“Nə istəyirsən de, ancaq təhqir etmə”
Ötən ilin may ayında Nizami
Kino Mərkəzində aktyor, Stund up ustası Fərda Aminin (Xudaverdiyev) "Selfinaz”
adlı şousu baş tutmuşdu. O gündən bu günə, çoxları həmin şoudan danışırdı. Son bir
həftədə həmin şou "Youtube” kanalında nümayiş olunandan sonra isə mövzu yenidən
gündəmə gəldi. Əsas məsələ konsertin "16+” olmasıdır. Konsertdə işlədilən "qurşaqdan
aşağı” monoloqlar sosial şəbəkə fəalları arasında qıcıq yaradıb. Belə ki, onlar
aktyorun ünvanına təhqirlər yağdıraraq, şounun gənclərin psixologiyasına pis
təsir etdiyini yazırlar.
Bütün bunlardan sonra
aktyor onu qınayanlar üçün öz sosial şəbəkə səhifəsində qısa bir video
paylaşdı. Həmin videoda aktyor onu dəstəkləyənlərə deyil, tənqid edənlərə belə
müraciət edib: "Sözüm mənə dəstək olanlara deyil, uğurumu həzm edə
bilməyənlərə, məni tənqid edənlərədir. "Selfinaz” uzun müddətdən sonra
"Youtube”a qoyuldu və Azərbaycan incəsənətinə 3-4-5 manatlıq dəstəyi olmayan 20
manatlıq "wi-fi” adamlarıevdə oturub pulsuz izləyəndən sonra sancılanmağa
başladılar. Əslində may ayından bu yana hesablasaq, 9 ay keçib, sancılanmaqları
normaldır. İnşallah, əlinizdə, ovcunuzda qalsın. Kimin əyninə olmadısa, desin,
hər "razmer”i var. Dincəlin daha”.
Aktyorun bu fikirləri də təbii
olaraq, tamaşaçılar tərəfindən birmənalı qarşılanmadı. Agentliklərdə, sosial
şəbəkələrdə onu yenidən yıxıb-sürüdülər. Biz də məsələnin əslini öyrənmək üçün
Fərda Aminin özü ilə əlaqə saxladıq.
-
"Selfinaz” şounuzdan gözləntilərinizi ala bildinizmi? Tamaşaçı marağı planlaşdırdığınız
səviyyədə oldumu?
- Şükürlər olsun ki, hər şey
qaydasındadır. Gözlədiyimizdən də yaxşı nəticə aldıq. İnsanların Stund up-a olan
marağı göz önündədir. Bu yöndə işlərimizi davam etdirəcəyik. Biz bu işi maddiyyata
görə deyil, sevdiyimiz üçün görürük.
- Konsert "Youtube”-da paylaşılandan sonra 400 mindən çox baxış sayı qazanıb.
Bu da o deməkdir ki, izləyicilərinizin sayı çoxdur.
- Min şükür, bir həftə ərzində 420 minə yaxın izlənmə
var. Məşhur videolar arasında Top5-likdə öz yerini tutub. Bu baxış sayının çox
olması məni çox sevindirir. Nəinki Azərbaycanda, hətta Azərbaycanın hüdudlarından
kənarda da konsertim izlənilib və hətta rekord səviyyədə izlənmə var. Biz bu yükü
üzərimizə götürmüşük. Bunu Azərbaycanda nümayiş etdirib layiqincə təmsil etdirmək
niyyətindəyəm.
- Paylaşdığınız video ilə bağlı fikirlər heç də birmənalı olmadı. Sizi
tənqidə dözümsüzlükdə günahlandırdılar...
- Tənqidə açıq olmayan adam
səhnədə qala bilməz. Mən indiyə qədər nə olursa-olsun, kiməsə aqressiv cavab
verməmişəm. Normalda izləyənlərin də rəylərini görürəm. Bəziləri də var ki,
gözləyirlər, həmin şou "Youtube”-a düşsün və məni təhqir etməyə başlasınlar. Nə
var, nə var, bu şou "16+”dur. Guya indiyə qədər "16+”luq heç nəyə baxmayıblar, ya
da eşitməyiblər. Guya Cem Yılmaza oturub
ayrı yerdə baxırlar? Ona da tək baxırlar da. Sənə necə rahatdırsa, elə də bax. Stund
up-un mənası sərhədsiz deməkdir. Onun janrı budur. Bu konserti vermək üçün uzun
müddət özümə məhdudiyyət qoydum, neçə illər gözlədim. Söyüşlü videolara baxış
sayını görəndən sonra fikrimi dəyişdim. Bu gün-sabah biri çıxıb elə bir şou
etsə, ondan sonra hər şey həmin insanın adına yazılacaq. 6 ildir bunun
əziyyətini çəkirəm, niyə bu sahə mənim adıma yazılmasın? Bunu mən etmək
qərarına gəldim, sağ olsunlar türklər, dəstək oldular. Yenə də qeyd edirəm –
sözüm təhqir edənlərədir, sözümün də arxasındayam. Kim məni təhqir edibsə, o sözlər
də onlara aiddir.
- Yuxarıda qeyd etdiyiniz göstəricilərdə sizə qarşı antitəbliğatın rolu
nə qədərdir? Antireklam sizin reklamınız kimi oldu sanki...
- Nə istəyirlər-etsinlər. Yetər
ki, məni təhqir etməsinlər. O gün paylaşdığım videonun sözləri də həmin o təhqir
edənlərə idi. Bəzi jurnalistlər bunu başqa cür təqdim etdilər. Başa düşə bilmirəm,
onlar nə etmək istəyirlər? Mən 20 ildir ki, səhnədəyəm. 20 ildir bütün tənqidlərə
açıq olmuşam. Mənim o videodakı çıxışım ünvanıma təhqiramiz sözlər yağdıranlaradır.
Mən də onlara beynimin imkan verdiyi qədər səliqəli, tərbiyəli formada, əxlaq normalarını
gözləyərək söyüşsüz, sətiraltı sözümü göndərdim. Biz əvvəldən də bilirdik ki, tənqidlər
olacaq. Çünki türk Stund up-çılarla dekorumuz bənzərdir. Dünyanın hər yerində mövzu
eynidir. Qadın-kişi münasibətləri Türkiyədə başqa, Azərbaycanda başqa deyil ki?
Hər ölkənin kişisi əsgərliyə gedib və orda başına müxtəlif hadisələr gəlib. Onun
başına orda, mənimsə başıma burda əhvalat gəlib. Tənqidlər yalnız bu yöndədir ki,
dekorlar, mövzular digərləri ilə bənzərdir. Bu layihə türklərin bir kommersiya addımı
idi. Çox istəyərdim ki, bunu hər hansı bir azərbaycanlı etsin. Qurban olum sizə,
etmədilər də. 2010-cu ildən bəri mənə heç kim dəstək olmadı. Bu işdə ancaq türklər
dəstək oldu, mən də onların şərtlərini qəbul etdim. Axı mən içimdə olan bu arzuları
gerçəkləşdirməli idim və Allahıma şükürlər olsun ki, gerçəkləşdirdim də.
-
Sosial şəbəkələrdə sizi Cem Yılmazı yamsılamaqla ittiham edənlər də az olmadı.
- 2003-cü ildən çıxan bütün
videolarımın hamısı "Youtube”da var. Qoy girib onların hamısını izləsinlər. Yaddaşlarını
yeniləsinlər, görsünlər ki, 2003-cü ildə onlar Cem Yılmaz tanıyırdılarmı? İnsan
əməyini bu qədər də aşağılamaq olmaz axı. Ən azından bu işdə xeyli əziyyət çəkirik.
Mən Cem Yılmaz qədər zəngin deyiləm, onun qədər beynim rahat deyil. Ən azından,
digər insanlar kimi mənim də problemlərim var. O problemlərə rəğmən, istəyirik ki,
insanların üzü gülsün. Bunun da qarşılığında belə reaksiya görəndə, deyəsi heç bir
söz tapmıram. Bu sahədə Azərbaycanda yaradılan normal şərtlər də bəllidir. Say olaraq
biz türklərdən çox azıq. Orda bir işin qarşılığında qazanılan məbləğlər Azərbaycanda
gözlə görülməyəcək qədərdir. Biz də son illərdə çəkildiyimiz filmlərdən 5-3 manat
qazanırıqsa, onunla da ehtiyaclarımızı ödəyirik. Vəssalam! Heç bir insanın əməyini
aşağılamaq, onu təhqir etmək olmaz. Əgər xoşun gəlmirsə, baxma, fikirlərini yaz,
məsləhətlərini ver. Mən düşmən deyiləm ki? Nə edirsən-et, ancaq təhqir etmə. Hər
kişi bir ailənin rəhbəri, bir nəslin nümayəndəsidir.
-
Hər şeyin ilkində problemlər qaçılmazdır. Sizə elə gəlmirmi ki, bu ilk də
problemsiz ötüşmədi?
- Vallah, bilmirəm. Cem Yılmazı
Cem Yılmaz edən Türkiyədir. Onun tamaşaçıları, onu sevən insanlar, mətbuat nümayəndələridir.
Bu işdə jurnalistlərin də rolu danılmazdır. Cem Yılmaz küçədə hər hansı mətbuat
nümayəndəsinə iki kəlmə söz deyir, az qalırlar onu xəbərlərə qədər göstərsinlər.
Çünki bunu edən jurnalistlərdir. Bilirlər ki, Cem Yılmaz onların sənətçisidir. Türkiyəyə
bütün dünya baxır. Onlar öz sənətçilərini belə təbliğ edirlər, bizdə isə əksinədir.
-
Əsas ittihamlardan biri də budur ki, hazırladığınız monoloqlarda "qurşaqdan aşağı”
ifadələr, zarafatlar çoxdur. Əslində bu, Cem Yılmazda da var, amma nədənsə onda
bu normal qəbul olunur. Sizdə isə...
- Yəqin ki, Receb Evedikin filmlərini
izləmisiniz.
-Bəli.
- "Xoxan” filmi çıxmayana qədər
Recep İvedikin filmi Azərbaycanda ən çox izlənmə rekordu qıran, izlənilənlər siyahısında
idi. Niyə o filmdəki söyüşlər o qədər şişirdilmədi? Heç kim demədi ki, niyə bu filmi
gətirib burada nümayiş etdirirsiniz. Bizim beynimiz söyüş üzərindən işləmir. Mən
bunu hər dəfə sübut etmişəm. Ancaq bu da olmalıdır, bunu da mən etdim. İlklərə imza
atmaq hər zaman çətin olur. Yetər ki, təhqir olmasın.
- Bir daha belə bir Stund up şousu göstərməyi düşünürsünüzmü?
- Mütləq olacaq. May ayında
eyni vaxta, hətta iki gün Stund up şousu verməyi düşünürəm. Bunlar məni ruhdan salmır,
əksinə, stimul verir. Mən sözümü demişəm, deyirəm də. Biz bu işi sevirik, kiminsə
sözünə görə işimi dayandırmaq niyyətində deyiləm. Eyni zamanda, tənqidlərə də açığam.
Tənqidlərdən nəticə çıxarırıq ki, bu səviyyəyə gəlib çatmışıq. Növbəti Stund up-a
hazır olsunlar, gəlirik.
-
Fərda bəy, insan dar və xoş gündə dostunu, düşmənini daha yaxşı tanıyır. Sosial
şəbəkə fəalları sizi qınaq obyektinə çevirəndə, əsil dostlarınızı tanıya bildinizmi?
- Çox gözəl tanıdım. Bir insanı
həyatda tanımırsansa, "Facebook”da daha yaxşı tanıyırsan. Bir də "Facebook”dakı
dostdan sənə dost olmaz. Əslində məntiq olaraq da belə idi, ancaq bir neçə şəxsin
paylaşımlarını gördüm, hətta mənim dostluğumda da var idilər. Mən onlara ismarış
yazandan sonra başladırlar üzr istəməyə, dedilər ki, "sizi düz anlamadıq, başa düşmədik”.
Sadəcə onlar layk yığmaq xatirinə ittiham etməyə başladılar. Allaha şükür ki, ağlım
başımdadır. Bu gün-sabah 37 yaşım olacaq. Biz yaradıcılığımızı "Facebook” üzərində
qurmamışıq ki...
-
Bu sahədə davamçılarınız varmı?
- Bilmirəm. Varsa da, məndən
sonra onlar üçün bu sahədə irəliləmək daha asan olacaq. Çünki mən artıq o cığırı
açmışam. Mən Stund up-ı adını tanıtdırana, onu qəbul etdirənə kimi ömrümün 6 ili
getdi. Ümid edirəm ki, məndən sonra gələn Stund up-çular üçün daha asan olacaq.
Çünki artıq Stund up deyəndə məlum olacaq ki, söhbət nədən gedir. Amma onu da bilirəm
ki, onlar da heç zaman mənə çox sağ ol deməyəcək.
Xəyalə Rəis