Moldova Rusiyayönümlü olacaq?
Postsovet məkanının ən
qalmaqallı dövlətləri sırasına daxil olan Moldovada oktyabrın 30-da prezident
seçkiləri keçiriləcək. Dünənə olan məlumata görə, seçki kampaniyasında 11
namizəd iştirak edir. Demokrat Partiyasının lideri, hakim koalisiyadan
prezidentliyə namizəd Marian Lupu bildirib ki, seçkilərdə qalib gələcəyi
təqdirdə ölkəsinin Avropa İttifaqına (Aİ) üzv olması barədə müraciət edəcək.
"Üzvlük barədə müraciət mənim prezidentliyim müddətində əsas siyasi vəzifə
olacaq. Əsas məsələlərdən biri həm də ölkənin Rumıniya ilə birləşdirilməsidir”,
- deyə o bildirib. Rusiya nəşrləri yazır ki, seçkilərin lideri Rusiya ilə dostluq
münasibətlərinin qurulmasının tərəfdarı olan sosialistlərin lideri İqor
Dodondur. 41 yaşlı iqtisadçı hesab edir ki, respublikanın rifahı və
təhlükəsizliyi Avropa İttifaqından çox Rusiyadan asılıdır. "Qərbpərəst
hökumətin yürütdüyü siyasət nəticəsində iqtisadi problemlərdən və çoxsaylı
qalmaqallardan zinhara gəlmiş Moldova seçiciləri böyük ehtimalla seçimlərini
ediblər”, - deyə "Nezavisimaya qazeta” yazır. Vaşinqtonda yerləşən Beynəlxalq
Respublikaçılar İnstitutunun sentyabrda keçirdiyi sorğunun nəticələrinə görə,
əhalinin 82 faizi hesab edir ki, Moldova düzgün istiqamətdə hərəkət etmir. İqtisadiyyat ağır durumdadır, əhali iş
dalınca qonşu Rusiyaya axışır. Rusiyanın özündə də maliyyə böhranı olduğundan
çoxları geri dönür. Sorğu zamanı bəlli olub ki, respondentlərin 30 faizi
Dodonun namizədliyini müdafiə edib. Lakin məsələ ondadır ki, Dodonun prezident
seçilməsi ilə ölkənin geosiyasi kursu necə dəyişəcək? Bəlli olduğu kimi, ölkənin
Avropa İttifaqına tez bir zamanda qoşulacağı barədə ehtimallar özünü doğrultmayıb.
2014-cü ildə Moldova Avropa İttifaqı ilə assosiativ üzvlüklə bağlı sənədə imza
atıb. Lakin hələ də ortada bir şey
yoxdur.
Yeri gəlmişkən, Moldova Konstitusiyasına
görə, baş nazir prezidentdən daha üstün səlahiyyətlərə malikdir. Lakin birbaşa prezident
seçkilərində əhalinin böyük əksəriyyətinin səsini əldə edərək qalib gələn
prezident ölkənin xarici və daxili siyasətinə ciddi təsir edə bilər. Prezident
qanun layihələrini parlamentin müzakirəsinə çıxara, qanunverici orqan
qarşısında onu qane etməyən qanunları dəyişdirmək məsələsini qaldıra bilər. O,
həmçinin parlamenti buraxmaq iqtidarındadır. Bundan əlavə, prezident xarici
ölkələrlə imzalanan müqavilələri yeniləyə və dəyişə bilər. Lakin sonradan həmin
qanunları parlamentin ratifikasiya etməsi gərəkdir. Kommunist hökumətində
iqtisadiyyat naziri və nazir müavini vəzifələrində çalışan Dodon seçkiləri
udsa, onda daha çox hansı dövlətin
uduşlu vəziyyətə düşəcəyi bəllidir. Belə ki, Dodonun seçkiqabağı şüarlarından
biri belədir – "Moldovanın gələcəyi güclü Rusiya ilə bir yerdədir”. Onun
nöqteyi-nəzərincə, Rusiya ilə münasibətlərin gələcəyi üç komponentə əsaslanır.
Birincisi, etnik cəhətdən yaxın və Avropa İttifaqının yaxın müttəfiqi
Rumıniyadan mümkün qədər uzaqda durmaq. 1918-1940-cı illərdə bu iki ölkə vahid
dövlətdə birləşmişdilər. Lakin sonradan sovet qoşunları Moldovanın ərazisini
işğal etdilər. Sosialistlərin liderinin qənaətincə, Moldovada Rumıniya ilə
birləşmək üçün "aqressiv formada kampaniya aparılıb”. O vəd edib ki, prezident
seçiləcəyi təqdirdə ilk qərarlarından biri birləşmə barədə çağırışlar edənlərin
cinayət məsuliyyətinə cəlb edilməsi olacaq. "Mən qanunverici orqanın üzvlərinə
unionizm çağırışı edənləri məsuliyyətə cəlb etməyi təklif edəcəm”, - deyə onun
seçki qərargahının yaydığı məlumatda vurğulanıb. Əlavə edilib ki, birləşmə
çağırışları cinayət məsuliyyəti ilə cəzalandırılmalıdır. Rumıniya ilə birləşmə
tərəfdarları isə hesab edirlər ki, bərbad iqtisadiyyatı yalnız birləşmə xilas
edə bilər. İqtisadiyyatı aqrar sektor üzərində qurulan Moldovada əhalinin
vəziyyəti ağırdır. Adambaşına düşən gəlirə görə ölkə hətta Laosdan da geri qalır. Bu səbəbdən də
birləşmə tərəfdarları fəallaşıblar. Lakin məsələ ondadır ki, nə Rumıniya, nə də
Moldova rəsmiləri birləşmə barədə təşəbbüslə çıxış ediblər.
Bir sıra analitiklərin
qənaətincə, Dodonun Rumıniyaya soyuq münasibəti onun vətənpərvərliyindən irəli
gəlmir, sadəcə, bu ideyanın Rusiyaya xoş gəlməməsi ilə bağlıdır. "Onun moldovan
millətinin dirçəldilməsi fikrinə söykənməsi sadəcə olaraq Rusiya ilə əlaqə və
münasibətlərin bərpası ilə bağlıdır”, - deyə Rumıniya Elmlər Akademiyası
yanında Politologiya və Beynəlxalq İnstitutun direktoru Dan Dunqaçu bildirib: "Həddən
atıq moldovanlaşdırılma sonda Rusiya ilə yaxınlaşmaya və federallaşmaya gətirib
çıxaracaq”. Rusiya çoxdan bəridir ki, NATO-ya üzv olan Rumıniyanı özünün
regiondakı maraqlarına təhlükə kimi nəzərdən keçirir. Məhz bu səbəbdən də
Dodonun ikinci məqsədi Moldovanın neytral dövlət elan edilməsinə nail olmaqdır.
"Mən sülhə tərəfdaram. Mən Moldovanın neytrallığı barədə beynəlxalq təminat
alacağam. NATO əsgərləri bizim küçələrlə hərəkət etməyəcəklər” - deyə
prezidentliyə iddialı bəyan edib. Dodonun digər prioriteti Dnestryanı
münaqişənin siyasi yolla həlli və ərazinin Moldovaya birləşdirilməsidir. Separatçıların
liderlərinin Rusiya ilə birləşmək çağırışlarını nəzərə alsaq, onda Moskvanın bu
prosesdə rolu həddən artıq vacibdir. Ümumiyyətlə, əksəriyyət bu qənaətdədir ki,
Dodonun Dnestryanı bölgə ilə bağlı mövqeyi bir çox seçiciyə xoş gələ
bilər. Kremlin moldovan kənd təsərrüfatı
məhsullarına embarqo qoymasına baxmayaraq, bu ölkə ilə yaxınlaşmasının bir çox
səbəbləri var. Söhbət Rusiyadakı moldovan miqrantlarından gedir. Moldova
ekspertləri də bu qənaətdədirlər ki, Dodon Moldovanı Rusiyanın orbitinə
çevirmək niyyətindədir. Hələ ki, onun əsas rəqibi moldovan seçiciləri arasında
apatiyadır. Moldovanın özündə keçirilən son sorğuların nəticələrinə görə, rəyi
soruşulanların 30 faizi heç bir namizədə etibar etmir. 20 faiz Dodona səs
verəcəyini bildirib. Antikorrupsiya nümayişlərinin lideri Andrey Nestase 8, Harvard
məzunu, sabiq təhsil naziri Mayyu Sandu isə 7 faiz səs toplayıb.
Azər NURİYEV