Mətbuat Şurasının səlahiyyətləri artırılsın? - Fotolar
Bu günlərdə millət vəkili Əflatun Amaşov Mətbuat
Şurasının hüquqi statusuna yenidən nəzər salınmasına dair təkliflə çıxış edib. Ə.Amaşov
rəhbərlik etdiyi qurumun təşkilati-hüquqi forma baxımından ictimai təşkilat
olduğunu xatırladaraq, bir çox hallarda ictimai qınaq müstəvisindəki fəaliyyətin
yetərsiz təsir bağışladığını söyləyib. O qeyd edib ki, məsələyə elə həssas
yanaşılmalıdır ki, həm azadlıq məhdudlaşmasın, həm də azadlığın məhdudlaşdırıldığına
dair hansısa şübhələr yaranmasın. Ə.Amaşov deyib ki, bunun yolu MŞ-nın fəaliyyət
formasında hüquqi təkmilləşdirmə işinin aparılmasından keçir.
Məsələ
ilə bağlı media rəhbərlərinin rəyini öyrəndik."APA Holding”in
prezidenti Vüsalə Mahirqızı bildirdi
ki,Azərbaycan mediasının özünütənzimləmə qurumu və səlahiyyəti
olmalıdır: "Rəsmi statusun verilməsi, əslində, Mətbuat Şurasını QHT
funksiyasından çıxarır. Amma Əflatun Amaşovun söylədiyində həqiqət olan bir şey
var. İndiki halda, Mətbuat Şurasının tam sanksiyalaşdırma və qərar vermə hüququ
yoxdur. Ona görə də hələ ki, bizdə yalnız sanksiya tətbiq edilir. Əslində qərar vermək imkanı olan qurumlar daha çox səlahiyyətli
hesab olunur. İctimai rəydə də bu məqam əsas götürülür. Təəssüflər olsun ki, bəzən
Mətbuat Şurasının verdiyi qərarlar bir çox mətbuat orqanları tərəfindən yerinə
yetirilmir. Belə hallarda qurumun buna qarşı hansısa cəza tətbiq etmək imkanı
olmur. Əlbəttə, burada təkcə sanksiya tətbiqindən söhbət getmir. Mətbuat
Şurasına əlavə səlahiyyətlərin verilməsi, həm də medianın inkişafı baxımından
müəyyən addımların atılmasına kömək edə bilər. Belə ki, sözügedən qurum dövlət
orqanları, beynəlxalq təşkilatlar və bir sıra qurumlarla daha səlahiyyətli bir
orqan kimi fəaliyyət göstərə bilər. Yenə də qeyd edirəm ki, burada məqsəd təkcə
kimisə cəzalandırmaq deyil. Ümumi halda mətbuatın inkişafına və Mətbuat
Şurasının daha nüfuzlu bir quruma çevrilməsinin yardım edə bilər. Məncə, bu təklif
uğurludur. Mart ayında jurnalistlərin növbəti qurultayı baş tutacaq. Düşünürəm
ki, jurnalistlər bu məsələyə münasibət bildirməlidirlər. Yəqin ki, ondan sonra
bu təklif daha geniş şəkildə müzakirə ediləcək”.
"Bakı Xəbər”
qəzetinin baş redaktoru Aydın Quliyev deyir ki, Mətbuat
Şurası bu gün mediada özünü tənzimləyən bir orqan olaraq çox vacib bir
missiyanı yerinə yetirir: "Biz bu işlərin müsbət nəticələrini illərdir görürük.
Azərbaycanda media ilə cəmiyyətin, media ilə dövlət qurumlarının münasibətlərinin
tənzimlənməsində, həmçinin, medianın özünün peşəkarlıq səviyyəsinin yüksəldilməsində
və vətənpərvərlik və dövlətçilik ideyalarının mediamızda aparıcı prinsiplərə
çevrilməsində şuranın böyük rolu var. Ona görə də, düşünürəm ki, hazırkı şəraitdə
Mətbuat Şurasının səlahiyyətlərinin rəsmi qaydada genişləndirilməsi faydalı ola
bilər. Bunu ayrıca bir qanun şəklində də tətbiq etmək olar. Müasir
qanunvericilik normaları buna imkan verirsə, səlahiyyətlərin genişləndirilməsinin
başqa bir formasını tapmaq da mümkündür. Bütün hallarda, düşünürəm ki, qurumun
səlahiyyətlərinin artırılmasına çox böyük ehtiyac var. Bu həm də ölkədə ciddi
bir bəlaya çevrilmiş "reket jurnalistikası”nın və jurnalistikada olan qeyri-peşəkar
şəxslərin bu sahədən yığışdırılması baxımından vacibdir. Mən bu məsələyə təkcə
şuranın, medianın yox, həm də vətənpərvərlik və dövlətçilik məsələsi kimi
baxıram”.
"Şərq” qəzetinin
baş redaktoru Akif Aşırlı da bəzi məqamları qeyd etdi:
"Məsələ burasındadır ki, Mətbuat Şurasının hüquqi statusunun hansı şəkildə müəyyənləşəcəyi
hələlik dəqiq deyil. İndiyə kimi bu qurum QHT kimi fəaliyyət göstərib. Mətbuat
Şurası Azərbaycanda fəaliyyət göstərən KİV-lərə nəzarət edir. Amma təsisçilik
hüququ məsələsi bir qədər sual doğurur. Hesab edirəm ki, şuranın imkanları artırılmalıdır. Cəmiyyət və mətbuat
münasibətlərinin tənzimlənməsində Mətbuat Şurasının çəkisinin artması və səlahiyyətlərinin
genişləndirilməsinin tərəfdarlarından biri də mənəm. Amma Mətbuat Şurası
haqqında ayrıca bir qanun qəbul edilsə, təşkilatın strukturunda və idarəetmə
formasında hansı dəyişikliklərin olacağı məlum deyil. Məsələnin necə tənzimlənməsi
haqqında bir şey deyə bilmərəm. Bütün hallarda, hesab edirəm ki, Mətbuat Şurası
müstəqil idarəetmə mexanizminə sahib olmalıdır”.
"Demokratik Jurnalistlər” Liqasının sədri Yadigar Məmmədlibildirdi ki, bu gün jurnalistikaya aidiyyəti
olmayan, bu peşəni dərindən bilməyən insanlar, internetin verdiyi imkanlardan
yararlanaraq, şəxsi maraqlarına xidmət edirlər: "Onların sayının az olduğu dövrdə
Mətbuat Şurası komissiyaya daxil olan şikayətləri araşdırırdı. Qurum neqativ
halları ictimailəşdirir, qaydanı pozan KİV və jurnalistləri ictimai qınaq şəklində
tənbeh edirdi. Zaman keçdikcə bu saytların sayı artdı. İndi belə hallar elə kütləviləşib
ki, buna məcburuq. Həm cəmiyyətin üzvləri, həm də dövlət qurumları mətbuatdakı
neqativ hallarla bağlı Mətbuat Şurasını günahlandırır. Amma şuranın baxa biləcəyi
çərçivə çox dardır. Biz problemləri sadəcə, ictimai qınaq şəklində müzakirə edə
bilirik. Mətbuat Şurasının belə problemləri həll etməsi üçün əlavə səlahiyyətlərə
ehtiyacı var. Çünki elə məsələlər var ki, adi qaydada baxmaq olmur. Biz istəyirik
ki, verdiyimiz qərarların nəticəsi olsun. Çünki bu şəxslər ictimai qınağı nəzərə
almır və heç nədən çəkinmirlər. Onları bu əməldən çəkindirəcək inzibati üsulların
olması lazımdır. Bu məsələni ictimailəşdirmişik. İstəyirik ki, məsələ
qanunvericilikdə öz həllini tapsın”.
Şəbnəm Mehdizadə