Milli mənlik şüurunun inkişaf etdirilməsi və vətənpərvərlik hisslərinin tərbiyəsi
Hər bir insanın gənclik dövrü onun mənəvi
dəyərlərinin, dünya görüşünün, xasiyyətinin, şəxsiyyətinin və cəmiyyətlə
münasibətlərinin formalaşdığı dövrdür. Mütəxəssislərin fikrincə, yeniyetmələrdə
milli mənlik şüuru anlayışı idrak, emosional-mənəvi, davranış komponentlərinin
birliyini təşkil edir. Bu birliyin də hər komponentinin özünəməxsus
xüsusiyyətləri vardır ki, milli adət-ənənələrə, milli mədəniyyətə, ailədə
tərbiyə üsullarının xüsusiyyətinə görə formalaşır.
Bu
xüsusiyyətləri ayrı-ayrılıqda təhlil edən psixoloq Ülviyyə Hümmətova bildirdi ki, mənəvi və əxlaqi komponent digər
millətlərdən olan həmyaşıdlarına, digər mədəni dəyərlərə hörmət, etimad və
tolerant yanaşmanın göstəricisi hesab olunur. Davranış komponenti çoxmillətli
mühitdə özünüqiymətləndirmə, özünüreallaşdırma və sosial adaptasiya bacarığı
ilə xarakterizə edilir. Yəni yeniyetmələrdə milli şüur ümumi fenomendir,
məktəbdə vahid tədris prosesi zamanı şəxsiyyətin çoxmillətli cəmiyyətdə yerini
müəyyən edir. "Yeniyetməlik dövründə şəxsiyyətin formalaşmasının yaş
xüsusiyyətləri əxlaqi-mənəvi şüuru da özündə birləşdirir. Yeniyetmələr
identiklik axtarışında olurlar. Daim "Mən kiməm?” sualı onları narahat edir.
Bir növ bu sualın cavabı olaraq, öz şəxsi sərhədlərini yaratmağa başlayırlar.
Bu zaman ailənin qayda və norması ilə yeniyetmə arasında ciddi problemlər
ortaya çıxır,” – deyə həmsöhbətim bildirdi. Psixoloq şəxsiyyətin cəmiyyətə
yararlı olaraq formalaşmasında ailənin rolunun əvəzsiz olduğunu xüsusi qeyd
etdi. Yəni ailə-təhsil-cəmiyyət sanki bir zəncir yaradır. Cəmiyyətə inteqrasiya
edən yeniyetmə özündə hökmən müəyyən xüsusiyyətləri birləşdirir. Bu xüsusiyyətlər
ailədə, təhsil ocağında, mənsub qrupda formalaşır.
Yeniyetmələrdə
milli mənlik şüurunun formalaşması Müsahibim bildirdi ki, milli mənlik şüuru
ailədaxili dəyərlər sistemindən, mənsub olduğu etnik qrupun təyin edilməsindən,
bu qrupun xüsusiyyətlərindən yaranır: "Ailənin adət-ənənəyə riayət etməsi,
cəmiyyətin norma və qaydalarının uşaqlara vaxtında aşılanması, tərbiyə üsulunda
milli xüsusiyyətlərin nəzərə alınması ilə seçilməsi milli şüurun yaranmasına
təkan verir. Mənlik şüuru insanın özünün fikir və hisslərinin, mənafe və
məqsədlərinin öyrənilməsinə meylli olaraq, ictimai şüurla bağlıdır. Yeniyetməlik
dövründə əxlaqi şüur inkişaf etməyə başlayır, bu da öz tarixinə daha dərindən
baxış deməkdir”. Həmsöhbətim vurğuladı ki, milli mənlik şüuru eyni zamanda, öz
vətəninə mənəvi bağlılığı ifadə edir: "Yeniyetmənin mənəvi dünyası nə qədər çox
zənginləşərsə, milli mənlik şüuru və vətənpərvərlik hissləri də o qədər
formalaşmış olar. Uşaqların göz açdığı, boya-başa çatdığı mühit, təhsil aldığı
məktəb onun fikir və bacarıqlarının inkişafı üçün çox önəmlidir. Ailədaxili
nizam-intizam olmazsa, uşaq öz identikliyini tapmazsa, bu zaman onun milli
şüurunun formalaşmasında ciddi maneə yaranacaq”.
Tərbiyə
prosesindəki boşluqlar
Müsahibim bildirdi ki, hüquq pozuntusu və cinayət
törətmiş yeniyetmələrdə mənəvi-əxlaqi tərbiyə problemi yaşanmaqdadır. Səbəb
olaraq, ailə tərbiyəsində çatışmazlıqlar, təlim-tədris prosesində boşluqlar,
uşağın fərdi psixofizioloji xüsusiyyətləri, yeniyetməlik dövrünün böhranı
göstərilə bilər: "Cəmiyyətin və dövlətin inkişafının önəmli komponentlərindən
biri də uşaqların mənəvi-əxlaqi tərbiyəsi, onların sərbəst yetkin həyata
hazırlanmasıdır. Yeniyetmələrin mənəvi aləminin inkişafının təşkili uzun
müddətli, məqsədyönlü, ağır, eyni zamanda, ailəvi və ictimai tərbiyəyə,
maarifləndirməyə və fərdi inkişafa meylli bir prosesdir. Mənən zəngin insan,
ilk növbədə güclü milli xarakterə malik vətəndaşdır. Dəyişən sosial şəraitə
adaptasiya olan, zəhmət çəkməyi bacaran, verilən tapşırıqlara məsuliyyətlə yanaşan
olması deməkdir. Yeniyetmələrin mənəvi-əxlaqi inkişafının və tərbiyəsinin
əsasında aşağıdakı prinsiplər durur:
* İdeala meyllilik;
* Milli tərbiyəvi idealın əsasında dəyərlərin
formalaşdırılması;
* Əxlaqi nümunəyə uyğunlaşma;
* İdentifikasiya;
* Əhəmiyyətli şəxsin olması və onunla əlaqənin
saxlanılması. Mütəxəssis onu da xüsusi qeyd etdi ki, valideynlər uşağa ilk
əxlaqi nümunəni göstərən şəxslərdir. Yetkinlik yaşına çatmayanların tərbiyəsi
və mənəvi-əxlaqi inkişafı onların gələcəyini, bununla bərabər milli mənlik
şüurunu formalaşdırır”.
Mənlik şüuru ideoloji məsələdir
"Təmiz Dünya” Qadınlara Yardım İctimai Birliyinin
sədri Mehriban Zeynalova milli mənlik şüurunun vacib, ideoloji bir məsələ
olması üzərində dayandı. Mehriban xanımın fikrincə, hər bir insan, ölkə
vətəndaşı özünün milli mənliyini tanıması baxımından inkişaf edir: "Mən qadın
problemləri ilə məşğul olduğuma görə, həmişə deyirəm ki, biz qadınlar adətən,
daha çox özümüzü məişət səviyyəsində təqdim edirik. Amma hər bir qadın davranış
və hərəkətlərində belə, öz milli kimliyini nümayiş etdirməlidir. Bəzən
davranışlar cəmiyyət içərisində qıcıq doğurur. Bu nədən irəli gəlir? Milli
mənliyin, milli şüurun kifayət qədər formalaşmamasından. Hər kəs fərdi
prinsiplərlə yaşayır. Bəs vətəndaşın milli mənliyi nə vaxt görünür? Əlbəttə,
vətəndaş yetişdirəndə”.
Mehriban
xanım bildirdi ki, əgər qadın özündə bu milli mənliyi hiss etmirsə, öz qadınlıq
qürurunu qoruya bilmirsə, onda milli mənlik ola bilməz: "Bir məşhur əsərdə "İtə
ataram, yada satmaram” kəlamı yəqin ki, hər kəsin yaddaşındadır. Bu deyim, məhz
mənlik, milli şüur məsələsi idi. Bu, sadəcə, söz deyil, bizim keçmişimiz,
gələcəyimizdir”.
Müsahibim bildirdi ki, vətənpərvərlik hissi yalnız
döyüş meydanında deyil, gündəlik həyatımızda da özünü büruzə verməlidir: "Mən
öz işimi məsuliyyətlə görürəmsə, deməli, bu, vətənpərvərliyin bir tərkib
hissəsidir. İnsanlara münasibətimdə ölkəm üçün, cəmiyyət üçün çalışıramsa, bu
da vətənpərvərliyin bir hissəsidir. Bəli, döyüşmək lazımdır. Çünki real olaraq,
biz müharibə şəraitindəyik. Hər bir gənc şüurlu surətdə dərk etməlidir ki, onun
torpağı erməninin işğalı altındadır. Elə o gənci böyüdüb, tərbiyə edən qadın,
ana da bu döyüşkənliyi, vətənpərvərlik hisslərini unutmamalıdır. Bu, onun
işində, əməlində özünü daim büruzə verməlidir”.
Maarifləndirmə,
yoxsa nümunə?
Mehriban xanım bildirdi ki, ölkəmizdə müsbət milli
keyfiyyətlərə sahib olan insanlar çoxdur. O, hesab edir ki, bunun genetik
xüsusiyyətlərini nəzərə alaraq, gəncliyi öz keçmişinə baxmağı daim tövsiyə edən
verilişlər çox önəmlidir: "Lakin bəzən ədalətsiz olaraq, tamamilə kənardan,
xoşagəlməyən, ziddiyyətli fikirləri olan adamların önə çəkilərək, təbliğ
edilmələrinin də şahidi oluruq. Fərdi problemləri, ailə daxilindəki
münasibətləri isə ictimailəşdirmək, televiziya ekranında nümayiş etdirmək
qətiyyən düzgün deyil. Onların arasında kifayət qədər qüsurlu insanlar var. Bu
qüsurları öyrənmədən verilişə çıxarırıq və sonradan problemlə üzləşirik”.
Müsahibimin fikrincə, insanların tanışlıq
vasitəsilə ortaya çıxarılaraq, təbliğ edilmələri də bayağılıq yaradır: "Bu cür
hallar əslində, maarifləndirməyə xidmət etmir. Bu zaman milli-mənəvi şüuru
həqiqətən özündə daşıyan adamlar bir növ kölgədə qalırlar. Ekranlarımızda ifrat
dərəcədə böhranlı ailələrin guya problemlərinin çözülməsi məsələsi isə
gənclərin mənəviyyatına pis təsir edir, onları həqiqətdən uzaqlaşdırır. Onlarda
mücərrəd düşüncələr yaradır, hətta özünə inamsızlıq aşılayır. Kifayət qədər
ziddiyyətli və böhranlı adamların həyat tərzinin nümayişi gəncliyin
mənəviyyatına ağır zərbədir. Öz milli mənliyi ilə örnək ola biləcək insanlar
varlı da ola bilər, kasıb da. Əsas odur ki, onun yüksək mənəvi keyfiyyətləri var.
Yaxşı, nümunəvi ailə modelinin təbliği mütləq və hər zaman zəruridir. Öz
milləti haqda pis fikir söyləyən adamlar isə cəzalanmalıdır. Çünki bu cür
yanaşmalar, fikir ayrılıqları kifayət qədər pis vərdiş, pis təcrübədir və bunun
da acınacaqlı sonluğu olur. "Sosial şəbəkələrdə "bu millətdən millət olmaz,
bizimkilər belədir” və s. kimi xeyli mənfi fikirlərə rast gəlirsən. Bu cür
fikirlər milli kimliyi aşağılayır. Buna
da cinayət demək olar. Təəssüflər olsun ki, biz bunun qarşısını almırıq.”
Davranışların
dəyişməməsi üçün
Müsahibim qeyd etdi ki, hazırda müxtəlif dini
ideologiyanın insanları bəzən eybəcər hala saldığının da şahidi oluruq: "Mən
hesab edirəm ki, tərbiyənin təməli düzgün qoyularsa, insanın kənar təsir altına
düşməsi ehtimalı lap az olur. İdeoloji baxımdan "silahlanmış” bir adam hansı
ölkəyə gedir-getsin, dəyişməz qalacaq. Yəni davranış dəyişməz qalır. Yanlışlıq
buradadır ki, biz övladlarımızı ideoloji baxımdan düzgün istiqamətləndirə
bilmirik. Problemin kökü bundadır. Əgər mən övladıma milli kimlik, milli şüur
və milli qürur hisslərini aşılaya bilmişəmsə, o, öz ölkəsinin vətəndaşı olub,
öz xalqına xidmət edəcək. Yəni ölkəsinin hüdudlarından kənarda təhsil alan və
ya işləyən gənc oradan fərqli bir geyim, fərqli bir mətbəx gətirə bilər. Amma
onun davranışının kökündəki milli vətənpərvərlik qüruru heç vaxt sınmaz. Bütün
bunlar uşağa bağça yaşından aşılanmalıdır. Üstəlik, insanlara daha çox dəstək
verməliyik ki, onlar rahat şəkildə öz həyatlarını qura bilsinlər”.
Qarışıq
millətlərdən olan ailələrdə doğulan uşaqlarda milli mənlik şüuru
Müsahibim bildirdi ki, bu məsələ hansı tərəfin
güclü olmasından asılıdır. Yəni əcnəbiyə ərə gedən qadın da ideoloji baxımdan
hazır olmalıdır: "Bu sahədə bizim düşüncəmiz çox bəsitdir. Belə hallarda çox
zaman təsir altına tez düşməyimiz də bundan irəli gəlir. Təəssüf ki, başqa
millətlə evlilikdən doğulan uşaqlar da çox zaman başqalarının olur. Biz milli
kimliyimizi saxlamaq iqtidarında olmuruq. Bəzən əcnəbi ilə ailə həyatı quran
qadınlarımız qınanır. Amma bunun əvəzinə, qadınlarımızın ideoloji baxımdan
güclü olmalarına şərait yaratmalıyıq. Qadın bilməlidir ki, əcnəbiyə ərə
getdikdə, güclü seçim qarşısındadır. O, elə etməlidir ki, bu evlilikdən təkcə
onun ailəsi yox, ölkəsi də zərər görməsin. Qadının işi yalnız ərə gedib uşaq
doğmaqdan ibarət deyil. O, başa düşməlidir ki, ölkəsinin təmsilçisidir, bunu
hər addımında fikirləşməli, necə deyərlər, yüz ölçüb bir biçməlidir. Qadın
ölkəsinin təəssübünü çəkməlidir, hiss etməlidir ki, kənardan ona neçə göz
baxır. Azərbaycanlı olaraq, geyimindən tutmuş, bilik, bacarıq, əxlaq
normalarına qədər bütün davranışlarının həddini bilməlidir”.
Zeynəb
Əliqızı
Yazı Azərbaycan Respublikasının Prezidenti yanında
Kütləvi İnformasiya Vasitələrinin İnkişafına Dövlət Dəstəyi Fondunun keçirdiyi
müsabiqəyə təqdim etmək üçün hazırlanıb