Nazim Süleymanovun "5"ləri qoşalaşdırdı
Azərbaycan
futbol tarixinin ən məşhur oyunçularından olmuş Nazim Süleymanovun bu gün
yubileyidir. Milli komandamızın sabiq kapitanı, "Neftçi”nin veteran
futbolçusunun 55 yaşı tamam olur.
1965-ci ilin 17
fevralında dünyaya gələn yarımmüdafiəçi 1983-1990-cı illər ərzində "Neftçi”nin
heyətində 190 oyun keçirib, 32 qol vurub. O, 1992-1998-ci illər ərzində Azərbaycan
milli komandasının heyətində 24 oyunda 5 qola imza atıb.
Süleymanov
futbol tariximizin ən uğurlu legioner həyatı yaşamış oyunçusudur. 1991-96-cı
illərdə Vladiqafqazın "Alaniya" komandasının formasını geyinmiş həmyerlimiz
burada 5 il ərzində 142 oyun keçirib, 60 qol vurub. 1996-cı ildə
"Alaniya"nın heyətində Rusiya çempionluğunu qazanıb. Karyerasını
2000-ci ildə - 35 yaşında, Soçinin "Jemçujina" komandasında bitirib.
Nazim Süleymanov
"Xəzər-Lənkəran" (2004), "Olimpik-Şüvəlan" (2009-2011) və
"Neftçi”nin baş məşqçisi (2013), həmçinin Azərbaycan milli komandasının məşqçisi
(2012-2013) vəzifələrində çalışıb.