“...müharibəyə tamamilə fərqli prizmadan yanaşıb” - Onun film seçimi
Bəzən
insanlardan boş vaxtlarında nə ilə məşğul olduğunu soruşanda filmə baxdığını
deyir. Film artıq insanlar üçün estetik zövq verən, onların dünyagörüşünü
inkişaf etdirən ən gözəl vasitədir. Boş vaxtı olan şəxslər dostlardan baxmağa,
zamanı xərcləməyə dəyən yaxşı film soruşurlar. Bu zaman çoxlu film adları məsləhət
verənlər olur. Bu dəfə isə film məsləhəti üçün tanınmış aktyor Kamran M.Yunisə müraciət etdik.
Onun məsləhət
gördüyü ilk film İkinci Dünya Müharibəsindən bəhs edən "Savaş vadisi”dir. Bioqrafik savaş filmidir: "Bu kino Mel Gibsonun
çəkdiyi sonuncu filmdir. Bu kinonu seçməyimə səbəb odur ki, dünya kinosunun
canlı əfsanəsi olan Mel Gibson müharibəyə tamamilə fərqli prizmadan yanaşıb.
Kinoya baxıb rejissor əməyini qiymətləndirməmək olmaz. Bu filmlə Mel Gibson öz
vətənpərvərliyini, mükəmməlliyini bir daha sübut etmiş oldu. Film müharibəni rədd
edən, barış tərəfdarı olan amerikalı həkim haqqındadır. Və 2016-cı ildə səhnələşdirilən
kino olduqca böyük marağa səbəb olub”.
1999-cu
ildə ABŞ-da çəkilən "Altıncı hiss” filmi
ikinci yerdədir. Rejissorluğunu Nayt Şyamalanın etdiyi filmdə məşhur aktyor
Brüs Uillis çəkilib: "Bu film mənim üçün irrasional düşüncəni təlqin edən
kinolardandır. Aktyor oyunu baxımdan Bryus Uillisin işini yüksək qiymətləndirirəm.
Onun oyununa baxıb da nələrisə öyrənmək mümkündür. Ona görə, çox istərdim ki, gənclərimiz
bu filmi izləsinlər”.
Üçüncü
film isə yenə də Mel Gibsonun rejissorluğu ilə çəkilən "Hz. İsanın Çiləsi” adlanır: "Mənim üçün bu film olduqca dəyərlidir.
Çünki Mel Gibson burada sözün əsl mənasında bir rejissor kimi dünya kinosuna
töhfə verib. Eyni zamanda da aktyorların oyunu kifayət qədər mükəmməldir. Onu
da qeyd edim ki, bu filmdə dünya film ulduzlarının bir çoxu rol alıb. Onlara
verilən rolları çox ustalıqla oynayıblar”.
Müsahibimizin
"gəncliyimin filmi” adlandırdığı "Payızın
əfsanələri” dördüncü seçimi oldu: "Burada böyüyə hörmət, qardaşlıq kimi
anlayışlardan, sevginin necə olmağından, ümumiyyətlə, sevginin nə olduğundan bəhs
edilir. Bu filmi seçməyimə səbəb çox gözəl aktyor kollektivinin olmasıdır.
Xüsusilə də, Bred Pit, Henri Tomas kimi aktyorların bu kinoda yer alması onu
baxımlı edən səbəblərdəndir”.
Onun
beşinci məsləhəti özünün də rol aldığı "Vicdan
Haqqı” serialıdır: "Təvazökarlıqdan uzaq olsa da, çəkildiyim serial
haqqında da danışacağam. Məncə, Azərbaycan teleməkanında sözün əsl mənasında
peşəkarcasına çəkilmiş ilk serialdır. Və 3 ildir ki, reytinqləri qıran ən yaxşı
serialdır”.
Günel Azadə