Naxçıvan tarixindən bəhs edən nəşrlərin təqdimatı keçirilib - Fotolar
AMEA Naxçıvan Bölməsində
"Naxçıvanın tarixi abidələri” və "Kültəpədə arxeoloji qazıntılar (2013-2016)”
adlı kitabların təqdimatı keçirilib.
Tədbirdə bölmənin sədri, akademik İsmayıl Hacıyev çıxış edərək Naxçıvan Muxtar Respublikası Ali Məclis
Sədrinin 6 dekabr 2005-ci il tarixli "Naxçıvan Muxtar Respublikası ərazisindəki
tarix və mədəniyyət abidələrinin qorunması və pasportlaşdırılması işinin təşkili
haqqında” Sərəncamı əsasında 2006-cı ildən etibarən AMEA Naxçıvan Bölməsinin arxeoloji ekspedisiyası beynəlxalq
ekspedisiyalar ilə birgə ərazidə tədqiqatların aparıldığını bildirib. Qeyd edib
ki, Bölmənin Tarix, Etnoqrafiya və Arxeologiya İnstitutunun şöbə müdiri,
AMEA-nın müxbir üzvü Vəli Baxşəliyev və Naxçıvan Dövlər Universitetinin müəllimi Fizzə Quliyevanın həmmüəllif
olduqları "Naxçıvanın tarixi abidələri” adlı dərslikdə 2006-2016-cı illərdə
arxeoloji araşdırmalar zamanı aşkarlanan müxtəlif dövrlərə aid abidələr və
maddi-mədəniyyət nümunələri elmi cəhətdən təhlil edilib. Eyni zamanda Naxçıvanın Kür-Araz mədəniyyəti abidələri ilə bağlı
bir sıra məsələlərə aydınlıq gətirilib.
Bölmə sədri "Kültəpədə
arxeoloji qazıntılar (2013-2016)” kitabı barədə də məlumat verərək nəşrdə I Kültəpə yaşayış yerində aparılan tədqiqatların
nəticələrinin işıqlandırıldığını deyib. Bildirib ki, kitab AMEA-nın
müxbir üzvü Vəli Baxşəliyev, Tarix, Etnoqrafiya və Arxeologiya İnstitutunun şöbə
müdiri, Arxeoloji xidmət şöbəsinin müdiri, tarix üzrə fəlsəfə doktoru, dosent
Zeynəb Quliyeva, Fransa Milli Elmi
Araşdırmalar Mərkəzinin əməkdaşı Catherine Marro, Remi Berthon və Savaş
Sarıaltunun həmmüəllif ilə ərsəyə gəlib.
Daha sonra tarix üzrə fəlsəfə doktoru, dosent Zeynəb
Quliyeva "Naxçıvanın tarixi və arxeoloji abidələri Naxçıvan tarixinin öyrənilməsi
üçün mühüm mənbədir” mövzusunda məruzəsini təqdim edib. O, Azərbaycan
tarixşünaslığına qiymətli töhfələr vermiş Naxçıvan diyarında arxeoloji tədqiqatlardan
danışaraq qeyd edib ki, 2013-cü ildə Ali Məclis Sədrinin dəstəyi ilə AMEA Naxçıvan
Bölməsində yerli arxeolji ekspedisiya yaradılıb. Ekspedisiyanın heyətinə Bölmənin
arxeoloqları ilə bərabər Naxçıvanda fəaliyyət göstərən sənətşünaslar, Naxçıvan
Dövlət Universitetinin əməkdaşları, o cümlədən tələbələri də cəlb edilib. AMEA-nın
müxbir üzvü V.Baxşəliyevin rəhbərliyi ilə təşkil edilən ekspedisiya üzvlərinin ərazidə
apardığı arxeoloji qazıntılar nəticəsində xeyli miqdarda qiymətli materiallar əldə
edilib. Təqdimat mərasimi keçirilən kitablar da arxeoloji qazıntıların nəticələri
işıqlandırılıb.
Təqdimatda
Bölmənin Tarix, Etnoqrafiya və Arxeologiya İnstitutunun
direktоru, AMEA-nın müxbir üzvü, professor Fəxrəddin Səfərli, həmin institutun şöbə müdiri, tarix üzrə fəlsəfə
doktoru, dosent Asəf Orucov ictimaiyyətə təqdim olunan hər iki kitabı
Naxçıvan tarixinin öyrənilməsi baxımından dəyərli mənbə kimi dəyərləndiriblər.
Tədbirin sonunda "Naxçıvanın
tarixi abidələri” və "Kültəpədə arxeoloji qazıntılar (2013-2016)” adlı
kitabların müəlliflərindən biri olan AMEA-nın müxbir üzvü Vəli Baxşəliyev çıxış
edərək Ali Məclis Sədrinin diqqət və dəstəyi ilə Naxçıvanda aparılan arxeoloji
işlərdən və onların nəticələrindən bəhs edib.
Tədbir çərçivəsində AMEA-nın
müxbir üzvü Vəli Baxşəliyevin rəhbərliyi ilə təşkil edilən ekspedisiya üzvlərinin
Naxçıvan ərazidə apardığı arxeoloji qazıntıları, o cümlədən e.ə. VII-I minilliklərə aid edilən I Kültəpə
yaşayış yerində və onun ətrafında aparılan elmi tədqiqatları əks etdirən video
gönüntü nümayiş etdirilib.