Mümkün şərt və imkanların milli maraqlar üçün səfərbər edilməsi
Məlumdur ki, ilk dəfə 1918-ci ildə Şərqin ilk demokratik cümhuriyyəti
olan Azərbaycan 70 il sonra 1991-ci il oktyabrın 18-də yenidən müstəqilliyinə
qovuşdu. Bu illər ərzində bir çox mövzularda uğurlar əldə edildi, nailiyyətlər
qazanıldı. Azərbaycan beynəlxalq əlaqələrini genişləndirərək nüfuzlu dövlətə
çevrildi və özünə çoxlu dostlar qazandı. Təsadüfi deyil ki, prezident İlham
Əliyev müstəqilliyimizin 25 illiyi ilə bağlı toplantıdakı çıxışında ölkəmizin dünya
miqyasında böyük rəğbətə malik olan bir ölkə olduğunu diqqətə çatdırıb. Üzv
olduğumuz bütün beynəlxalq təşkilatlarda da bizim sözümüzün böyük çəkisi var: "Ermənistan-Azərbaycan,
Dağlıq Qarabağ münaqişəsinin həlli yolunda Azərbaycanın prinsipial mövqeyi
dəyişməz olaraq qalır. Bu mövqe daha çox beynəlxalq dəstək qazanır. Artıq dünya
ictimaiyyəti bilir ki, reallıq nədən ibarətdir. Yəni, bizim torpaqlarımız işğal
altındadır. BMT Təhlükəsizlik Şurasının, digər təşkilatların qətnamələri icra
edilmir. Dağlıq Qarabağ münaqişəsinin ədalətli, beynəlxalq hüquq əsasında həll
edilməsi bizim prinsipial mövqeyimizdir. Bütün dünya Azərbaycanın ərazi
bütövlüyünü tanıyır və dəstəkləyir. Beynəlxalq münasibətlər istiqamətində bizim
hörmətimizi əks etdirən tarixi hadisə isə bir neçə il bundan əvvəl baş verib.
Azərbaycan BMT Təhlükəsizlik Şurasına üzv seçilib. Bu hadisə təkcə ona görə
önəmli deyil ki, biz dünyanın ali orqanına seçildik və orada iki dəfə sədrlik
etdik. Ona görə önəmlidir ki, dünyanın 155 ölkəsi bizə səs verdi, özü də çox
ağır mübarizə şəraitində. Dünya birliyi bu gün də bizi dəstəkləyir”.
Azərbaycanın tutduğu orta yol, yəni balanslı xarici siyasət yürütmə
bacarığı isə müstəqillik dövründə verilən ən düzgün qərar kimi
qiymətləndirilir. Bildirilir ki, ölkəmizin yerləşdiyi mürəkkəb siyasi region bu
cür davranışı tələb edir. Balanslı xarici siyasət konsepsiyasının mahiyyəti uzaqgörənlik
hesab olunur və hər kəslə normal münasibətlər qurulmasına hesablanır, beynəlxalq
əməkdaşlığın genişlənməsinə xidmət edir.
Mövzu haqda fikirlərini "Kaspi” ilə bölüşən millət vəkili Hikmət Babaoğlu dedi ki, Azərbaycanın xarici
siyasətini səciyyələndirərkən onu, əsasən balanslaşdırılmış xarici siyasət kimi
xarakterizə edirlər və bu, tamamilə doğrudur: "Düşünürəm ki, Azərbaycanın
daxili siyasətini də balanslaşdırılmış siyasət kimi şərh etmək mümkundür. Elə
multikulturalizm siyasəti də nəticə etibarilə balanslaşdırılmış etnik mədəni münasibətlər
sisteminin məcmusu kimi qarşımıza çıxır. Bu siyasi strategiyanın müəllifi böyük
dövlət xadimi, Ulu Öndərimiz Heydər Əliyevdir. Siyasi nəzəriyyələrdə
balanslaşdırılmış siyasət termini əvəzinə, daha çox tarazlaşdırılımış siyasət
termini işlədilir ki, bu da, əslində eyni məzmunu ifadə edir”.
Millət vəkilinin fikrincə, siyasi leksikon bir az populizmi sevdiyi
üçün hazırda biz daha çox balanslaşdırılmış sözündən istifadə edirik: "Bu
siyasi strategiyanın mahiyyəti mümkün bütün şərtlər və imkanlar arasında bir
tarazlıq yaratmaqla onu milli maraqlar üçün səfərbər etməkdir. Müstəqilliyimizin
25 illik tarixinə nəzər saldıqda da, əsas məsələlərdən biri kimi məhz bu
siyasət diqqətimizi cəlb edir. Prezidentin ictimai-siyasi məsələlər üzrə
köməkçisi, professor Əli Həsənov "Azərbaycan 25 ildə özünü tam təmin edən bir
dövlət olaraq formalaşıb və öz inkişafını uğurla davam etdirir” adlı
məqaləsində qeyd edir ki, müstəqillik tariximizi şərh edən Prezident İlham
Əliyev onu üç dövrə ayırdı. Bu dövrlər müvafiq olaraq 1991-1993; 1993-2003 və
2003-2016-cı illəri əhatə edir. Bu bölgüdən də göründüyü kimi, müstəqillik
tariximizin son 23 ilində əldə etdiyimiz uğurların hamısında balanslaşdırılmış
siyasətin çox böyük rolu var. Ekspertlər ölkəmizin müasir beynəlxalq
münasibətlər sistemindəki yerini və rolunu xarakterizə edərkən bu məkanı dialoq
və əməkdaşlıq məkanı kimi qiymətləndirirlər. Dialoq və əməkdaşlığın tərsi isə
qarşıdurma və ziddiyyətdir. Azərbaycan dialoq və əməkdaşlıq ölkəsi kimi tanınırsa,
deməli, bu, bizim nailiyyətimizdir, tarazlaşdırılmış siyasətin nəticəsidir. Eyni
məntiqlə biz ölkəmizin siyasi, iqtisadi, sosial inkişafının bütün sferalarını bütün
parametrlər üzrə balanslaşdırılmış siyasətin nəticəsi kimi səciyyələndirə
bilərik”.
Politoloq Qabil Hüseynli də
balanslaşdırılmış siyasətin təməlinin mərhum prezident Heydər Əliyev tərəfindən
qoyulduğunu xatırlatdı: "Məncə, bu, regionda ən düzgün siyasət budur.
Azərbaycan bloklara qoşulmayan ölkələr hərəkatının üzvüdür. Öz müstəqilliyini,
suverenliyini təmin etmək üçün balanslaşdırılmış, tarazlaşdırılmış siyasət
həyata keçirir. Bu siyasət imkan vermir ki, Azərbaycan hər hansı bir dövlətin
təsiri altına düşsün. Çünki bunun nəticəsində onun suverenliyi üçün xoşagəlməz
hal yarana bilər. Azərbaycan yürütdüyü bu siyasət sayəsində həm Rusiya, həm də
İranla münasibətləri qoruyur, özünü müəyyən təsirlərdən mühafizə edə bilir. Ölkəmiz
bu xarici siyasətlə beynəlxalq aləmdə nüfuz qazana bilir. Bunun nəticəsidir ki,
Azərbaycan BMT Təhlükəsizlik Şurasına qeyri-daimi üzv seçildi. Ölkəmiz müstəqillik
illərində yürütdüyü siyasət nəticəsində beynəlxalq münasibətlərin aktiv
oyunçusuna çevrilib. Aktiv oyunçuluq onun nüfuz və hörmətini xeyli artırıb.
Düzdür, Dağlıq Qarabağ problemi hələ həllini tapmamış qalıb və bu, Azərbaycanın
ən yaralı mövzusudur. Amma ümid edirik ki, bu məsələ də tezliklə ədalətli həllini
tapacaq”.
H.Əsgər