Moldova üçün ikinci “Dnestryanı” problemi hazırlanır
Postsovet ölkələrində mövqelərini qoruyub saxlamağa cəhd
göstərən Rusiya bu istəyinə çatmaq üçün hər cür vasitələrdən istifadə etməkdə
davam edir. Belə ölkələrdən biri də Moldovadır. Bu ölkədə rusiyapərəst İqor
Dodon prezident seçildikdən sonra aktivləşən Kreml hər vasitə ilə onun güclənməsinə
çalışır. "Kozır” kimi də Dnestryanı bölgəni seçib. Separatçı bölgə vasitəsilə
Moldovanın qərbpərəst hökumətinə təzyiqləri gücləndirən Moskva Kişinyovu
avrointeqrasiya siyasətindən döndərməyə çalışır. Dnestryanı bölgənin yanına
daha biri əlavə oluna bilər. Belə ki, bu yaxınlarda Moldova ilə Rusiya arasında
münasibətləri gərginləşdirən ciddi bir problem baş qaldırıb. Məsələ ondadır ki,
Moldova parlamenti ölkə ərazisində Rusiya informasiya analitik verilişlərinin translyasiyasının qadağan edilməsi barədə
qanun layihəsi qəbul edib. Bu da qarşı tərəfdə dərhal əks effekt verib. Rusiya
Qaqazuyadakı tərəfdarlarını buna qarşı çıxmağa sövq edib. Qurumun rəhbəri İrina
Vlax bildirib ki, qaqauzlar Rusiya telekanallarına tam formada baxacaqlar. O
bildirib ki, kanallar kabel televiziyası vasitəsilə yayımlanacaq.
"Hər halda,
qanun bunu qadağan etmir”,- deyə o bildirib. Məsələ ondadır ki, Moldova tərəfinin
iradlarında əsas da var. Belə ki, həmin verilişlərdə Moldova aşağılanır, rəsmi
Kişinyovun Qərbin istəyi ilə oturub-durduğu barədə fikirlər ana xətt kimi
keçir. Bu da təbii ki, qarşı tərəfi özündən çıxarmaya bilməzdi. Rusiya tərəfi tək
Qaqauziyada deyil, ona qarşı loyal olan ərazilərdə də narazılıq dalğasını gücləndirməyə
start verib. Məsələn, Basarabysk şəhərində şəhər rəhbərliyi Moldova
parlamentinin qəbul etdiyi qərarı Rusiyaya qarşı növbəti təxribat kimi
qarşılayıb. Hətta bununla bağlı müvafiq bəyannamə də qəbul edilib. Bəyanatda strateji
müttəfiq olan Rusiyaya qarşı bu cür addımların yolverilməz olduğu vurğulanıb.
Moldovada rusiyapərəst politoloqlar hesab edirlər ki, parlamentin qəbul etdiyi
qərar Rusiya prezidenti Vladimir Putinin ölkədəki nüfuzunun artması ilə bağlıdır. Politoloq
Anatol Şaranu hesab edir ki, Rusiya ölkə ərazisinə özünün informasiya təzyiqini
xeyli gücləndirib. Bu səbəbdən də Putin Moldovada ən populyar siyasətçiyə
çevrilib. Lakin Kişinyovda fəaliyyət göstərən Politicon - Strateji tədqiqatlar
və siyasi konsaltinq Mərkəzinin rəhbəri Anatol Çaranu hesab edir ki, Rusiya
telekanalları Moldova cəmiyyətində ikitirəliyə səbəb olub. Onun sözlərinə görə,
Rusiya prezidenti əhaliyə özünü sosial yönümlü prezident kimi təqdim edə bilib.
Bu səbəbdən də əhali Rusiyanın xəbər kanallarına baxmağa üstünlük verir.
Bu səbəbdən
də vəziyyətə mütləq müdaxilə etmək və ölkənin informasiya təhlükəsizliyini təmin
etmək gərəkdir. Politoloq əlavə edir ki, iki ölkə arasında münasibətlər normal
olsaydı, bəlkə də bu sərt addımdan qaçmaq olardı. Lakin Moldovaya qarşı
Rusiyanın iqtisadi embarqosu davam edir, Moldova ərazisində Rusiya hərbi
kontingenti yerləşir. Ekspert əmindir ki, Rusiyanın telexəbərlərinə qadağa
çoxdan tətbiq edilməli idi. "Lakin buna baxmayaraq, yenə də gec deyil. Bu,
düzgün siyasətdir və bizim informasiya təhlükəsizliyimizi təmin edə bilər. O ki
qaldı Qaqauziyaya – bu, ayrıca mövzudur. Bu əyalət rusofil bölgə kimi tanınır və
bunun tarixi kökləri var. Xristian qaqauzları vaxtilə Balkanlarda qırırdılar və
onlar o zaman Rusiya ərazisinə qaçıb gəliblər. Öz dil və milli ənənələrinin
saxlamağa müvəffəq olublar. Onların Rusiyaya qarşı rəğbəti də bununla izah
olunur”, - deyə politoloq vurğulayıb. Qaqauziya başkanı (burada vilayət rəhbəri
belə adlandırılır) İrina Vlax Çaranunun qaqauzlarla bağlı səsləndirdiyi fikirləri
bölüşür. O bildirib ki, vilayətdə rusca danışıb, Rusiya kanallarına baxmaqda davam
edəcəklər: "Kişinyov bizim iradəmizin əleyhinə çıxa bilməz”. Onun sözlərinə görə,
bu gün qaqauzlar moldovan, rus və qaqauz televiziyalarına baxırlar. "Hətta burada
bir türk telekanalı da yayımlanır”, - deyə başkan bildirib. Onun qənaətincə,
Moldova parlamentinin qəbul etdiyi qanun Rusiya ilə Moldova arasında gərginliyi
gücləndirəcək.
Ona dəstək verənlər arasında muxtariyyətin Xalq Məclsinin
rəhbəri Vladimir Kıssa da var. O, Moldova parlamentinin spikeri Andiran Kanduya
qanunverici orqanın qəbul etdiyi qanuna yenidən baxmağı və Qaqauziyanın
maraqlarının təmin olunmasını tələb edən məktub göndərib.
Xatırladaq ki, dekabrın 7-də parlamentin qəbul etdiyi
qanunu pozan telekanal və radioları 70 min lev (1800 lev 100 dollar) cərimə
gözləyir. Qanunu təkrar pozanlar isə 100 min lev cərimələnəcəklər. Qanun layihəsinin
müəllifi olan deputat Sergey Sırbu hesab edir ki, qəbul edilən məhdudiyyət ölkənin
informasiya təhlükəsizliyini təmin etmək üçündür.
Prezident İqor Dodon isə bu fikirdə deyil və vəd edib
ki, qanuna imza atmayacaq. "Dodonun iki cəhdi var. Lakin bu cəhdləri də
alınmaya bilər. Məsələ ondadır ki, Konstitusiya Məhkəməsi onu səlahiyyətlərindən
məhrum edə bilər. Məsələn, beş dəqiqəyə. Bu müddət ərzində isə spiker və yaxud baş
nazir onun yerinə sənədə imza ata bilərlər. Belə bir presedent artıq yaşanıb.
Prezident müdafiə nazirini təsdiq etməyəndə Konstitusiya Məhkəməsinin qərarı ilə
bunu digər hakimiyyət nümayəndələri həyata keçirdilər”, - deyə politoloq Anatol
Çaranu bildirib. Məsələ ondadır ki, qanun qüvvəyə minsə də, Qaquziya buna qarşı
çıxacaq.
Beləliklə, Moldova növbəti ciddi sınaq qarşısındadır.
Onun bu problemi güc, yaxud danışıqlar yolu ilə həll edəcəyini isə söyləmək çətindir.
Azər NURİYEV