• cümə axşamı, 28 mart, 21:55
  • Baku Bakı 13°C

“Musiqinin özü də bir siyasətdir”

28.11.18 10:30 1851
“Musiqinin özü də bir siyasətdir”
Müasir Azərbaycanın inkişafında gənclərin rolu danılmazdır. O gənclər ki, beynəlxalq yarışlarda iştirak edir, festivallarda ölkəmizi tanıtmağı qarşılarına məqsəd qoyurlar. Qarşılarına qoyduqları məqsədə isə addım-addım yaxınlaşırlar. İlk dəfə bir neçə il bundan öncə "Kaspi”nin "Debüt” rubrikasında həmsöhbət olduğumuz Elvina Qurbanova bu gün dünyanın müxtəlif ölkələrində keçirilən beynəlxalq musiqi yarışlarında iştirak edir. O, qardaşı Nail Qurbanov ilə birlikdə Azərbaycan musiqisini bütün dünyaya yayır.Bu dəfə isə gənc ifaçılar Nyu Yorkda keçirilən "Florida Keys International Music Competition” musiqi yarışında qalib olublar. Elvina Qurbanova ilk təəssüratlarını bizimlə bölüşdü. Qeyd edək ki, skripka ifaçısı olan Elvina təhsili ilə əlaqədar Los Ancelesə köçüb və orada "Beynəlxalq əlaqələr” ixtisası üzrə təhsilini davam etdirir.
- Elvina xanım, Los-Ancelesdə keçirilən "Beverly Hills İnternationalmusic festival”dakı qalibiyyətinizdən sonra sizi Nyu Yorka daha bir beynəlxalq musiqi yarışmasında gördük.
- Bəli. Əvvəla, sizin timsalınızda Azərbaycan mediasına təşəkkür edirəm. Çünki burada əldə etdiyimiz uğurları yerli mətbuatımız işıqlandırır və biz buradan haqqımızda yazılan xəbərləri oxuyub şad oluruq. O ki qaldı festivala, festival bizim üçün geniş bir meydandır. Hansı ki, biz bu meydanda özümüzü göstərə, ölkəmizi təbliğ edə bilirik. Festivalda dünyanın müxtəlif ölkələrindən gələn həmyaşıdlarımızla tanış oluruq. Festival bizə dost qazandırır. Hər kəs bir fərddir. Məhz o fərdin sayəsində ölkənin mədəniyyəti, adət-ənənələri ilə tanış olmaq imkanı qazanırıq. Bir festivalda iştirak etməklə orada iştirak edən dünyanın digər ölkələrindən gəlmiş iştirakçıların ölkələri ilə də qiyabi də olsa tanış olmaq şansı əldə edirik. Bir də ki, musiqiçi sözünü musiqi ilə deməlidir. Musiqi isə sərhəd tanımır. Biz də bu sərhədləri aşmağa və uzaq-uzaq diyarlarda "biz də varıq” deməyə cəhd göstəririk. İstəyimizə haradasa nail də oluruq. Təbii ki, bu festivallarda iştirakımızın da öz məqsədi var.Sonuncu dəfə noyabrın 17-də "Florida Keys International Music Competition” musiqi yarışında iştirakımız isə təsadüf nəticəsində baş verdi. Belə ki, iyunda seçim turlarında iştirak etdik. Orada qardaşım Nail Qurbanovla mənim ifamı çox bəyəndiklərini bildirdilər və biz finalda iştirak etmək üçün vəsiqə qazandıq. Nail vokal üzrə seçildi. Onun skripka fəaliyyəti də var. Seçim turundan sonra Nyu Yorka "Carnegie Hall”-da keçirilən qala gecəsinə dəvət aldıq. Bu musiqi yarışı Amerikada kifayət qədər nüfuzlu və bir o qədər də məşhur bir yarışmadır. Biz bu yarışda iştirakımız üçün məmnunuq.Bundan öncə qatıldığımız "Beverly Hills İnternationalmusic festival”ı hələ də iştirakçıların xatirələrindədir. Həmin festival15 ildir ki, keçirilir. 15 ildə ilk dəfə olaraq, festivala ötən il Azərbaycandan da iştirakçılar qatılmışdı. Dünyanın tanınmış solistləri, böyük klassik musiqinin şahzadələri tərəfindən ustad dərsləri də keçirilmişdi. Həmin festivalın təntənəli açılışı və bağlanışı məhz Naillə mənə həvalə olunmuşdu.
- "Florida Keys International Music Competition” musiqi yarışında nə ifa etdiniz?
- Müsabiqədə skripkada Pablo de Sarasatenin "Gypsy Airs –if”-ini səsləndirdim. Bu da tamaşaçıların alqışına səbəb oldu. Zalda əyləşən tamaşaçılar böyük ruh yüksəkliyi ilə dinləyirdilər. Onlar konsert sonrası bizə yaxınlaşıb, öz təəssüratlarını bölüşür, təbrik etdilər. Hətta Nail Nyu Yorkda "Carnegie Hall”-da keçirilən qala gecəsinə sonra daha iki konsert proqramı ilə çıxış etdi.
- Adətən festivalda qalib olmur, ancaq müsabiqədə müxtəlif nominasiyalar mövcud olur. Siz hansı nominasiyanın qalibi oldunuz?
- İştirakçısı olduğumuz "Florida Keys International Music Competition” musiqi yarışmasının öz qanunları var. Belə ki, müsabiqənin professional kateqoriyası (A) peşəkar musiqiçilər üçün nəzərdə tutulub. Bu, gələcəkdə özünü peşəkar musiqiçi kimi görmək arzusunda olanlara aiddir. Həvəskar kateqoriyası (B) isə musiqiyə yeni həvəs göstərənlər üçündür. O kəslər ki, ilk addımlarını musiqi sahəsində atmaq arzusundadırlar. Əqli və fiziki cəhətdən zəif olan iştirakçılar üçün S kateqoriyası var. Mən skripka üzrə A, Nail Qurbanov isə vokal üzrə A kateqoriyasının qalibi olduq. Bizə ən ali mükafatlar təqdim olundu.
- Qeyd etdiniz ki, festivallarda iştirakımızın öz məqsədi var. Bu nə məqsədi daşıyır?
- Bilirsiniz ki, Los Ancelesdə "Beynəlxalq əlaqələr” üzrə təhsil alıram. Əvvəllər elə düşünürdüm ki, siyasətçi olsam, Azərbaycan həqiqətlərini dünyaya daha tez bəyan edə bilərəm. Ancaq dünyanı gəzdikcə gördüm ki, musiqiçi fəaliyyətimi genişləndirsəm, daha böyük kütləni əhatə edən bir səhnədə və dünyanın müxtəlif ölkələrindən gələn insanlara sözümü daha rahat və tez bir şəkildə deyə bilərəm. O insanlara deyəcək sözüm var. Bunun üçün festivallara üz tuturam. Hazırda hər iki təhsilimi davam etdirirəm. İştirak etdiyim hər bir müsabiqədə, festivalda hardan gəldiyimi, mənim ölkəmin necə bir yer olduğunu deyirəm. Hər bir festivala öz bayrağımızı aparıram. Onun mənasından, rəmzlərindən bəhs edirəm. Festivallar isə belə böyük bir arenada sözümü demək üçün ideal bir məkandır. Bunu üzərimə bir missiya olaraq götürmüşəm və layiqincə yerinə yetirməyə çalışıram.
Hazırda Amerikada yaşasaq da, ürəyimiz vətən üçün döyünür. Hər yay anam məni Azərbaycana gətirir, istirahətimi məhz vətəndə keçirirəm. Adətən insanlar yay aylarında xaricdə istirahət etməyi düşünəndə, mən vətəndə istirahət edirəm. Çünki vətənin qoxusu, havası mənə güc verir. Ayağım torpağımda olanda daha güclü və daha möhkəm oluram. Çünki vətənimdən, torpağımdan güc alıram. Vətənə gəldikdə isə, sosial layihələr həyata keçirir, boş dayanmıram. Sosial layihələr dedikdə, kimsəsiz, şiddətə məruz qalan uşaqlarla görüşürəm. Onlara musiqi dərsləri keçirəm. Musiqinin insan həyatındakı rolundan danışırıq.
- Siyasət və musiqi yaxın sahələr deyil. İkisinin arasında ortaq nöqtəni necə tapırsınız?
- Əksinə, mən musiqidə də siyasətin tərəfdarıyam. Diqqətlə baxsanız, musiqinin özünün də bir siyasət olduğunu görərsiniz. Çünki təkcə Amerikada bir neçə festival və müsabiqələrdə iştirak etmişik. Onların hamısında öz həmyaşıdlarımıza Azərbaycanın necə bir ölkə olduğunu, harda yerləşdiyini, torpaqlarımızın kim tərəfindən işğal olunduğunu, xalqımızın başına gətirilən hadisələrdən danışmışıq. Bizim iştirak etdiyimiz festivallarda isə təkcə Amerika vətəndaşları deyil, dünyanın müxtəlif ölkələrindən nümayəndələr olur. Onlar da gedib öz dostlarına danışacaqlar və beləliklə, mən öz missiyamı yerinə yetirmiş olacam. Hesab edirəm ki, bu gənc yaşımda bir siyasətçi kimi bunları edə bilmərəm. Ancaq musiqiçi kimi bunları edə bilirəm. Əgər söhbət vətənin təbliğatından gedirsə, burada gənc, yaşlı, qoca söhbəti olmamalıdır. Amerikaya ilk gəlişimdə gördüm ki, orada bizim ölkəmiz, tutduğumuz mövqe haqda çox az insan məlumatlıdır. Təbii ki, bir Azərbaycan vətəndaşı olaraq bu mənə təsir edirdi. Əvvəllər getdiyim musiqi festivallarında bizi ya Türkiyə, ya da İran vətəndaşı kimi qəbul edirdilər. Ancaq indi Prezident İlham Əliyev və Birinci vitse-prezident Mehriban Əliyevanın rəhbərliyi ilə ölkəmizin xarici siyasəti nəticəsində Azərbaycanımız sərhədlərimizdən kənarda da tanınır. Mehriban Əliyevanın muğamımıza, tarımıza, milli musiqimizə və milli-mənəvi dəyərlərimizə verdiyi qiymətin nəticəsini biz buradan hiss edirik. Amerikada fəaliyyət göstərən səfirliyimizin də bu işdə rolu danılmazdır. Belə ki, davamlı olaraq "Azərbaycan günləri” keçirir, dahi sənətkarlarımızın anım gününü qeyd edirlər. Ancaq hesab edirəm ki, təbliğat üçün nə qədər iş görülsə, yenə də azdır. Bu işdə bizim də az da olsa payımız varsa, özümüzü xoşbəxt hesab edərik. Bunun üçün də əlimizdən gələni edirik.
Onu da deyim ki, musiqi ruhla bağlı bir anlayış olsa da, burada gen faktorunun da böyük rolu var. Azərbaycanın dahi bəstəkarı Üzeyir Hacıbəylinin yetirmələriyik. Onun nəslindən olan törəmələrik. Bəlkə də bu istedad bizə oradan gəlib.
Xəyalə Rəis
banner

Oxşar Xəbərlər