“Nağıllar gerçəkləşir” - Fotolar
Şərqin ilk Demokratik Cümhuriyyətinin layiqli
varisi müstəqil Azərbaycan iqtisadi inkişaf səviyyəsinə görə Cənubi Qafqazın
lider dövlətinə çevrilib. Multikulturalizm və tolerantlıq məkanı olan ölkəmiz həm
də beynəlxalq tədbirlərə, o cümlədən idman yarışlarına ən yüksək səviyyədə ev
sahibliyi edən dövləti kimi dünyanın diqqətini cəlb edir. Bunun ilkin səbəbi Azərbaycanda
təhlükəsizliyin yüksək səviyyədə təmini və müasir infrastrukturunun olmasıdır.
İdman sahəsi ilə bağlı təkcə bir məqamı xatırlatmaq yerinə düşər ki, son illər ərzində
ölkəmizdə 45 müasir Olimpiya İdman Kompleksi tikilib. Eyni zamanda stadionlar,
futbol meydançaları, üzgüçülük mərkəzləri, milli gimnasika arenası, şahmat məktəbləri,
müxtəlif təyinatlı digər idman obyektləri istifadəyə verilib. Yaradılan şəraiti
layiqincə qiymətləndirən idmançılarımız müxtəlif idman yarışlarında uğurlu nəticələr
göstərərək, Azərbaycanın idman dövləti olduğunu, burada idmana yüksək səviyyədə
qayğı göstərildiyini dünyaya dəfələrlə nümayiş etdiriblər.
Əlbəttə ki, əldə edilən uğurlar, yaradılan müasir
infrastruktur, ölkəmizin dünyada artan nüfuzu bir sıra beynəlxalq tədbirlərin
Azərbaycanda keçirilməsində mühüm rol oynayıb. Misal üçün, dünyada mühüm mədəniyyət
tədbiri kimi tanınan Avroviziya Mahnı Müsabiqəsinə 2008-ci ildən başlayaraq, hər
il davamlı şəkildə qatılan ölkə təmsilçilərimiz 2011-ci ildə bu yarışın qalibi
olublar. Eldar Qasımov və Nigar Camalın qalibiyyəti Azərbaycana 2012-ci ildə bu
müsabiqəyə ev sahibliyi etmək hüququ qazandırıb. 2012-ci ilin may ayında həmin
müsabiqə Azərbaycanın paytaxtı Bakı şəhərində yüksək təşkilatçılıq səviyyəsində
keçirilib.
2015-ci ildə ölkəmiz I Avropa Oyunlarına ev
sahibliyi edib. Tarixdə ilk dəfə Azərbaycanda keçirilən bu idman yarışında
dünyanın 50 ölkəsindən 10 minə yaxın atlet iştirak edib. Onlar 30 idman növü
üzrə 253 dəst medal uğrunda mübarizə aparıblar. 12-28 iyun tarixində davam edən
yarışlar zamanı Azərbaycan idman mərkəzi kimi dünyanın diqqət mərkəzinə
çevrilib. Bu yarışmanın Bakıda və Mingəçevirdə keçirilməsi ilə Azərbaycan sübut
edib ki, istənilən beynəlxalq miqyaslı tədbirə yüksək səviyyədə ev sahibliyi
etməyə, ən əsası, bu istiqamətdə öz nümunəsini ortaya qoymağa qadirdir. Beynəlxalq
əhəmiyyətli belə tədbirlərin Azərbaycanda keçirilməsinə daha bir nümunə olaraq
2016-cı ilin may ayında 17 yaşadək futbolçular arasında Avropa çempionatının
Bakıda baş tutmasını da göstərmək olar. Bu çempionatda 16 milli komanda 4
qrupda mübarizə aparıblar.
Elə həmin il bütün Avropanın idman nəbzi növbəti dəfə
Bakıda - Şərq ilə Qərbin koloritinin cəmləşdiyi bu nadir şəhərdə döyünüb. Azərbaycanın
paytaxtı dünya əhəmiyyətli mötəbər idman yarışına ev sahibliyi edib. 17-19 iyun
2016-cı il tarixində qədim Odlar Yurdunda dünyanın ən nüfuzlu idman
yarışlarından biri – "Formula-1”
üzrə dünya çempionatının 8-ci mərhələsi olan Bakı Avropa Qran-prisi keçirilib. Dünyada
yarım milyard tamaşaçı auditoriyası olan Formula-1 yarışının Bakıda keçirilməsi
ölkəmizin beynəlxalq idman aləmində qazandığı uğurları bir daha əks etdirib. Həmin
vaxtdan etibarən, hər il paytaxt Bakı "Formula-1” yarışlarına ev sahibliyi
edir.
Bütün bunları nəzərə alsaq, 2017-ci ilin may ayında
Azərbaycanın IV İslam Həmrəylik Oyunlarına ev sahibliyi etməsi təsadüfi sayıla
bilməz. 12-22 may tarixində paytaxt Bakıda baş tutan bu yarışlarda 21 idman
növü üzrə 57 ölkədən 6 minə yaxın atlet mübarizə aparıb. Paralel olaraq, Azərbaycanın
Bakı-2016: Ümumdünya Şahmat Olimpiadası, Bədii Gimnastika üzrə Avropa
Çempionatları, Dünya Kuboku, Peşəkar Boks üzrə Beynəlxalq Turnir, UEFA Avropa
Liqasının final oyunu, Avropa Gənclər Yay Olimpiya Festivalı və sair kimi
yarışlara ev sahibliyi etməsi idmançılarımızın həyatında mühüm rol oynayıb.
Prezident İlham Əliyevin təbirincə desək, beynəlxalq səviyyəli yarışa ev
sahibliyi edən ölkəmiz fərqli yanaşma ortaya qoyub, yeni standartlar tətbiq
edib.
Prezident İlham Əliyevin düzgün daxili və xarici siyasəti,
diqqət və qayğısı, Birinci vitse-prezident Mehriban Əliyevanın uğurlu təşkilatçılığı
sayəsində ən yüksək səviyyədə keçirilən beynəlxalq idman tədbirləri Azərbaycanı
nəinki Avropada və İslam aləmində, bütün dünyada inkişafda olan müasir, mütərəqqi,
güclü dövlət kimi tanıdıb. Buna görədir ki, paytaxt Bakının möhtəşəm Milli
Gimnastika Arenası bu günlərdə daha bir beynəlxalq idman tədbirinin keçirildiyi
məkana çevrilib. Gimnastika dünyasının diqqəti 14 ildən sonra yenidən ən önəmli
yarışlardan birinə - Bakı şəhərində keçirilən bədii gimnastika üzrə 37-ci dünya
çempionatına yönəlib. Sentyabrın 16-dan start götürən və bu ayın 22-dək davam
edəcək çempionat təkcə bütün dünyadan olan bədii gimnastların birincilik
uğrunda mübarizəsi ilə deyil, eyni zamanda, 2020-ci ildə Tokioda təşkil ediləcək
XXXII Yay Olimpiya Oyunlarına lisenziya xarakteri daşıması ilə də əlamətdardır.
"Nağıllar gerçəkləşir” devizi altında təşkil edilən
çempionatın ən yadda qalan hissələrindən biri möhtəşəm açılış mərasimidir. Təşkilatçılar
bu dəfə də rəngarəng, bənzərsiz və izləyənləri nağıllar aləminə "səyahətə
aparacaq” şou nümayiş etdiriblər. Mərasimdə Şərq motivləri əsasında səhnələşdirilmiş
"Şərq nağılı” adlı şou ilə yanaşı, Azərbaycanın məşhur ifaçıları iştirak edib.61 ölkənin qatıldığı çempionatda həm fərdi
gimnastlar, həm də qrup hərəkətləri komandaları ayrı-ayrı alətlər və
çoxnövçülük yarışlarında mübarizə aparırlar. Eyni zamanda, komanda hesabında ən
güclülər müəyyənləşir. Bu yarışa qatılan 300-dən çox gimnast 9 dəst medal
uğrunda, o cümlədən Olimpiadaya yeni namizəd olmaq üçün bütün güclərini sərf
edirlər. Dünya çempionatında ölkəmizi 9 gimnast təmsil edir.
Dünya çempionatının səfiri, bir neçə dəfə dünya
çempionu, Olimpiya Oyunlarının mükafatçısı, rusiyalı gimnast Yana Batırşina da
yarışları tamaşaçılarla birlikdə izləyir. O mediaya açıqlamasında bildirib ki,
yarışın təşkilatçıları çempionatın yüksək səviyyədə təşkil olunması üçün əllərindən
gələni edirlər. Y.Batırşina bu dəfə də Azərbaycanın yüksək təşkilatçılıq
bacarığı ilə fərqlənəcəyinə şübhə etmədiyini dilə gətirib.
Ümumrusiya Bədii Gimnastika Federasiyasının rəhbəri
İrina Viner-Usmanova isə Azərbaycanda gimnastların məşqləri üçün gözəl şərait
yaradılmasına diqqət çəkib. O bildirib ki, bu cür şərait dünyanın az ölkəsində
mövcuddur və Bakıda Gimnastika Arenasını heyranedicidir. Federasiya rəhbəri
deyib ki, bütün bunlar Azərbaycan Gimnastika Federasiyasının prezidenti
Mehriban Əliyevanın sayəsindədir.
Y.Batırşinanın bu fikirlərinə dəstək olaraq bir
daha vurğulayaq ki, Azərbaycanın indiyə qədər ev sahibliyi etdiyi beynəlxalq
idman tədbirlərinin yüksək təşkilatçılıq səviyyəsində baş tutması bədii
gimnastika üzrə 37-ci dünya çempionatının da müsbət məqamlarla yadda qalacağını
qaçılmaz edir. Bu məqamda Prezident İlham Əliyevin bir fikrini xatırlatmaq
yerinə düşər. O deyib ki, inkişaf etmiş ölkələrdə idman həm dövlətə, həm də
xalqa böyük qələbə gətirir. Şübhə etmirik ki, Azərbaycanda da bu, məhz belədir.
Bunu indiyə qədər keçirilən beynəlxalq tədbirlər, onların doğurduğu maraq,
dünyanın Azərbaycana olan münasibəti, ölkədəki xalq-iqtidar birliyi,
insanlarımızın idmana olan həvəsi daim təsdiqləyir.
Rufik
İSMAYILOV