Naz-qəmzəli gözəllər, xəncərli və sərt baxışlı igidlər - Reportaj - Fotolar
Səhər işə gələrkən, bir neçə gənc oğlan və qızların milli geyimdə,
əllərində kitab-dəftər harasa tələsdiklərinin şahidi oldum. Mənzərə tanış deyildi.
Ətrafa boylandım ki, bəlkə mən səhv geyimdəyəm. Yooox! Bu gənclər keçmişdən
gəlməmişdilər. Müasir gəncliyin şəhərdə milli geyimdə gəzməsində nə isə
qəribəlik var idi. Marağım üstün gəldi və sənətimin mənə qazandırdığı vərdişlə
gənclərə yaxınlaşdım.
"Milli adət-ənənələrimizi yaşadaq”
Gənclər universitetə tələsdiklərini bildirdilər. Axı nə üçün bu geyimdə?
Niyə universitetə "xəncər”, təsbeh, kəlağayı ilə gedirsiniz? Məlum oldu ki,
həmin gün Azərbaycan Dillər Universitetində milli gündür. Tələbələrin istəyi
ilə ayın bir günü universitetin tələbə, müəllim heyəti "Milli
adət-ənənələrimizi yaşadaq” şüarı ilə dərsə milli geyimdə və ya onun hər hansı
bir elementini əks etdirən tərzdə gəlməlidirlər. Bu tarixi ana şahidlik etmək
üçün sözügedən universitetə yollandıq.
Dəhlizdə gənc oğlanlar, qızlar anı ölümsüzləşdirmək üçün şəkil
çəkdirirlər. Bəziləri isə dərsə gecikməmək üçün örpəyini düzəldə-düzəldə qaçırdı.
Qızlar naz-qəmzələri, oğlanlar isə sərt baxışları və xəncərləri ilə seçilirlər.
Universitetin əcnəbi tələbələri isə maraqla onlara baxır, yoldaşlarını
sorğu-sual edirlər.
"Millilik bizim qanımızda var”
Auditoriyalardan birinə baş çəkirik. Regionşünaslıq fakültəsində
ingilis dili dərsidir. Müəllim Aytən Seyidova milli geyimdə dərsə təşrif
buyurur. Deyir ki, belə geyimdə dərs
demək fərqli və gözəl hissdir: "Tələbələrimizin təşəbbüsü ilə öz milli adət-ənənələrimizi
bacardığımız qədər təmsil etməyə çalışırıq. Millilik bizim qanımızda var. Amma
bəzən adətlərimizi unuduruq. Dəyərlərimizi yaşatmaq üçün hər ayın bir günü belə
layihələri həyata keçirməliyik. Tariximizi, dəyərlərimizi, geyimlərimizi daim
qorumalıyıq”.
1-ci kurs tələbəsi Lamiyə ilk dəfədir bu geyimdən yararlanır. Deyir
ki, özünü əsl Azərbaycan xanımı kimi hiss edir: "Bu paltara vuruldum. Əynimdən
çıxarmaq istəmirəm. Əvvəlki xanımlarımız necə gözəl geyinib! İnsanı çox gözəl
göstərir. Xüsusilə rəng seçimləri ecazkardır”.
"Duyğulandım...”
Universitetin ağsaqqal müəllimlərindən olan Azərbaycan dili və
ədəbiyyatı kafedrasının professoru Adil müəllim tələbələrlə şəkil çəkdirir.
Onları bu geyimdə görəndə kövrəlir və gözündən yaş gəlir. Onun kövrəlməsi
tələbləri təəccübləndirir. Adil müəllim deyir ki, müasir gəncliyin keçmişi
yaşatmağa çalışması onu duyğulandırıb: "Duyğulandım. Xanımları milli formada görəndə
mənə təsir etdi. O qədər avropalaşmışıq ki, gənclərimiz yerli-yersiz adətlər
götürüb. Məsələn, gözəl toy adətlərimiz
var. Uşaqlara deyirəm ay qızım, ay oğlum, alman, fransız, ingilis toyunda
vağzalı kimi gözəl musiqinin şahidi olmusunuz? Bəylə gəlinin vağzalı sədaları
altında məclisə təşrif buyurmasından gözəl hiss yoxdur. Mənasız musiqilərlə
adətlərimizi korlamayın. Tələbələri bu geyimdə görəndə anladım ki, biz milli
adətlərimizi gələcəyə apara biləcəyik. Dil öyrən, dünyagörüşün olsun, oxu,
təhsil al, hər bir şeyi bil. Amma adət-ənənəni, keçmişini unutma. Keçmişini
hara gedirsənsə, özünlə apar”.
Nənəsinin kəlağayısı ilə dərsə gələn tələbə
Mehin milli geyimdə olmasa da, dərsə nənəsinin kəlağayısı ilə gəlib.
Deyir ki, başına kəlağayı atanda insana qəribə ağırlıq gəlir: "Dərsə milli
geyimdə gəlmək çox gözəl hissdir. Bu gün hamını belə görəndə sevindik. Bütün
universitetlərdə belə günlər keçirilsə, yaxşı olar. Biz azərbaycanlıyıq və nə
qədər də inkişaf etsək, milli adət-ənənələrimizi, mentalitetimizi
yaşatmalıyıq”.
Aytac da milli geyimi sevib. Deyir ki, geyimin xüsusi gözəlliyi və
rəngləri var: "Azərbaycan milli geyimləri azərbaycanlıların maddi
mədəniyyətini, onlara xas olan xüsusiyyətləri əks etdirir. Biz bu geyimlərdən
yararlanmaqla və milli gün keçirməklə gənc olaraq keçmişimizə sadiq olduğumuzu
və onu gələcəyə aparacağımızı sübut edirik. Məncə, bütün gənclər ayda bir dəfə
də olsa, bu təşəbbüslə çıxış etməlidir”.
Zənginləşən dəyərlər...
ADU-nun Regionşünaslıq və Beynəlxalq münasibətlər fakültəsinin dekanı
Anar Nağıyev deyir ki, Azərbaycan xalqının dəyərləri bu universitetdə hər zaman
qorunub: "Bizim universitet həmişə təhsilimizdə öncül yerləri tutub və
rəngarəngliyi, dinamikliyi ilə seçilib. Azərbaycan xalqının malik olduğu
dəyərlər bizim universitetdə həmişə qorunub, saxlanılıb. Bu gün universitet
müəllimlərinin və tələbələrinin milli paltarlarda rahat şəkildə dərsə gəlməsi
milli dəyərlərə önəm verdiyimizin sübutudur. Ən maraqlı fakt odur ki, bu,
tələbə təşəbbüsüdür. Hər ay bizim tələbələrlə ümumi görüşlərimiz olur.
Tələblərə açıq mikrofon vasitəsilə öz fikirlərini deyə bilirlər. Tələbələrin
böyük əksəriyyəti universitetdə milli günün elan olunmasını istədilər. Biz də
onlara dəstək olduq. Azərbaycan xalqı dərin dəyərlərə malikdir. Kiçik ölkədə
müxtəlif dinlərə mənsub olan xalqların yaşaması bizim dəyərlərimizi daha da
zənginləşdirib. Bu gün dünya üçün multikultural dəyərlər nə qədər yeni olsa da,
Azərbaycan bu dəyərlər sisteminə - yəni, eyni bir ölkədə yaşayan müxtəlif
xalqların hüquqlarını tanıyan humanist dünyagörüşü və ona uyğun siyasəti ilə
min illərdir bəşəriyyətə nümunə göstərir. Tələbələrin buna dəstək olub, bu
formada dərsə gəlmək istəmələri dövlət siyasətinin təntənəsidir. Bizim tələblərin,
müəllimlərin hər biri özünün tarixinə, milli dəyərlərinə bağlı insanlardır”.
Dekanın sözlərinə görə, əcnəbi tələbələr və müəllimlər milli günü
maraqla qarşılayıblar: "Əcnəbilər bunu pozitiv qəbul edirlər. Bizim çinli müəlliməmiz
bu günün keçiriləcəyini eşidib, səhər dərsə öz milli geyimlərində gəlmişdi. Çox
maraqlı idi”.
"Kəlağayıkolleksiyam var”
Milli günün keçirilməsinə ən çox sevinənlərdən biri də regionşünaslıq
kafedrasının müdiri dossent Sevdagül Əliyevadır. Sevdagül müəllimə milli
dəyərlərimizə, geyimlərimizə o qədər bağlıdır ki, hətta şəxsi kəlağayı
kolleksiyası var: "Mənim üçün bu, çox böyük fəxr hissidir. Çünki hər bir vaxt
bu gözəlliyi görməyi arzu etmişəm. Özüm həmişə bu geyimdən istifadə edirəm.
Xarici ölkələrdə tədbirlərdə tez-tez iştirak edirəm və milli geyimlərimizi
fəxrlə geyinirəm. Çox böyük kəlağayı kolleksiyam var ki, onlar mənim üçün
dəyərlidir. Gənclərdə bu hissin tərbiyə olunması bizim mənəvi borcumuzdur və
bundan başlamaları xoşdur. İndi çox müəllimlərimiz deyir ki, gələn ilə milli
geyim sifariş verəcəm. Bu sözü eşitmək
qürurdur. Çünki hər bir xalqın milli-mənəvi dəyərləri var. Bu dəyərləri hiss etmək üçün onları göz
qabağında görmək gərəkdir. Milli geyimi geyinəndə insan tamamilə başqa ruhda
olur. Bu hissi sözlə ifadə etmək çətindir”.
Camal sərt baxışlı, dərsə "xəncər”lə gələn tələbələrdəndir. Deyir ki,
xanımlar milli geyimdə gözəl görünür: "Öz milli mentalitetimizin unudulmasına
icazə verməməliyik. Düzdür, Avropaya inteqrasiya edirik, dünyagörüşümüz artır.
Amma nə qədər inkişaf etsək də,
dəyərlərimizi unutmamalıyıq. Belə tədbirlər bir günlə yekunlaşmamalıdır
və ardıcıl olmalıdır”.
Aygün ƏZİZ