“Ümumerməni dilənmə kampaniyası” ilə bağlı şok detal
Bəlli olduğu kimi, bir neçə gündür ki, erməni mediası hər il ənənəvi
olaraq keçirilən "ümumerməni dilənmə kampaniyası”dan bəhs edir. Los-Ancelesdə
baş tutan marafon bu dəfə "Gəlin bunu birlikdə edək” şüarı altında keçirilib. Budəfəki
marafonda gözləntilərin əksinə olaraq xeyli az vəsait toplanılıb - cəmi 11
milyon 109 min 633 dollar. Nikol Paşinyana yaxınlığı və Rusiyaya nifrəti ilə
seçilən "1in.am” saytı iddia edir ki, ümumerməni "Ayastan” fondu tərəfindən
toplanılan vəsait hər dəfə olduğu kimi bu dəfə də işğal altında olan Azərbaycan
torpaqlarında müəyyən proqramların həyata keçirilməsinə sərf olunacaq. Sayt
yazır ki, bu vəsait hesabına Dağlıq Qarabağda xeyli strateji və taktiki yollar
inşa edilib. Lakin ardınca sayt etibarlı mənbədən əldə etdiyi informasiyanı
təqdim edir. Bildirilib ki, işğal altında olan Azərbaycan torpaqlarında alınan
xəbər həyəcan və narahatçılıq doğurur.
"Qarabağdakı hərbi hissələrdən bizə
həyəcan dolu xəbərlər daxil olur. Bəlli olur ki, zabit və əsgərləri məcburi
qaydada ümumerməni Hayastan Fonduna vəsait keçirməyə məcbur edirlər. Daha dəqiq
desək - zabitlər 5000 dram toplayıb fonda keçirməlidirlər, serjantlar- 3000,
müqavilə ilə xidmət edənlər - 1000, mülkilər isə 100 dram. Bizim informasiyaya
görə, bu tapşırığa əməl etməyən hərbçilər hərbi hissələrdə süni problemlərlə
üz-üzə qoyulacaq. Bununla yanaşı, hərbçilər bildirirlər ki, Müdafiə Nazirliyi
hər il marafon adı altında onlardan vəsait toplayır. Hər il də bundan narazılıq
edən hərbçilər olur. Əsgərlər bildirirlər ki, söhbət puldan getmir, amma sual
edirlər ki, nə üçün onlardan pul yığılmalıdır? Özü də bu hal tək Qarabağdakı
hərbi hissələrdə baş verir”.
Sayt ardınca yazır ki, bu məsələ ilə bağlı
araşdırma aparıb və bəlli olub ki, bu qayda Ermənistan ərazisindəki hərbi
hissələrdə yox, yalnız işğal altındakı torpaqlardakı hərbi hissələrdə yaşanır.
Ermənistan ordusunun mətbuat xidmətinin rəhbəri Arçrun Ovanisyan faktla bağlı
onda hər hansı bir məlumat olmadığını bildirib. Sayt əlavə edir ki, fakt biabırçı
və dəhşət doğurucudur. "Həyatını təhlükə altına atıb xidmət edən hərbçilərdən
pul yığılması milli satqınlıq deyilmi?” deyə sualla çıxış edilib. Daha sonra
bildirilir ki, əvvəlki rejimin dövründə bəlkə də bunun üstündən keçilərdi. Amma
inqilabçı şüarlarla hakimiyyətə gələn Paşinyanın idarəçiliyi dövründə belə bir
faktın üzə çıxması biabırçı addımdır. Belə bir qənaət də var ki, Paşinyan separatçı
rejimin rəhbərliyinin fəaliyyətindən narazıdır və onu özünə potensial təhlükə
kimi görür. Bundan əlavə, illər boyu separatçı bölgə üçün yığılan vəsaitlər
mənimsənilib və Paşinyan özü də bunu dəfələrlə elan edib. Sayt yazır ki, indi
hər şey dəyişib və məntiqlə belə hallar təkrarlanmamalıdır.
""Məxməri inqilab”dan
sonra belə fəaliyyət stili yolverilməzidir. Kim məsuliyyət daşıyır? Ordu
rəhbərliyi bütün bunlardan xəbərdardırmı? Hər zaman müxtəlif ranqlı məmurlar
bildirirdilər ki, ordudan, əsgər və zabitlərdən oğurluq etmək milli
satqınlardır. Manvel Qriqoryan nümunəsi ortadadır. Əldə olunan faktlar
araşdırılmalıdır. Baş nazir səlahiyyətlərini icra edən Nikol Paşinyan
həqiqətənmi orduda baş verənlərdən xəbərdardır? Belə bir sual çıxır ortaya -
onlar inqilabdan sonra necə bu cür addımlar atmağa cürət edirlər və əvvəlki kimi
fəaliyyət göstərirlər? Ya ən yüksək səviyyədə belə addımlar atmaqlarına razılıq
alıblar, ya da müstəqil şəkildə fəaliyyət göstərirlər. Ya da ola bilsin inqilab
hələ Qarabağa gəlib çatmayıb”, - deyə müəllif narahatçılığını ifadə edir. Sayt
əlavə edir ki, istənilən halda bu, bağışlanılası hal deyil: "Biz ümid edirik
ki, müvafiq orqanlar bu məsələyə xüsusi diqqət ayıracaqlar. Xalqın səsi və
iradəsi ilə hakimiyyətə gələn yeni rəhbərlik bu kimi halların qarşısını
almalıdır, əks halda, özü də bu utancverici hadisənin iştirakçısı hesab olunacaq.
"Dördgünlük müharibəni” yaddan çıxarmaq gərək deyil. İndiki halda pul yığımı o
zaman baş verənlərin təkrar olunması deməkdir”.
Onu da xatırladaq ki, işğal altında olan Azərbaycan torpaqlarındakı
bərbad vəziyyəti Paşinyan özü də etiraf edib. Keçirdiyi mətbuat
konfranslarından birində o, biabırçı bir açıqlama vermişdi. Bəyan etmişdi ki,
silahlı qüvvələrdə əsgərlərin qida rasionu düzgün bölünmür, yeməklər
keyfiyyətsizdir:"Mən yeməkdən narazıyam. Döyüş mövqelərinə gedəndə xahiş
etdim ki, mənə dadmaq üçün əsgər yeməyi gətirsinlər. Qidaları yedikdən sonra
sadəcə dedim: bu, dəhşətdir. Biz bu məsələ ilə ciddi məşğuluq. Amma başa düşmək
lazımdır ki, məsələni bir gündə həll etmək olmur”. Paşinyan onu da etiraf edib
ki, əsgərlikdə olan oğlu zəng edərək ona qida məhsulları göndərilməsini
istəyib: "Bu, pis siqnaldır”.Paşinyan oğlunun ondan yemək istəməsindən
şoka düşdüyünü söyləyib. Ordunun siyasi proseslərə cəlb edilməsi ilə bağlı daha
bir biabirçı fakt. "168.am” qəzeti ordu ilə bağlı dərc edilən məqalədə müəllif
öz mənbələrinə istinadən yazır ki, Qarabağda xidmət edən hərbçilərə qeyri-adi
bir göstəriş verilib. "Əsgərlər ailələrinə zəng edib deyirlər ki, onlara
övladları il görüş təşkil edilir. Bu məqsədlə Gorus və yaxud Qapana aparırlar.
Əsgərlər bildirirlər ki, bunu Paşinyan təşkil edir. Şərti də odur ki, onun
lideri olduğu "Mənim addımım” blokuna səs verməlidirlər”, - deyə qəzet yazıb.
Azər NURİYEV