçiliyinə xidmət etməyə çalışıram”.
Qəzetimizdin iki
Aygünü var. Çox zaman müsahiblər redaksiyaya zəng edəndə, biz özümüz də onları
səhv salırıq. Ona görə də onları soyadları ilə çağırırıq.
Qəzetimizin sosial yazarı Aygün Əzizin özünəməxsus
yazı tərzi var. "Gənclik qəzeti”ndə maraqlı müsahibləri ilə tanınan əməkdaşımız
deyir ki, ilklər heç zaman unudulmur: ""Kaspi” də mənim ilkimdir. 2012-ci ilin
noyabrı... Həmin vaxt "Kaspi” ilə mühazirələrdə, kitablarda deyil, real şəkildə
ilk tanışlığım yarandı və o gün mənim həyatımın dönüş nöqtəsi oldu. "Kaspi” mənə
təkcə iş təcrübəsi deyil, həm də yeni insanları tanıma şansı verdi. Mehriban,
qayğıkeş, savadlı, təcrübəli dostlar tanıdım. Jurnalistikanın sirlərini 135
illik tarixi olan qəzetdə öyrəndim və öyrənməyə davam edirəm. Məncə, bir
jurnalist üçün ən böyük xoşbəxtlik karyera yoluna milli mətbuatın banisi Həsən
bəy Zərdabinin irsi olan qəzetdə başlamaqdır. "Kaspi” mənim uğurumdur,
evimdir... Ən yaxın dostumdur. Darıxanda yazıram, sevinəndə yazıram... 3 əsrin
qəzeti və dəyərli "Kaspi” kollektivi ilə birgə addımlamaq böyük xoşbəxtlikdir.
Bayramımımız mübarək!”
2 ilə
yaxındır ki, bizimlə çiyin-çiyinə çalışan iqtisadiyyat
yazarı Aygün Asimqızı isə bildirir ki, ona görə, işini sevmək önəmlidir: "Heç
kimə sevmədiyi bir işdə çalışmasını arzu etmirəm. Amma düşünürəm ki, işə olan
sevgini həm də düşdüyümüz iş mühiti formalaşdırır. Bu cəhətdən, "Kaspi”ni gəldiyim
gündən çox bəyənirəm. Mənə görə, işləmək hər gün yazımı bitirib, ayın sonunda
maaş almaq demək deyil. Jurnalistikaya gəldiyim ilk gündən bu cür düşünmüşəm. Hesab
edirəm ki, həm də iş mühiti öyrədici olmalıdır. Bu baxımdan, "Kaspi”nin iki ilə
yaxındır mənim həyatımda öz rolu var. Başqa kollektivlərlə müqayisə edəndə,
görürəm ki, burada mən işləməklə yanaşı, yeni nələrsə öyrənə bilirəm. Ən əsası,
işimdən zövq aldığım bir kollektivdəyəm. "Gəlin ocağa gələr” misalını bizim redaksiyaya
da aid etmək olar. Yeni gələn hər bir işçi sanki kollektivin köhnə bir parçası
kimi geri qayıdır”.
Redaksiyanın
utancaq qızı, siyasət yazarımız Şəfa
Tapdıq bizimlə 5 ildir ki, birgə addımlayır: "Kaspi” mənim ilk iş yerimdir.
İlk iş kollektivim, dostlarımsınız. Artıq 5 ildir ki, buradayam. Yaxşı ki, sizi
tanımışam”.
Beləliklə,
yubileyimiz öz yerində, yolumuzsa davam edir. 135 yaşın mübarək, əzizimiz
"Kaspi”!
Xəyalə Rəis