“Müstəqil Azərbaycan hər bir vətəndaşımız üçün qürur mənbəyidir”
1918-ci il may ayının 28-də
müsəlman Şərqində ilk Demokratik Cümhuriyyət yaradılıb. Məhz həmin tarixdə
Azərbaycanın müstəqilliyini bəyan edən İstiqlal bəyannaməsi qəbul edilib.
Azərbaycan XX əsrin sonlarında müstəqilliyini ikinci dəfə bərpa etdikdən sonra
28 May tarixi Azərbaycanda Respublika Günü kimi qeyd olunmağa başlayıb. Bu il
isə həmin əlamətdar hadisənin baş verməsinin 100 ili tamam olur. Azərbaycan
Xalq Cümhuriyyətinin (AXC) 100 illik yubileyi münasibətilə Heydər Əliyev
Mərkəzində rəsmi qəbul təşkil olunub. Prezident İlham Əliyev və birinci xanım
Mehriban Əliyeva rəsmi qəbulda iştirak ediblər. Rəsmi qəbulda geniş nitq
söyləyən Prezident İlham Əliyev bütün Azərbaycan xalqını AXC-nin 100 illiyi
münasibətilə təbrik edib. Bildirib ki, Azərbaycan dövləti AXC qurucularının
xatirəsinə böyük hörmətlə yanaşır. Cəmi 23 ay fəaliyyət göstərən AXC-nin böyük
işlərə imza atdığını, o cümlədən 200-dən artıq qanun qəbul etdiyini xatırladan
Prezident İlham Əliyev deyib ki, əgər 1920-ci ildə müstəqillik əldən
verilməsəydi, bu gün Azərbaycan dünyanın ən zəngin və ən inkişaf etmiş
ölkələrinin sırasında ola bilərdi. Dövlət başçısının sözlərinə görə,
Azərbaycanın təbii ehtiyatları, coğrafi ərazisi imkan verib ki, təbii
resurslardan səmərəli şəkildə istifadə etmək mümkün olsun: "XIX əsrin ikinci
yarısında - XX əsrin əvvəllərində dünya neft hasilatının böyük hissəsi məhz
Azərbaycanda, Bakıda təmin edilmişdir. Əfsuslar olsun ki, biz müstəqilliyi
itirdik. Bu, bir daha onu göstərir ki, müstəqilliyi qoruyub saxlamaq onu əldə
etməkdən daha çətin işdir. 1918-ci ildə qaldırılmış bayraq 1920-ci ildə
endirildi və onu bir də o tarixdən 70 il sonra Naxçıvanda, Naxçıvanın Ali
Məclisinin sessiyasında ulu öndər Heydər Əliyev qaldırmışdır. XX əsrdə
Azərbaycan iki dəfə müstəqilliyə qovuşmuşdur, ikinci dəfə 1991-ci ildə. Bu da
tarixi şans idi və Sovet İttifaqının dağılması nəticəsində Azərbaycan ikinci
dəfə müstəqil ölkə kimi yaşamağa başlamışdır”.
Tariximizin
qara ləkəsi, rüsvayçılıq illəri
Prezident bildirib ki, müstəqilliyimizin
ilk illəri ölkəmiz üçün faciəli, çox ağır illər kimi tarixdə qalıb: "Azərbaycan
rəhbərliyində olan qüvvələr 1991-1993-cü illərdə ölkəmizi lazımi səviyyədə
idarə edə bilməmişlər. Onların üzərinə düşən yüksək məsuliyyəti dərk etməmişlər
və gənc müstəqil dövləti demək olar ki, idarəolunmaz vəziyyətə salmışdılar.
1991-1993-cü illərdə Azərbaycanda yaşanan xoşagəlməz hadisələr, hallar
ölkəmizin müstəqilliyini sual altına qoymuşdur. Ölkəmizdə xaos, anarxiya,
özbaşınalıq hökm sürürdü. AXC-Müsavat hakimiyyəti talançılıqla məşğul idi.
Torpaqlarımız işğal altına düşmüşdür və bununla bağlı çoxsaylı
qaçqınlar-köçkünlər yaranmışdır. AXC-Müsavat hakimiyyəti qardaş qanı axıtdı,
vətəndaş müharibəsinə start verdi və bu, xalqımızın böyük faciəsi idi. Bir
sözlə, o illər bizim tariximizdə qara ləkədir, rüsvayçılıq illəridir”.
Azərbaycanın
dövlət müstəqilliyinin banisi
Prezident İlham Əliyev
deyib ki, Azərbaycan xalqı həmin illərdə öz liderinə - Heydər Əliyevə müraciət
edib, onu hakimiyyətə gətirib və nə qədər müdrik xalq olduğunu bir daha dünyaya
nümayiş etdirib: "1993-cü il tariximizdə dönüş nöqtəsi olmuşdur. Əslində, bizim
müstəqil tariximiz o ildən başlamışdır. Çünki 1991-1993-cü illərdə müstəqillik
formal, şərti xarakter daşıyırdı. Azərbaycan demək olar ki, xaricdən idarə
olunurdu. Biz hamımız bunu yaxşı bilirik. Ona görə Azərbaycan xalqı haqlı
olaraq Heydər Əliyevi Azərbaycanın dövlət müstəqilliyinin banisi, Azərbaycan
dövlətinin qurucusu kimi tanıyır və bu, tarixi həqiqətdir. 1993-cü ildən
başlayaraq bu günə qədər Azərbaycan, sözün əsl mənasında, müstəqil həyat
yaşayır.
Milli
maraqlar üzərində qurulan siyasət
Prezident İlham Əliyev 2003-cü
ildən sonra Azərbaycanın dinamik inkişafının təmin edildiyini diqqətə çatdırıb.
Bildirib ki, ötən illər ərzində güclü, qüdrətli dövlət qurulub: "Bu gün
Azərbaycan, sözün əsl mənasında, müstəqil siyasət aparan ölkədir. Bu gün dünya
xəritəsində belə ölkələrin sayı o qədər də çox deyil. Xüsusilə biz ərazisi,
əhalisi o qədər də böyük olmayan ölkələrə fikir versək görərik ki, müstəqil
siyasət aparmaq iqtidarında olan ölkələr o qədər də çox deyil. Biz tam müstəqil
siyasət aparırıq. Bizim siyasətimiz milli maraqlar üzərində qurulubdur.
Azərbaycan xalqının maraqları bizim siyasətimizin mənbəyidir, onun əsasıdır.
Kənardan bizim siyasətimizə təsir etmə imkanları sıfıra bərabərdir. Bunu yaxın
tarix göstərib”.
Tarixi
torpağımızda ikinci erməni dövləti yaradılmayacaq
Ermənistan-Azərbaycan,
Dağlıq Qarabağ münaqişəsi ilə bağlı son illər ərzində aparılan işlərdən söhbət
açan dövlət başçısı vurğulayıb ki, həyata keçirilən tədbirlər münaqişənin həlli
üçün hüquqi bazanı daha da genişləndirib: "BMT Təhlükəsizlik Şurasının dörd
qətnaməsi və ATƏT-in qərarları, əlbəttə, bu hüquqi bazanın əsasını təşkil edir.
Həmçinin 2003-cü ildən bu günə qədər digər beynəlxalq təşkilatlar oxşar qərar
və qətnamələr qəbul etmişlər. Onların arasında Qoşulmama Hərəkatı, İslam
Əməkdaşlıq Təşkilatı, Avropa Parlamenti, Avropa Şurası Parlament Assambleyası,
GUAM, ECO və digər təşkilatlar var. Bu, münaqişənin həlli üçün hüquqi bazanın
yaradılması deməkdir. Biz münaqişənin həlli üçün iqtisadi zəmin də yaratmışıq,
güclü ordu formalaşdırmışıq. Görülən kompleks tədbirlər nəticəsində Azərbaycan
bu məsələ ilə bağlı siyasi və diplomatik üstünlüyü tam təmin edibdir. Məhz
bunun nəticəsidir ki, nə qədər dünya erməniliyi çalışsa da, heç bir dövlət
qanunsuz Dağlıq Qarabağ rejimini tanımayıb. Biz yaxşı bilirik ki, bu gün
beynəlxalq hüququn normaları bir çox hallarda pozulur, işləmir. Güc amili ön
plana çıxır və bu, reallıqdır. Ona görə dünya birliyinin Ermənistan-Azərbaycan,
Dağlıq Qarabağ münaqişəsi ilə bağlı bizim mövqeyimizi dəstəkləməsi böyük
nailiyyətimizdir. Hesab edirəm ki, beynəlxalq hüququn normalarından başqa,
burada güclü Azərbaycan amili dayanır. Bizə hörmət artır, bizim işimizə
göstərilən rəğbət göz qabağındadır. Belə bir vəziyyətdə heç bir ölkə qanunsuz
rejimlə heç bir əlaqə qura bilməz və biz buna heç vaxt imkan verməyəcəyik. Biz
heç vaxt imkan verməyəcəyik ki, tarixi torpağımızda ikinci erməni dövləti
yaradılsın. Ermənistan-Azərbaycan, Dağlıq Qarabağ münaqişəsinin həllinin bir
yolu var, o da Azərbaycanın beynəlxalq birlik tərəfindən tanınan ərazi
bütövlüyünün bərpasıdır”.
Dünyanın
nəqliyyat mərkəzlərindən birinə çevrilmək
Prezident İlham Əliyev Azərbaycan
Silahlı Qüvvələrinin dünyanın ən güclü 50 ordusu sırasında olmasına da diqqət
çəkib. Bildirib ki, Azərbaycan ordusunun həm maddi-texniki təchizatı, həm də
döyüş qabiliyyəti ən yüksək səviyyədədir. Dövlət başçısı son 15 il ərzində
iqtisadi inkişafımızın dünya miqyasında rekord səviyyədə olduğunu da
xatırladıb. Deyib ki, Azərbaycan iqtisadiyyatı 3,2 dəfə artıb və bu, dünya
miqyasında analoqu olmayan inkişafdır. O, son 15 il ərzində 3 mindən çox
məktəb, 600-dən çox tibb ocağı, 40-dan çox Olimpiya mərkəzi tikildiyini
söyləyib. Prezident İlham Əliyev Azərbaycanın dənizləri neft–qaz kəmərləri ilə
birləşdirdiyini vurğulayıb. Deyib ki, tarixdə ilk dəfə olaraq Xəzər dənizi Qara
dənizlə, Aralıq dənizi ilə neft kəmərləri vasitəsilə birləşib. Məhz
Azərbaycanın təşəbbüsü ilə Bakı-Tbilisi-Ceyhan, Bakı-Tbilisi-Ərzurum,
Bakı-Supsa neft və qaz kəmərləri inşa edilib. Prezidentin sözlərinə görə, enerji
təhlükəsizliyi baxımından Azərbaycan nəinki regionda, dünya miqyasında önəmli
ölkəyə çevrilib. Ölkə rəhbəri qeyd edib ki, Azərbaycan nəqliyyat
infrastrukturunu yaratmaqla qitələri birləşdirib və açıq dənizlərə çıxışı olmayan
Azərbaycan bu gün dünyanın nəqliyyat mərkəzlərindən birinə çevrilir. Onun
fikrincə, Bakı-Tbilisi-Qars dəmir yolu, nəqliyyat infrastrukturu ilə bağlı
digər layihələr, Xəzərin ən böyük limanı olan Ələt Limanının işə düşməsi,
"Şimal-Cənub” nəqliyyat dəhlizinin yaradılması istiqamətində atılmış addımlar
Azərbaycanı dünyanın nəqliyyat mərkəzlərindən birinə çevirmək məqsədi daşıyır.
Hər
bir azərbaycanlı bu dövlətlə fəxr edir
Prezident İlham Əliyev Azərbaycanın
idman sahəsində də dünyanın aparıcı ölkələrinin sırasında olduğunu xatırladıb.
Qeyd edib ki, idmançılarımız Avropa, dünya çempionatlarında, Olimpiya
Oyunlarında yüzlərlə medal qazanıb. Son olaraq 200-ə yaxın ölkənin iştirak
etdiyi Olimpiya Oyunlarında medalların sayına görə Azərbaycan dünya miqyasında 14-cü
yerdə qərarlaşıb. Dövlət başçısının sözlərinə görə, bütün bu uğurlar görülən
işlərin, aparılan düzgün siyasətin, xalqımızın istedadının, xalqla iqtidar
arasında birliyin nəticəsidir: "Bu gün hansı sahəyə baxsan inkişaf var, tərəqqi
var və gələcək dinamik inkişaf üçün aydın baxışlar var. Bu gün müstəqil
Azərbaycan hər bir Azərbaycan vətəndaşı üçün qürur mənbəyidir. Biz Azərbaycan
Xalq Cümhuriyyətinin qurucularının arzularını reallığa çevirdik. Biz elə bir
dövlət qurduq ki, əminəm, hər bir Azərbaycan vətəndaşı, hər bir azərbaycanlı bu
dövlətlə fəxr edir. Mən tam əminəm ki, əgər Azərbaycan Xalq Cümhuriyyətinin
qurucuları bugünkü Azərbaycanı görə bilsəydilər, onlar da ölkəmizlə fəxr
edərdilər”.
Rufik
İSMAYILOV