"Ümumi təhsildə keyfiyyət ili” çərçivəsində Bakı
Şəhəri üzrə Təhsil İdarəsi tərəfindən təhsilin keyfiyyətinin yüksəldilməsi
məqsədilə səmərəli fəaliyyət istiqaməti seçilib. Çoxsaylı layihələr,
müsabiqələr həyata keçirilib. Təlimlər, tədbirlər və görüşlər təşkil edilib”.
Bu fikirlər Bakı şəhəri təhsil işçilərinin ənənəvi sentyabr konfransına
2017-2018-ci tədris ilində görülən işlərlə bağlı giriş oldu.
Təhsil naziri Ceyhun Bayramov, nazir müavini, Bakı
Şəhəri üzrə Təhsil İdarəsinin (BŞTİ) müdiri vəzifələrini icra edən Məhəbbət
Vəliyeva, nazirliyin və BŞTİ-nin struktur bölmə rəhbərləri, məktəb
direktorları, müəllimlər, məzunlar və media nümayəndələrinin iştirak etdiyi
konfransda ötən dərs ilinin yekunları, əldə olunan nailiyyətlər və perspektiv
məsələlərdən bəhs edildi.
Məhəbbət Vəliyeva hesabat məruzəsi ilə çıxış edərək
ümumi təhsilin müxtəlif istiqamətləri üzrə görülmüş işlərə diqqət çəkdi.
BŞTİ-nin tabeliyindəki ümumi təhsil müəssisələrinin 2018-2019-cu tədris ilinə
tam hazır olduğunu və növbəti dərs ilində daha yüksək nailiyyətlər
qazanılacağına əminliyini ifadə edən M.Vəliyeva qeyd etdi ki, son illər ümumi
orta və tam orta təhsil səviyyələri üzrə buraxılış imtahanlarının
nəticələrində, bütövlükdə isə ali və orta ixtisas təhsili müəssisələrinə
qəbulda müsbət dinamika müşahidə olunmaqdadır. M.Vəliyeva son 4 il ərzində
Bakıda məktəblərin buraxılış imtahanlarının nəticələrinə görə irəliləməsi və
geriləməsinin rayonlar üzrə təhlilinin aparıldığını qeyd etdi: "9-cu sinif
şagirdlərinin imtahan nəticələrinə əsasən siyahıda ilk üçlükdə Bakının Səbail,
Xətai, Nəsimi rayonları, son üçlükdə isə Xəzər, Pirallahı və Qaradağ
rayonlarının məktəbləri yer alıb”. Nazir müavini bildirdi ki, əvvəlki tədris
ili ilə müqayisədə 2017/2018-ci tədris ilində tam orta təhsil səviyyəsi üzrə
buraxılış imtahanlarında qeyri-müvəffəq qiymət alanların sayı 0,54 faiz azalıb,
müvəffəq qiymət alanların sayı isə 2,16 faiz artıb.
O, son illərin təhlillərinə görə, rus bölməsinin
bəzi siniflərində şagird sayının az olduğunu qeyd etdi. Belə ki, BŞTİ-nin
tabeliyində olan məktəblərdə orta və tam orta səviyyələr üzrə rus bölmələrində
bəzi siniflər ümumiyyətlə fəaliyyət göstərmir: "Bu sahədə kadr çatışmazlığı da
əlavə problemlər yaradır. Şagird sayının azlığına baxmayaraq, həmin məktəblərdə
buraxılış imtahanlarının nəticələri kifayət qədər yaxşı olmayıb. Bu da təhsilin
keyfiyyət göstəricilərinə mənfi təsir edib. Buna görə də BŞTİ son 3 ildə
davamlı şəkildə 9-cu siniflərin tədrisini təmin edə bilməyən məktəblərin
siniflərinin yaxın ərazilərə köçürülməsi və təhsilin daha keyfiyyətli təşkil
olunmasına şərait yaradıb”.
M.Vəliyeva ötən tədris ilində BŞTİ-nin tabeliyində
olan 10 təhsil müəssisəsinin rəhbərinin vəzifəsindən azad edildiyini diqqətə
çatdırdı: "BŞTİ-nin bir əməkdaşı, 20 direktor müavini, 9 müəllim, 1 kitabxana
müdiri işdən çıxarılıb. Eyni zamanda, 2 BŞTİ əməkdaşı, 18 təhsil müəssisəsinin
rəhbəri, 32 direktor müavini, 54 müəllim, BŞTİ-yə tabe struktur bölmələrinin 6
əməkdaşı intizam məsuliyyətinə cəlb olunub. BŞTİ-yə tabe struktur bölmələrinin
30 əməkdaşı, 27 təhsil müəssisəsinin rəhbəri, 11 direktor müavini, 40 müəllimə
isə xəbərdarlıq edilib”. Nazir müavini çıxışında məktəbəqədər təhsilin və 1-ci
sinfə qəbulun elektron qayda ilə həyata keçirilməsi, şagirdlərin olimpiadalarda
iştiraki və qalibiyyəti, buraxılış imtahanlarının nəticələri və s. məsələlərə
də toxundu.
Konfransda çıxış edən təhsil naziri Ceyhun Bayramov təhsil sahəsindəki uğurlardan və
mövcud problemlərin həlli istiqamətində atılacaq addımlardan danışdı. "Bilik
günü” münasibətilə təhsil işçilərinə təbriklərini çatdıran nazir, respublika
üzrə bilik yarışlarında, beynəlxalq olimpiadalarda və ali məktəblərə qəbul
imtahanlarında uğur qazanan şagirdlərin sayının ilbəil artdığını qeyd etdi, məktəb
idarəetməsi, məktəblərin reytinqi, müəllimlərin peşəkarlıq səviyyəsinin
artırılması və ümumilikdə, tədrisin keyfiyyətinin yüksəldilməsi kimi
məsələlərin növbəti tədris ilində əsas prioritet istiqamətlər olacağını bildirdi.
"Şagirdlərin dərs yükü bizi hər zaman narahat edir.
Buna görə də bu il məktəbdaxili qiymətləndirmənin dəyişdirilməsi ilə bağlı
kifayət qədər iş aparılıb” - deyən
təhsil naziri qeyd etdi ki, yeni məktəbdaxili qiymətləndirmə layihəsi Təhsil
Nazirliyinin kollegiyasında geniş müzakirə ediləcək: "Həmin sənəd əsasında
xüsusilə ibtidai sinif şagirdlərinin dərs yükünün azaldılması üçün ciddi
addımlar atılacaq”.
C.Bayramov məlumat verdi ki, bu il qəbul imtahanlarında 500-dən yuxarı bal
toplayan 2091 abituriyent müəllimlik ixtisasını elektron ərizəsində birinci
qeyd edib: "Bu, ötən tədris ili ilə müqayisədə 53,6 faiz çoxdur. Bütün bunlar
növbəti illərə ümidlə baxmağa imkan verir”.
Tədbirdə 35 nömrəli tam orta məktəbin ingilis dili müəllimi Pərvanə Talıbova,
müəllimlərin işə qəbulu müsabiqəsində 55 bal toplayan İsmayıllı şəhər 4 nömrəli
tam orta məktəbin tarix müəllimi Ülvi Şamilov, 244 nömrəli tam orta məktəbin
məzunu və bu il ali məktəblərə qəbul imtahanında 666 bal toplayan Azərbaycan
Dillər Universitetinin I kurs tələbəsi Rəşidə Həqiqətli çıxış etdilər.
Konfransda pedaqoji ixtisaslar üzrə ali məktəblərə
yüksək balla qəbul olunmuş tələbələrə təşəkkürnamələr verildi. Həmçinin yüksək
balla müəllim kimi işə qəbul olunan, eləcə də uzun müddət təhsil sistemində
çalışan müəllimlər mükafatlandırıldı.
Konfransda 2017-2018-ci tədris ili ərzində BŞTİ-nin
fəaliyyətindən bəhs edən videoçarx nümayiş olundu.
Bakı 14°C
