Minsklə Brüsselin münasibətləri pisləşir
Belarusla Avropa İttifaqı arasında bərpa olunan münasibətlər yenidən pisləşmək
təhlükəsi ilə üzləşib. Səbəb kimi də, Belarus hakimiyyət orqanlarının paytaxt
və ətraf yerlərdə nümayişçilərə qarşı həyata keçirdiyi sərt tədbirlər
göstərilir. Xalqa və parlamentə müraciətində prezident Aleksandr Lukaşenko da
bunu etiraf edib. Belarus-Avropa münasibətləri ilə bağlı vəziyyətə qiymət verən
prezident "doğrudanmı biz əvvəlki dövrlərə qayıdırıq”, - deyib. O etiraf edib
ki, bu yaxınlarda start götürən dialoq Avropa məmurlarının Belarus hakimiyyət
orqanlarının martın 25-dəki nümayişlərə neqativ münasibətindən sonra pisləşə
bilər. "Bəsdirin bizə mütəmadi olaraq "siz həddən artıq güc tətbiq etdiniz”
kimi ittihamlar irəli sürdünüz”, - deyə prezident Aleksandr Lukaşenko Avropa İttifaqının
Belarus hadisələrinə reaksiyasına cavab olaraq bildirib.
Xatırladaq ki, həmin hadisələr zamanı hüquq-müdafiəçiləri minə yaxın
aksiya iştirakçısının həbs edildiyini yazıb. Şəhərin mərkəzində insanları
yaşından və orada hansı səbəbdən olması məqsədindən asılı olmayaraq tutub aparıblar.
A.Lukaşenkonun sözlərinə görə, bu hadisələrdən sonra xarici işlər naziri
Vladimir Makeyi daha əvvəlki kimi, Avropada xoş, gülərüzlə qəbul etmirlər.
"Xarici işlər nazirimiz artıq sizin ölkələrə səfər etməyə çəkinir. O, artıq
orada təzyiqlərlə üzləşəcəyindən ehtiyat edir”, - deyə prezident bildirib.
Halbuki, vaxt var idi Minsk və Brüssel arasında qarşılıqlı səfərlər xeyli
artmışdı. Əksəriyyət hesab edirdi ki, tərəflər arasındakı problemlər artıq geridə
qalıb. Hətta Belarusun Avropa İttifaqının tərəfdaşlıq proqramlarına üzv qəbul
olacağı da bildirilirdi. Bütün bu məsələlərdə, daha dəqiq desək, Belarusla
Avropa İttifaqı arasında münasibətlərin normallaşmasında Minskin Moskva ilə
münasibətlərinin gərgin olması da az rol oynamamışdı. Lakin bu yaxınlarda iki
ölkə prezidentinin görüşüb problemləri müzakirə etməsi Moskva ilə Minsk arasındakı
gərginliyi aradan qaldırmış oldu. Rusiya Belarusun yığılıb qalan borclarını
hissə-hissə ödəməsinə razılıq verdi, eləcə də bu ölkədən kənd təsərrüfatı
məhsullarının ixracına qoyulan qadağanı aradan qaldırdı. Maraqlıdır ki, prezident
xalqa müraciətində əvvəlcə yaxın ətrafının onun hazırladığı müraciəti birbaşa
kağızdan oxuyub. Lakin birdən-birə müraciəti kənara qoyaraq emosiya ilə çıxış
etməyə başlayıb. Belə bir hal isə ilk dəfə deyil. Rusiya ilə də münasibətlər
gərgin olanda Lukaşenko "Rosselnadzor”un rəhbərinin ünvanına sərt tənqidlər
səsləndirmiş, onu məhkəmə ilə hədələmişdi. Ardınca da Rusiya ilə neft-qaz
gərginliyində Gömrük Məcəlləsinin imzalamaqdan imtina etmiş, Avrasiya İqtisadi
İttifaqının iclasına getməmişdi. Hətta bəyan etmişdi ki, Avrasiya
strukturlarındakı nümayəndələrini geri çağıracaq.
İndi isə baş verənlər göstərir ki, ölkənin Avropa İttifaq ilə də
münasibətləri dalana dirənir. Özü də Qərb strukturlarından yalnız Avropa
İttifaqı ilə münasibətlər pisləşir. Belə ki, Belarus prezidentinin Birləşmiş
Ştatlara qarşı hər hansı iradı yoxdur. "Bu gün biz bir-birimizi eşidir və qulaq
asırıq”,- deyə o, ikitərəfli münasibətlərə qiymət verərkən bildirib.
Bununla yanaşı, Belarusun yaranmış vəziyyətdə Beynəlxalq Valyuta
Fondu ilə münasibətləri və qarşıdakı danışıqları asan keçməyəcək. Belarus
prezidenti müraciətində bu strukturla aparılan danışıqların bir sıra
"sirlərini” açıb. Rəsmi Minsk qurumdan kredit almaq niyyətindədir və yaxın
bir-iki ildə subsidiya almağa can atır. Lakin fondun Belarus qarşısında qoyduğu
ağır şərtlər var. BVF kreditin müqabilində kommunal xərclərin artırılmasını
istəyir. Bu isə ölkədə sosial vəziyyəti ağırlaşdıra bilər. "Biz bir il və yaxud
ilyarım müddətində mənzil-kommunal xərclərini 100 faiz artıra bilmərik. Bu,
ölkədə və cəmiyyətdə vəziyyəti nəzarətdən çıxara bilər”, - deyə prezident
vurğulayıb. Onun sözlərinə görə, BVF-nun ekspertləri müddətin 4-5 ilə kimi
artırılması barədə razılıq veriblər. Yəni kommunal xərclərin qiymətləri hissə-hissə
artırılacaq. Rəsmi Minsk dövlət sektorunda da islahatlar aparmaq niyyətində
deyil. Qeyd edilir ki, bu strukturların qeyri-effektivliyi iqtisadiyyat və bank
sektoru üçün təhlükəyə çevrilir. Ekspertlərin sözlərinə görə, Beynəlxalq
Valyuta Fonduna prezidentin iqtisadi siyasətlə bağlı digər bəyanatları da xoş
gəlməyəcək. O bildirib ki, hər hansı bir liberallaşma olmayacaq. Belarus
prezidenti hətta ticarət və antimonopol nizamlama üzrə nazirə qiymətlərin
əvvəlki qayda ilə nizamlanması prosesinə qayıdılması barədə tapşırıq verib. "Bu
cür bəyanatlar Beynəlxalq Valyuta Fondu ilə kredit proqramları ilə bağlı
razılaşma imzalamaq ümidlərinə birdəfəlik nöqtə qoymuş olur”, - deyə belaruslu
iqtisadçı Yaroslav Romançuk bildirib. "Ölkə daxilindən səslənən bəyanatları
nəzərə alsaq, BVF ilə danışıqlar böyük ehtimalla uzanacaq və yaxın gələcəkdə
hər hansı bir müsbət dəyişikliklərə gətirib çıxarmayacaq”, - deyə iqtisadçı
Anton Boltoçko da əlavə edib.
Beləliklə, Aleksandr Lukaşenkonun dediklərindən də bəlli olur ki,
Avropa Belarus təbliğat maşınının xarici qüvvələrin rolu barədəki fikirlərinə
inanmır. Belarus prezidenti də çıxışında bu məsələyə toxunub və bildirib ki, "insanlar
əllərində silah ölkəmizə daxil olmağa çalışırlar”. Bu iddianı hüquq
müdafiəçiləri və yerli müşahidəçilər ona görə inandırıcı saymırlar ki, bu
sözlər heç bir halda təsdiqinin tapmır. Məsələn, Ukraynadan silah dolu maşının
ölkə ərazisinə daxil olması barədə insident davam etmədi və Ukrayna tərəfinin
təzyiqləri ilə Belarus sərhədçiləri özləri ondan imtina etdilər. Hakimiyyət
orqanlarının Bobryuskdakı düşərgədə yaraqlıların hazırlandığı barədə xəbərlər
də təsdiqini tapmadı.
Hadisələrin bundan sonrakı gedişinin necə olacağı hazırda hamını ən
çox düşündürən sualdır. Görünən odur ki, Belarus Qərblə münasibətləri
gərginləşdirməyə üstünlük verəcək. Minskin Rusiya ilə sıx münasibətləri bərpa
etməyə üstünlük verməsi və fikir ayrılıqlarının aradan qalxdığını söyləməsi də
bu ehtimalı gücləndirir.
Azər