Naqif Həmzəyev: "Xəzər hövzəsində dostluq mühiti daha da möhkəmlənir"
"Son 28 ildə Azərbaycan-Türkmənistan
əlaqələri, qarşılıqlı dostluğa və səmərəli əməkdaşlığa əsaslanan münasibətlər yüksələn xətlə
inkişaf edir, strateji tərəfdaşlıq xarakteri daşıyır. Ölkələr arasında siyasi,
iqtisadi, ticarət, energetika, nəqliyyat-logistika, mədəni-humanitar sahələrdə əməkdaşlıq daim inkişaf etdirilməkdədir. Bu, xalqlarımızın
tarixi dostluğa sədaqətindən və dövlətlərimizin qarşılıqlı-faydalı əməkdaşlığından
xəbər verir”.
Bu barədə millət
vəkili Naqif Həmzəyev "Kaspi” qəzetinə açıqlamasında bildirib.
O qeyd edib
ki, ötən
illərdə hər iki ölkə rəhbərlərinin
görüşü, aparılan müzakirələr, imzalanan mühüm sənədlər Azərbaycan və
Türkmənistanın gələcək münasibətlərinin yeni inkişaf yoluna çıxdığını bir daha sübut
edib:
"Azərbaycan
və Türkmənistan arasında nəqliyyat daşımaları sahəsində əlaqələrin inkişaf
etdirilməsi iki ölkənin maraqlarına xidmət etməklə yanaşı, regionda və bütöv
Avrasiyada Şərq–Qərb nəqliyyat dəhlizinin hərtərəfli inkişafında mühüm əhəmiyyət
kəsb edir. Azərbaycanla Türkmənistan arasında dostluq əlaqələri Mərkəzi Asiya, Xəzər,
Qafqaz regionu üçün birbaşa əhəmiyyət daşıyır. Mərkəzi Asiyanı Qafqazla birləşdirən
ən qısa və əlverişli yol Xəzər dənizi vasitəsi ilə Türkmənistandan və Azərbaycandan
keçir. Ölkələr arasındakı dostluq münasibətləri sözügedən marşrutu istifadə edən
region ölkələrinin yüklərinin rahatlıqla dünya bazarına çıxarılmasına, eləcə də idxal mallarının ən
qısa müddətdə və ən ucuz yolla daşınmasına imkan yaradır. Bu, ölkələrin
iqtisadiyyatına və əhalinin rifahına birbaşa təsir edən amil kimi özünü göstərir”.
Millət vəkili N.Həmzəyev
bildirib ki, iki ölkə
arasındakı dostluq münasibətləri bütövlükdə
Xəzər hövzəsində dostluq, qarşılıqlı anlaşma mühitinin möhkəmlənməsinə öz töhfəsini
verir: "Azərbaycan Prezidenti
İlham Əliyevin MDB Dövlət Başçıları Şurasının iclasında iştirak etmək üçün
Türkmənistana işgüzar səfəri zamanı Prezident Qurbanqulu Berdiməhəmmədovla rəsmi görüşü də Azərbaycan ilə
Türkmənistan dövlətləri və xalqları arasında əlaqələrin, əməkdaşlığın yeni mərhələlərini,
üfüqlərini müəyyən edəcək”.
Alpər TURAN