Müvəffəqiyyətli karyera üçün xaricdə təhsil mütləq şərtdirmi?
Öncə
"xaricdə təhsil” sözləri haqqında kiçik açıqlama vermək istəyirəm. Əgər daha
öncələr "xaricdə təhsil” deyəndə ağlımıza xarici dil bilən və illərini oxumağa
verən insanlar gəlirdisə, indi vəziyyət dəyişib. İnsanların zəhmət çəkməkdən
diplom almaq sevdası və bu sahənin də kommersiyalaşması nəticəsində Rusiya və
ya Ukraynada "təhsil” alan insanlar rusca danışa bilmirlər və ya İngiltərənin bəzi
universitetlərində oxuyanlar bir neçə il orada yaşamaqlarına baxmayaraq, nə dilə
hakim olurlar, nə də biliklərə. Ona görə də təklif edirəm ki, bu sualda olan
"xarici təhsil” sözlərini "xaricdə keyfiyyətli təhsil” olaraq qəbul edək.
Sözsüz
ki, xaricdə təhsil ölkəmizdə olan təhsildən fərqlidir və bir çox məqamlarda
daha da üstündür – həm universitetlərin müasir texnikası, həm müəllimlərin
kvalifikasiyası və ya təcrübəli, müasir nəzəri və praktiki biliklərə malik
olmaları baxımından. Texniki fənlər üzrə universitetlərin laboratoriya və təcrübi
bilik alma imkanları təbii ki, daha genişdir.
Əlbəttə,
xaricdə təhsil almaq həm müasir nəzəri, həm praktiki biliklərin alınması
baxımından daha da geniş imkanlar verir. "Müvəffəqiyyətli olmaq üçün xaricdə təhsil
almaq şərtdirmi?” sualına cavabım isə "Qətiyyən yox”dur. Yox və bir daha yox.
Xarici
dildə fikirlərini ifadə edə bilməyən, bilik bazası çox dar olan və Qərbdəgözəl
adları olan universitetlərdə "oxumuş” saysız insanlar görmüşəm. Bununla bərabər,
ölkəmizdə sadə bir dövlət universitetində təhsil almış çox sayda gənclər görmüşəm
ki, öz bilik və bacarıqlarını özləri inkişaf etdiriblər.
Burada
çox vacib olan məqam budur ki, universitetin bir tələbəni təmin edə biləcəyi
imkanlar qədər bir gəncin özünü inkişaf etdirmə istəyi də vacibdir. İnsan
oxumayacaqsa, zəhmət çəkməyəcəksə, məsuliyyət hissi və nizam-intizamı, iradə
gücü və zəhmətçəkmə istəyi olmayacaqsa, vaxtını boş keçirməyi xoşlayacaqsa, gələcəyi
üçün məqsədləri yoxdursa, onun harada mövcud olması, təhsil alması çox da vacib
deyil. İstər Amerikada olsun, istər Bakıda – belə bir insan öz həyat tərzinə olduğu kimi davam edəcək. Əgər bir insan tənbəldirsə,
iradəsiz və nizam-intizamsızdırsa, o, bu xüsusiyyətlərini özü ilə bərabər
Amerikaya da, Almaniyaya da aparacaq. Hər yerdə özünü səthi və rahat aparacaq.
Nəticədə isə onlarla xaricdə təhsil almış insanda gördüyüm hal olacaq – ancaq
xarici dil biləcək və sahib olduğu xarici dil akademik və ya peşəkar terminlərlə
dolu olmayacaq. Yəni o dili də küçə səviyyəsində biləcək.
Təbii
ki, mən Qərb təhsilinin dəyərini azaltmaq istəmirəm. Demək istədiyim odur ki, Qərbdə
təhsil almaq, uğurlu olmaq üçün mütləq və yeganə şərt deyil. Universitetlərdə dərs
deyən müəllimlər nə qədər peşəkar olsalar da, tələbənin şəxsən özünün əzmkarlığı,
bilik aclığı və inkişaf etmə istəyi, zəhmət çəkmə vərdişi və daxili
nizam-intizamı olmasa, təhsilin çox da faydası olmayacaq.
Bir
çox insan üçün zəif maddi imkanlar bəhanə olur. Müasir elektron vasitələr və
texnologiyalar dövründə bir insanın özünü inkişaf etdirməsi üçün bütün imkanlar
var.
Xarici
dilmi öyrənmək istəyirsiniz? İstər şəhərimizdə, istərsə də internetdə xarici
dil öyrənməyə dəstək olan kifayət qədər pulsuz kurslar var. Öyrəndiyiniz xarici
dildə ədəbiyyatmı lazımdır? Buyurun, online kitabxanalardan endirin.
İdarəçilik
sahəsində biliklərinizi artırmaqmı istəyirsiniz? Menecmentin əsaslarından
müasir liderlik nəzəriyyələrinə qədər bütün idarəçilik mövzularında kitablar və
məqalələri internetdə tapmaq çox sadədir.
Dünyanın
tanınmış və bahalı təlimçilərinin təlimlərindəmi iştirak etmək istəyirsiniz?
Onlar Sizə əslində çox yaxındırlar – yetər ki, youtube.com saytına daxil olun və
adlarını yazın.
Bir məqamı daha qeyd etmək istəyirəm:
o qədər "xaricdə” oxumuş insanlar görmüşəm ki, küçə ingiliscəsindən başqa heç nə
bilmirlər. Çünki insan oxuyan deyilsə, Amerikada da, İngiltərədə də zamanını
boşa keçirəcək. Bununla bərabər, bizim ölkədə mən çox sayda universitet
bitirmiş ÇOX savadlı və bacarıqlı insanlar görmüşəm. Və unutmayın ki, Qərb
dünyasında hər universitet Harvard və ya Stanford deyil.
Xarici
təhsil uğurun təminatı deyil : sadəcə, doğru istifadə olunduqda, yalnız şansları
artırır.
Məsələ
məqsədlərimizdədir. Baxaq görək biz qısamüddətli zövqlərimizi uzunmüddətli məqsədlər
üçün qurban verə bilirikmi?
Məsələ
bizim fiziki olaraq harada olmağımızda deyil, mövcud imkanlardan necə istifadə
etməyimizdədir.
Fəxri Ağayev,
peşəkar idarəçi