Minikitablara tələb artıb
Türkiyənin köklü nəşriyyatlarından "Can Yayınları”
ilin əvvəlindən kitab daşımaq dərdindən şikayətlənən və kitab ölçülərinin
mütaliəyə mane olduğunu bəhanə gətirənlər üçün yeni bir format təklif etdi –
minikitablar. Lap əvvəldən kitabların silsilə şəklində olacağı bildirilsə də,
nəşriyyatın əlavə xərc tələb edən bu formata sadəcə sınaq məqsədilə keçdiyi məlum
idi. Lakin ardı-arası kəsilməyən silsilənin ilk kitablarının təkrar nəşrinin
satış göstəriciləri nəşriyyatı həqiqətən də sözünün arxasında durmağa vadar
edib. Belə ki, "Can yayınları”ndan yayılan rəsmi məlumatda, tezliklə rəflərdə
yerini tutacaq yeni kitabların siyahısı paylaşılıb.
Minikitab dünyada bir müddət geniş yayılmış, lakin
kütləviləşə bilməmiş bir formatdır. Oxunması və daşınması daha rahat bir
dizayndadır. Bu kitabların tərtibatında istifadə olunan kağızı bütün dünya
Hollandiyadan alır. Bu xüsusi növ kağızlarla hazırlanan kitablar normal
kitabların çəkisindən 3 dəfə az olur. Səhifələri sıradan kitablarla müqayisədə
daha ağdır və arxa tərəfdəki səhifənin yazılarını əks etdirmir. Bu isə ictimai
nəqliyyatda mütaliə edərkən ürəkbulanmanı aradan qaldırır. Hətta min səhifəlik
kitabı belə cibinizdə rahat gəzdirə bilərsiniz.
İlin əvvəlində minlərlə oxucunu 18 türk və dünya klassiki
ilə birləşdirən bu yeni formatın siyahısına yeni əlavələrlə kitab sayı 55-ə
çatıb. Artıq may ayından Türkiyədə kitab mağazalarında kassaların yanında
xüsusi stenddə satılacaq kitablar – Şarlotta Bronte "Ceyn Eyr”, Emili Bronte
"Uğultulu təpələr”, Mixail Bulqakov "Master və Marqerita”, Çarlz Dikenz "Böyük
ümidlər”, Markez "100 ilin tənhalığı”, Viktor Hüqo "Notr-Dam kilsəsinin
qozbeli”, Nikos Kazançakis "Günaha son çağırış”, Cek London "Martin İden”,
Stefan Zveyq "Tanımadığım qadının məktubu və üç hekayə”.
Yay aylarında işıq üzü görəcək nümunələrin
müəllifləri arasında Mark Tven, Corc Oruel, Ceyn Austen, Ursula Le Quin, Stefen
Kinq, JRR Tolkien, Maria Varqas Lyosa kimi sevilən imzalar da yer alacaq.