Bakı 23°C
Millət vəkili: “Vəziyyət daim nəzarət altında saxlanılır”
Müşfiq
Cəfərov: "Gəncədə
karantin rejimi ilə əlaqədar reydlər keçirilir, əhali ilə maarifləndirici söhbətlər
aparılır”
"Karantinin ilk günlərindən etibarən
Gəncə Avtomobil Nəqliyyatı ilə Sərnişindaşıma İdarəsi gücləndirilmiş iş
rejimində çalışır. Şəhər rəhbərinin tapşırığına uyğun olaraq Gəncədə fəaliyyət
göstərən kiçik həcmli ictimai nəqliyyat vasitələri böyük tutumlu avtobuslarla əvəzlənib.
Həmçinin ictimai-nəqliyyat vasitələri hər günün sonunda dezinfeksiya olunur.
Bununla yanaşı avtobuslar sərnişinlərin istifadəsi üçün dezinfeksiyaedici məhlullarla
təmin edilib. Sürücülərin tibbi maskalardan istifadə etməsinə də xüsusi nəzarət
olunur”.
Bu barədə "Kaspi” qəzetinə açıqlamasında Milli Məclisin Gənclər və idman komitəsinin üzvü Müşfiq Cəfərov bildirib. Qeyd edib ki, xüsusi karantin
rejiminin tələblərinin icrasını təmin etmək məqsədi ilə şəhərdə 800-dən çox
polis və hərbçi iş başındadır.
Millət vəkilinin sözlərinə görə, bank,
ödəmə terminalları, eləcə də böyük market və apteklərin qarşısında, o cümlədən əhalinin
sıx toplaşdığı ərazilərdə Gəncə Şəhər Baş Polis İdarəsinin əməkdaşları vəziyyəti
daim nəzarət
altında saxlayırlar:
"Gəncənin
giriş-çıxışlarında quraşdırılan yoxlama-buraxılma postlarına nəzarət gücləndirilib
və bu postların sayının artırılması tövsiyyə olunub. Tibb sahəsində də gücləndirilmiş
iş rejimi tətbiq edilib. Tibb işçiləri və xidmət sahələrində çalışan şəxslərdən
yaxma nümunələri götürülərək, COVID-19 testləri aparılır. Gəncə şəhər Mənzil Komunal Təsərrüfat
İstehsalat Birliyinin canlı qüvvəsi və texnikası vasitəsilə xidməti ərazilərdə,
yəni yeraltı piyada keçidlərində, dayanacaqlarda, parklarda, meydanlarda, eyni
zamanda yaşayış binalarının ətrafında, girişlərində, liftlərin içərisində və
ümumilikdə əhalinin təmas etdiyi bütün ərazilərdə dezinfeksiya tədbirləri
görülüb. Bundan başqa şəhərin müxtəlif küçə və prospektləri də xüsusi avtomobillərlə
dərman vasitələri ilə yuyulur. Dezinfeksiya işlərinə Daxili İşlər Nazirliyinin
xüsusi nəqliyyat vasitələri də
cəlb
olunub”.
Deputat deyib ki, karantin dövründə
əhali ilə maarifləndirici söhbətlər aparılır, polis əməkdaşları şəhər sakinlərinə
mümkün qədər evdən çıxmamağı, zəruri hallarda çıxıldıqda tibbi maska, spirt və əlcəkdən
istifadə etməyi tövsiyə edirlər: "Gəncə şəhər İcra Hakimiyyətinin başçısı Niyazi
Bayramov və Baş Polis İdarasinin rəisi Əkbər İsmayılov reydlər keçirir, şəhərdə
fəaliyyət göstərən ərzaq və geyim mağazalarında xüsusi karantin rejiminin tələblərinə
hansı səviyyədə əməl edildiyi ilə yerində tanış olurlar. Həmçinin şəhər rəhbəri
apteklərdə kifayət qədər tibbi maska, spirt və əlcəklərin olub-olmaması ilə
maraqlanır. Bank və ödəmə terminallarının qarşısında dayanan vətəndaşlarla söhbət
aparılır, növbə zamanı 2 metrlik ara məsafəsinin gözlənilməsinin vacibliyi
vurğulanır. İctimai nəqliyyat vasitələrinin sürücüləri və sərnişinlərinə də
maskadan istifadənin zəruriliyi xatırladılır”.
Millət vəkili M.Cəfərov koronavirus
pandemiyasının
təhsil sahəsinə də təsirsiz ötüşmədiyini dilə gətirib. Deyib ki, bir çox ölkələrdə olduğu
kimi, Azərbaycanda da karantin rejiminin tələblərinə uyğun olaraq universitetlərin,
kolleclərin, məktəblərin və bu qəbildən olan bütün təhsil müəssisələrinin fəaliyyəti
dayandırılıb: "Mövcud
vəziyyətə əsasən, evdən çıxmadan da təhsil almaq mümkündür. Müasiryönümlü müxtəlif
proqram təminatlarından yararlanmaqla onlayn dərslərə qoşulmaq olur. Hansı ki, karantin
dövründə universitetlər, orta və idman məktəbləri, eləcə də ayrı-ayrı kurslar tərəfindən
bu işlər həyata keçirilir”.
Rufik İSMAYILOV
