Minimum vaxt itkisi, maksimum şəffaflıq
İdxal
olunan malların elektron formada əvvəlcədən bəyan edilməsi sisteminin tətbiq
edəcək icraçı orqanlar müəyyənləşdirilib. Bu, Prezident İlham Əliyevin
imzaladığı "İdxal-ixrac əməliyyatlarına nəzarət sisteminin təkmilləşdirilməsinə
dair Tədbirlər Planı”nın təsdiq edilməsi haqqında sərəncamda öz əksini tapıb. İcraçı
orqanlar qismində Dövlət Gömrük Komitəsi, Vergilər və Maliyyə Nazirlikləri
müəyyənləşdirilib.
Tədbirlər
Planına əsasən, bu dövlət orqanlarına, mallar gömrük sərhədindən keçirilənədək,
qısa idxal bəyannamələrinin yalnız elektron formada təqdim edilməsi sisteminə
keçid və bununla bağlı məsuliyyət tədbirlərini müəyyən etmək tapşırılıb.
Bununla bağlı Gömrük Məcəlləsində, Nazirlər Kabinetinin 2014-cü il 22 iyul
tarixli 263 nömrəli qərarı ilə təsdiq edilmiş "Gömrük sərhədindən keçirilən
malların və nəqliyyat vasitələrinin bəyan edilməsi Qaydaları”nda və digər
aidiyyəti normativ hüquqi aktlarda dəyişikliklər ediləcək.
Sənədə
görə, idxal olunan malların elektron formada əvvəlcədən bəyan edilməsi sistemi
bu ilin dekabrın 1-ə qədər tətbiq olunmalıdır. Tədbirlər Planında gömrük prosedurlarının
sadələşdirilməsi və gömrük rəsmiləşdirilməsi prosesində "Bir pəncərə” sisteminə
qoşulan dövlət orqanları arasında sənəd mübadiləsinin təkmilləşdirilməsi də
nəzərdə tutulub. Bununla bağlı icraçı orqanlar qismində Dövlət Gömrük Komitəsi,
Vergilər, Maliyyə, İqtisadiyyat Nazirlikləri və aidiyyəti qurumlar
müəyyənləşdirilib. İcraçı dövlət qurumlarına gömrük prosedurları üçün tələb
olunan sənədlərin sayının azaltmaq, idxal-ixrac əməliyyatları zamanı beynəlxalq
sertifikatların tanınması işinin təşkil etmək, gömrük rəsmiləşdirilməsi zamanı
"Bir pəncərə” sisteminə qoşulan dövlət orqanları arasında aidiyyəti
məlumatların elektron formada mübadiləsini təmin etmək tapşırılıb. Bununla
bağlı Azərbaycan Respublikası Nazirlər Kabinetinin 2014-cü il 22 iyul tarixli
263 nömrəli qərarı ilə təsdiq edilmiş "Gömrük sərhədindən keçirilən malların və
nəqliyyat vasitələrinin bəyan edilməsi Qaydaları”nda və digər aidiyyəti
normativ hüquqi aktlarda dəyişikliklər, "Bir pəncərə” sisteminə qoşulan dövlət
orqanları ilə Dövlət Gömrük Komitəsi arasında razılaşdırma sənədinin
imzalanması nəzərdə tutulur. Gömrük proseduralarının sadələşdirilməsi və gömrük
rəsmiləşdirilməsi prosesində "Bir pəncərə” sisteminə qoşulan dövlət orqanları
arasında sənəd mübadiləsinin təkmilləşdirilməsi ilə bağlı tədbirlər bu ilin
sentyabrın 1-dək yekunlaşmalıdır.
Milli Məclisin İqtisadi Siyasət, Sənaye və Sahibkarlıq komitəsinin
üzvü, millət vəkili Vahid Əhmədov deyir ki, bu sərəncam gömrük sahəsində olan
bir sıra neqativ halların aradan qaldırılmasına səbəb olacaq: "Ümumiyyətlə son
illər gömrük sahəsində çox ciddi islahatlar həyata keçirilir. Bir çox
proseslərin insan faktoru olmadan elektron vasitələrlə həyata keçməsində, bəyannamələrin
elektron şəkildə verilməsində əsas məqsəd bu sahədə şəffaflığı təmin etməkdir.
Həmçinin gömrük sahəsində bu günə qədər olan bəzi neqativ halların qarşısını
almaq və bundan sonrakı mərhələdə yaxşı şərait yaratmaq üçün belə addımlar
atılır. Cənab Prezidentin bir qədər əvvəl kiçik və orta sahibkarlığın inkişafı,
həmçinin gömrük sahəsində sadələşdirmə ilə bağlı imzaladığı bu sərəncamlar
ölkəmizdə sahibkarlığın inkişafına əhəmiyyətli təsirini göstərir. Burada əsas
məqsəd ölkəmizə məhsul idxal və ixrac edən sahibkarların işində yaranacaq
problemlərin qarşısını almaqdır”.
Millət vəkili Azər Badamov bu
addımı yüksək qiymətləndirdiyini bildirdi: "Cənab Prezidentin tapşırığı ilə bu
günə qədər gömrük sahəsində bir çox sadələşdirmə tədbirləri həyata keçirilib.
Həmçinin qanunlarda bəzi dəyişikliklər olub. Gömrük sahəsində "Bir pəncərə”
sisteminin tətbiq edilməsi, "Yaşıl dəhlizin” yaradılması bütün maneələrin
aradan qaldırılması istiqamətində görülən tədbirlərdəndir. İndi isə idxal
edilən malların elektron formada əvvəlcədən bəyan edilməsi idxalçıların və
ixracatçıların işlərinin daha da asanlaşmasına, vaxt itkisinin minimuma
endirilməsinə şərait yaradacaq. Gömrük elə bir sahədir ki, orada şəffaflıq
maksimum dərəcədə təmin olunmalıdır. Məhsulların gətirilməsində və
aparılmasında heç bir problem olmamalıdır. Bu da maliyyənin hesabatlılığının
təmin edilməsində, həm də gəlirlərin müəyyən edilməsində əsaslı rol oyanacaqdır”.
Günel
Azadə