"Müəllimlərim icazə verməsə, film çəkməyəcəyəm" - Fotolar
Əgər hər
hansı film, serial gözəl və baxımlı alınırsa, o zaman serialın qəhrəmanları
alqışlanır, sevilir və yaratdıqları obrazlar yaddaşlara həkk olunur. Ancaq
burda bir məsələ də var. Axı onların üzərində işləyən, serialın baxımlı olması
üçün əlindən gələni edən, gecəsini gündüzünə qataran məhz rejissorlardır. Mən
belə bir rejissorlardan birini tanıyıram. Onun üçün işin konkret zamanı yoxdur.
Bəzən gecəni məhz çəkiliş məkanında, montaj otaqlarında keçirir.
Müsahibimiz
"Aramızda qalsın”, "Qaynana”, "Bir ailəm var”, "Cehizsiz gəlinlər” seriallarının
baş rejissoru Rüfət Şahbazovdur. Rejissor hazırda Xəzər televiziyasında
yayımlanan "Cehizsiz gəlinlər” serialı üzərində çalışır. Biz də serial haqqında
olub-bitənləri məhz onun dilindən eşidirik.
- Rüfət bəy, rejissoru olduğunuz "Cehizsiz gəlinlər”
serialı əvvəllər həftəlik nümayiş olunsa da, indi gündəlik rejimə keçib. Bu, tələbatdanmı
irəli gəlir?
- Serialın ilk
15 seriyasını həftədə bir dəfə 80 dəqiqə olmaqla nümayiş etdirdik. Tələbat yüksək
olduğu üçün gündəlik nümayiş olunmağa başladı. Xəzər televiziyasında yayımlanan
digər seriallar da artıq finala yaxınlaşmışdı. Belə bir seriala ehtiyac vardı.
- Serialın
ssenarisi də bir qədər fərqlidir.
- Elədir. Ailə
dramından bəhs edir. Belə ki, serialda ailənin 7 üzvü var - valideynlər, bir qardaş, dörd bacı. Ailədə maddi-sosial
problemlər baş qaldırır. Bu ailənin nümayəndələri kirayədə qalırlar, borcları var.
Ailə böyüsə də, ata kirayəni ödəyib, qızlarına baxa bilmir. Gündən-günə ailənin
vəziyyəti pisləşir, üstəlik, kişinin qızları universitetə qəbul olunur. Onların
təhsil haqları fa ödənilməlidir. Evin başçısı olan ata infarkt keçirir və dənizdə
boğulur. Ana bunu eşitsə də, uşaqlarına deyə bilmir. Fikirli-fikirli yolu keçərkən
ana da qəzaya düşür və dünyasını dəyişir. Beləliklə, övladlar başsız qalır. Varlı
bir adam uşaqlara sahib çıxır, evində qulluqçu kimi işlədir.Burda hər seriyada
sürprizlər baş verir. Hadisələri tam olaraq açmaq olmur. Heç bir tamaşaçı heç vaxt
istədiyini serialda görə bilməz. Bir qrup tamaşaçı bəzi bölümlərdə ssenaristi, rejissoru
qınayır. Serialda sürpriz olmasa, tamaşaçı ona baxmaz. Tamaşaçı istədiyini gördüsə,
artıq o, rahatlaşacaq və baxmağa başqa bir mövzu axtaracaq.
- "Cehizsiz gəlinlər” serialı reytinq verirmi?
- Açığı, serialın
reytinqi haqqında heç bir məlumatım yoxdur. Ancaq serial böyük ajiotaj doğurdu.
Belə ki, serialımız haqqında sosial şəbəkələrdə kifayət qədər yazılır, eyni zamanda
aktyorlarımıza ictimai yerlərdə, cəmiyyət arasında olan reaksiyalardan da bunu görmək
olar. Biz cədvəldəki reytinqlərə inanmırıq. Bunu da düzgün hesab etmirik. Reytinqi
hansı aparatla, necə, kimlərin ölçdüyü bəlli deyil. Bizim üçün reytinq tamaşaçıların
ajiotajı, seriala qarşı olan sevgisidir. Serialın bir bölümünü "Youtube”-da paylaşanda,
30-40 min izləmə sayı verir. Yeni başlayan bir serial üçün bu, böyük göstəricidir.
Küçədə gedərkən insanlar aktyorlarımıza yaxınlaşır, serialın axırı haqqında məlumat
əldə etməyə çalışırlar. Bütün bunlar reytinq deyilmi? Kağız üzərində göstərilən
reytinq rəqəmləri bizim üçün önəmli deyil.
- Çəkdiyiniz seriallar uzunömürlülüyü ilə də
seçilir. Bəs "Cehizsiz gəlinlər” neçə illik nəzərdə tutulub?
- Hazırda
seriala böyük tələbat var. Serialın "Stop”u nəzərdə tutulmayıb. Serialın
ssenarisinin yeni xətləri başlayıb. İnanmıram ki, bu yaxınlarda bitə biləcək mövzular
olsun. Çünki serialda üç-dörd hekayə xətti paralel gedir. Nə zaman dayandırılsa,
yəqin ki, 2-3 ay əvvəldən xəbər veriləcək.
- Adətən bizdə yerli seriallarımızın əksəriyyətində
kriminal xarakterli mövzulara müraciət olunur. Hansı ki, bu, Azərbaycanın gündəlik
həyatından çox-çox uzaqdır. Ancaq siz hər dəfə serial çəkərkən ailə-məişət mövzusuna
daha çox yer verirsiniz. Sizi buna sövq edən nədir?
- Azərbaycanda
kriminal yoxdur. Tamaşaçı hər gün gündəlik həyatında gördüyü şeyləri efirdə görmək
istəyir. Mən kriminal xarakterli serial çəksəm, sabah tamaşaçı ona inanmayacaq.
Bu da uğursuzluqla nəticələnə bilər. Tamaşaçı kriminalın ən üstün versiyalarını
türk və rus seriallarında görmək istədiyi səviyyədə görür. Mən kriminal mövzulara
müraciət etmək istəmirəm. Ssenarilərimizi yazan dostlarımızdan da xahiş edirəm ki,
çəkdiyimiz seriallarda kriminal xarakterli heç nə olmasın. Çünki biz insanları buna
inandıra bilmərik. Çox şükürlər olsun ki, ölkəmizdə qonşu ölkələrdəki kimi kriminal
hadisələr baş vermir. Ailə-məişət problemlərinə gəlincə isə, problem hər bir ailədə
var. Biz bu serialda mentalitetdən irəli gələn mövzulara toxunmağa çalışırıq. Düzdür,
hərdən mentalitetdən də kənara çıxıb, tamaşaçıları sürprizlərlə
qarşılaşdırırıq. Efir qarşında əyləşən
tamaşaçıların könlünə xitab etməyə çalışırıq. Bizim kütlə olaraq ən çox tamaşaçımız
qadınlardır.O ki qaldı komediyaya,
bu janra müraciət etmək istəmirəm. Çünki indi hamı komediya janrına müraciət
edir. Düşündürüb güldürməkdən çəkinir, nə yolla olursa-olsun insanları güldürmək
məqsədi güdürlər. Mən də istəmirəm ki, onların cərgəsinə qoşulum.
- Adətən çəkdiyiniz seriallarda qəhrəmanlarınız
çox ağlayır. Deyəsən siz aktyorlarını ağladan rejissor kimi tarixə düşəcəksiniz.
- (Gülür) Çox
zaman bu mövzu ilə bağlı seriallardakı qəhrəmanlarımıza da təzyiqlər olur. Onlar
sənət adamıdır, sənətlə məşğuldurlar, bu, normal haldır. Onlar da tez-tez
müraciət edirlər ki, bizi serialda niyə bu qədər ağladırsınız. Hətta deyirlər
ki, ssenaristə deyin ki, ssenarini bu qədər ağlamalı yazmasın. Məslə belədir
ki, əgər bir ailənin dərdi varsa, o ailənin gülməyi bir qədər anormal haldır. Bir
ailənin dərdi varsa, bu ailənin üzvləri istər-istəməz gözyaşlı olacaq. Hər göz yaşının
da öz səbəbi var. Aktrisa hər göz yaşı olan səhnədə öz daxili problemlərini xatırlayıb
ağlayırsa, onda bu, tamaşaçının gözündən yayınmayacaq. Biri də var ki, aktyor düşdüyü vəziyyətə uyğun şəkildə ağlasın.
- Serialda iştirak edən aktyorların əksəriyyəti
yeni simalardır. Aktyor heyətini necə seçdiniz?
- Aktyor seçimini
edəndə düşündük ki, ötən serialın əsas obrazları bu serialın əsas obrazları olmasın.
Əslində, mən də bunun tərəfdarı idim. Çünki yeni bir serial çəkirdik, bunun
üçün yeni simalara ehtiyac duyurduq. Ona görə də yeni simalar axtarmağa başladıq.
Biz atkyor seçimi edəndə çox düşündük. Bəzi insanlar düşünür ki, aktyor seçimi deyəndə
aktyoru götürüb çəkirsən, vəssalam, bununla da iş bitir. Əslində elə deyir.
Çalışdıq ki, obrazın xarakterlərinə uyğun seçim edək. Seçimdə aktyor
dostlarımızı da dəvət edə bilərdik, ancaq biz başqa nüanslara önəm verdik. Belə
ki, serialın qəhrəmanlarının xarakterlə yanaşı, vizual şəkildə psixoloji, aktyorluq
qabiliyyətini də yoxladıq. Seçdiyimiz aktyorların nə dərəcədə bu yükü qaldıra biləcəyini
öyrəndik. Nəticədə belə bir ailə əmələ gəldi. Onları tam vizual şəkildə bir-birinə
oxşada bilməsək də, nəticədən məmnun qaldıq. Misal üçün, ailənin yeganə oğlu
Elşən obrazında Turalı çəkdik. O oğlan kastinqə gələndə mən inandım ki, o bu rolun
öhdəsindən məharətlə gələcək. Onun yerinə tanınmış aktyorlardan birini qoysaydıq,
həmin obrazın yazıqlığına, bacılarının yükünü qaldıra biləcək oğlan olduğuna heç
kim inanmayacaqdı. Ancaq onun simasında həmin oğlanı gördüm. Şükür Allaha ki, o
da özünü doğruldur. İnanıram ki, Tural günlük serialda yetişə-yetişə yaxşı aktyor
olacaq. Günlük serial aktyorlar üçün bir məktəbdir. Aktyor paslanmır, hər gün işləyir.
Ötən həftə səhərə yaxın psixoloji səhnələri çəkirdik. Aktrisalarımızdan biri ağlamağa
başladı, bildirdi ki, mən artıq yorulmuşam, bacarmıram. Biz çəkilişi saxladıq. Həqiqətən
mən o insanı başa düşürəm. Onlar o qədər işləyirlər ki, setdən tərləyib çıxırlar.
Nəticədə isə sabah yaxşı oyunlarına görə onlara alqış gəlir.
- Bu gün Azərbaycan kinoteatrında kifayət qədər yerli
filmlərimiz var. Bu bizi həddən ziyadə sevindirir. Ancaq yerli filmlər
sırasında sizin bir rejissor kimi filmlərinizi görmürük.
- Yerli filmlərimizin
sayının çoxalması istənilən halda müsbət haldır. Düzdür, onların içərisində keyfiyyətliləri
də var, qənaətbəxş olmayanları da. Filmlərimizin sayının çox olması bizim üçün fəxrdir.
Heç çəkməməkdənsə, hardansa başlamaq yaxşıdır. Bütün film çəkən rejissorlarımızın
hamısına uğurlar arzulayıram. Nə zamansa, mənə də film təklifi gəlsə, o zaman
düşünərəm. Ancaq ilk olaraq filmin ssenarisinə baxacam. Elə çəkəcəm ki, indiyə qədər
seriallardan yığdığım təcrübəni, müəllimlərimin mənə öyrətdiklərini yerə vurmuş
olmayım. Film çəkmək üçün yetişmək lazımdır. Özünü hazır bilməlisən ki, mən filmi
çəkə bilərəm, yoxsa yox. Bizim boş vaxtımız yoxdur, həftədə beş seriya çəkirik.
Bizim hər seriyamız bəzi filmlərdən daha keyfiyyətlidir. Mən film çəksəm, daha yaxşı
bir şey ortaya qoymalıyam. Əlinə kamera alıb, ətrafına 3-4 tanış cəmləyib, onlara
gülməli zarafatlar yazıb, bunu kinoteatra təqdim etməyə nə var axı.Özümü hazır hiss
edəndən sonra müəllimlərimin yanına gedəcəm. Mənə desələr ki, sən film çəkməyə hazırsan,
ondan sonra çəkəcəm. Ömür boyu tamaşaçının yadında qala biləcək filmlərdən çəkmək
istəyirəm – Elxan Cəfərov kimi.
- Xocalı faciəsinin ildönümləri ərəfəsində siz
yeni layihələrlə çıxış edirsiniz. Bu il necə, elə layihələriniz varmı?
- İstəyirik, bu
il də öz ənənəmizə sadiq qalaq. Ancaq bağlı müzakirələr aparmamışıq. Vaxtımız olmayıb.
Planımızda var ki, bu il də nəsə edək. Nə qədər ki Qarabağ torpaqları düşmən tapdağından
azad olmayıb, nə qədər ki ermənilər Xocalı faciəsini boyunlarına almayıblar, biz
bu layihələrə son qoymayacağıq.
- Sizin rejissorluq etdiyiniz Çingiz Mustafayevin "Şəhid
arzuları” klipi də böyük ajiotaj yaratdı.
- Bu klipi aprel
döyüşlərindən təsirlənib hazırlamışdıq. Operatorumuz Mehdi Yaqubov dedi ki, belə
bir mahnı var, buna bir klip çəkək. Oturduq düşündük, Çingizlə görüşdük. Belə
bir layihəyə imza atdıq. Mahnıda yaxşı vətənpərvərlik ruhu var idi, biz də ona
dəstək olmaq istədik. Hərə öz sahəsində döyüşməlidir. Biz də öz sahəmizdə
gücümüz çatan qədərini edirik. Klip maraqlı alındı, bəziləri dedi ki, siz bu klipdən
maddiyyat güdürsünüz. Mən indiyə qədər çəkdiyim heç bir klipdən pul almamışam. Çəkdiyim
kliplərin hamısı da Qarabağa, vətənpərvərliyə həsr olunub. Bunu da təmənnasız
etmişəm. Dostlarımızın köməkliyi ilə etmişik, hətta yeri gələndə özümüzdən də pul
xərcləmişik.
Xəyalə Rəis