• çərşənbə axşamı, 19 mart, 13:53
  • Baku Bakı 8°C

Muzeyin üçüncü korpusunun açılış mərasimi keçiriləcək

17.05.19 09:45 955
Muzeyin üçüncü korpusunun açılış mərasimi keçiriləcək
18 may – Beynəlxalq Muzeylər Gününə həsr edilmiş "Muzeylər mədəniyyət mərkəzləri kimi: ənənələrin gələcəyi” devizi altında ölkəmizdə silsilə tədbirlər keçirilir.
Mədəniyyət Nazirliyindən Trend-ə verilən məlumata görə, bu silsilədə 17 May 2019-cu il tarixində saat 12.00-da Azərbaycan Milli İncəsənət Muzeyinin Niyazi, 9 ünvanında yerləşən, təmirdən çıxmış yeni korpusunun geniş ictimaiyyyət üçün açılış mərasimi keçiriləcəkdir. Xatırladaq ki, 18 dekabr 2018-ci il tarixində Azərbaycan Respublikasının Prezidenti cənab İlham Əliyev və Birinci Vitse Prezident Mehriban xanım Əliyeva Azərbaycan Milli İncəsənət Muzeyinin, Niyazi, 9 ünvanında yerləşən korpusunda aparılmış təmir, bərpa və bədii tərtibat işləri və eksponatlarla yaxından tanış olmuşlar.
Muzey son illər ərzində bərpa və inşa edilən ən müasir avadanlıqlarla təchiz edilmiş ekspozisiyaya malikdir. Burada xüsusi bərpa laboratoriyası mövcuddur, ən müasir mühafizə sistemləri ilə təmin edilib, daxili bağçası tamaşaçıların istirahəti üçün çox əlverişlidir. Muzey silsiləvi şəklində iki qədim memarlıq abidəsini birləşdirən müasir korpusdan ibarət ərazini tutur. Hazırda muzeyin ekspozisiyasında Dünya təsviri və tətbiqi sənətinin bütün növlərini dolğun şəkildə əks etdirən Qərbi Avropa, Rus, İslam, Şərq ölkələri incəsənətinin çeşidli örnəklərini görmək mümkündür. Ekspozisiya iki mərtəbədən ibarətdir. Birinci mərtəbə - Qədim dünya incəsənəti, İran-Türk, Çin, Rus (avanqard) və Zərifə xanım Əliyevaya həsr edilmiş "Xatirə zalı”, İtaliya, Flamand, Holland incəsənətinə həsr edilib. Eyni za­manda I mərtəbənin dəhliz hissələrində - Fransa-Almaniya qrafika nümunələri, digərində - İran və Hindistan miniatür və heykəltəraşlıq əsərləri nümayiş edilir.
Ekspozisiyanın ikinci mərtəbəsi - İtaliya, "İslam incəsənəti”, Alman, Fransa rəngkarlığı və Rusiya incəsənətinə həsr edilib. Ekspozisiyada eyni zamanda metal, çini, xalça və bədii tikmə nümunələri nümayiş edilir. Ən qədim eksponatlar antik dövrdən başlayaraq - XX əsrin sonlarına qədərki dövrü əhatə edir.
Eyni zamanda 17 may tarixində Azərbaycan Milli İncəsənət Muzeyində Azərbaycan Respublikasının Mədəniyyət Nazirliyinin sifarişi ilə hazırlanmış və ilk dəfə ölkə ərazisində yerləşən bütün muzeylər haqqında məlumatları özündə cəmləşdirən "Museum.az” saytının təqdimat mərasimi keçiriləcəkdir.
Saytın sadə, eyni zamanda zövqlə hazırlanmış dizaynı istifadəçilərə təqdim olunan məlumatların daha rahat əldə olunması üçün layihələndirilmişdir.
İstifadəçilərin rahatlığı üçün gələcəkdə müasir veb tendensiyalar da nəzərə alınaraq, saytın mobil versiyası və tətbiqetmələrinin də hazırlanması nəzərdə tutulmuşdur.
banner

Oxşar Xəbərlər