“Məsuliyyətimiz və yaradıcılıq həvəsimiz ikiqat artır” - Fotolar
Mayın 1-də prezident İlham
Əliyev "İncəsənət xadimlərinə Azərbaycan Respublikası Prezidentinin
mükafatlarının verilməsi haqqında” sərəncam imzaladı. Sərəncama əsasən səhnə
fəaliyyəti ilə bağlı bir çox incəsənət xadimlərinə Azərbaycan Respublikası
Prezidentinin pul mükafatları verildi.
Sözsüz ki, bu xəbər
incəsənət nümayəndələrinin sevincinə səbəb oldu. Sosial şəbəkələrdə mükafat
alan hər kəsin ünvanına xoş sözlər və təbriklər yazıldı. Dövlət başçısı
tərəfindən mükafata layiq görülmək isə onların özləri üçün tamam başqa bir hiss
idi. Biz də mükafat alan incəsənət nümayəndələrinin sevincinə şərik olduq. Onlar
bizimlə söhbətində bu mükafatdan yeni stimul aldıqlarını və dövlətin onlara
göstərdiyi etimadın məsuliyyətini dərk
etdiklərini bildirdilər.
Xalq
artisti, xanəndə Mələkxanım Əyyubova bizimlə söhbətində bunun
aldığı ilk mükafat olmadığını qeyd etdi: "Sağ olsun, cənab prezidentimiz, məni
bu mükafata layiq görüb. İllərdir səhnədəyəm, sənətimi sevirəm. Dövlətimiz
tərəfindən indiyədək bu kimi çox mükafatlar almışam. Bunlar mənim üçün çox
dəyərlidir. Buna görə hər zaman dövlətimizə minnətdaram. Bir sənətçi üçün çox
böyük diqqətdir. Prezidentimiz tərəfindən mükafat almağın mənəvi dəyəri mənim
üçün daha yüksəkdir. Mükafata layiq görülmək sənətçinin daima diqqətdə
olduğunun göstəricisidir. Əlbəttə ki, diqqətdə olmaq, yaşının, sənətinin hansı
dövründən asılı olmayaraq hər bir insana stimul verir. Belə mükafatlar aldıqdan
sonra daima öz üzərimdə çalışıb, bu etimadı bir daha doğrultmaq istəyi baş
qaldırır. Hər dəfə mükafata layiq görüldükdə, hesab edirəm ki, məsuliyyətim
ikiqat artır”.
Əməkdar
artist, rejissor, aktyor Nicat Kazımov mükafata layiq görülən
zaman Konyada festivalda idi. Belə ki, Moldovanın Tanasoğlu adına Qaqauz milli
teatrında rejissorun quruluş verdiyi "Öldür məni ayolcum” tamaşası ilə "1000
nəfəs 1 səs” teatr festivalında uğurla
çıxış edib. Onu iki xoş hadisə münasibətilə təbrik edib, təəssüratlarını
öyrəndik: "Mayın 1-də səfərimiz başa çatırdı. Vətənə dönmək üçün hazırlıqlara
başlamışdıq ki, təbrik mesajları aldım. Sosial şəbəkəyə daxil olanda gördüm ki,
məni təbrik edirlər, şok oldum. Eşidəndə ki, dövlət başçımız məni
mükafatlandırıb, sevindim. Təbrikləri hələ də qəbul edirəm. Sənət dostlarım,
kollektivimiz məni təbrik etdi. Mən də fürsətdən istifadə edib hər kəsə
minnətdarlığımı bildirirəm”.
Əməkdar
artist Şövqi Hüseynov da mükafat alanlar sırasındadır. Rusiyanın Kineşma
vilayətində keçirilən III Beynəlxalq Rus klassik dramaturgiya festivalında
iştirak edən, orada "Ən yaxşı kişi rolu”na görə mükafata layiq görülən aktyor
üçün bu, ikiqat bayram idi. Dövlət başçısı tərəfindən belə mükafata layiq
görülməyi teatr cameəsinə böyük diqqət və qayğı kimi qiymətləndirən Ş.Hüseynov
bu dəyərləndirmələrin onların yaradıcılığına böyük stimul verdiyini də əlavə
etdi: "Bizə göstərdiyi bu etimada görə dövlət başçımıza minnətdarlığımı
bildirirəm. Bu, prezident İlham Əliyevin Azərbaycan mədəniyyətinə və teatr
sənətinə göstərdiyi yüksək diqqətin göstəricisidir. Bu kimi mükafatlandırmalar
teatrlarımızı yeni yaradıcılıq uğurlarına, Azərbaycan teatrının daha da inkişaf
etdirilməsinə və onun ölkə hüdudlarından kənarda tanıdılmasında yorulmadan
çalışmağa ruhlandırır. Bu münasibətlə məni təbrik edən hər kəsə təşəkkürümü
bildirirəm”.
Əməkdar
artist Naibə Allahverdiyeva da bunu onların sənətinə verilən dəyər kimi
qiymətləndirdi: "Buna görə mən cənab prezidentimizə təşəkkürümü bildirirəm.
Sənət adamına qiymət vermək sənətçini ruhlandırmaq, yaşatmaq deməkdir. Bunun
əsası da ulu öndərimiz Heydər Əliyev tərəfindən qoyulub. Allah ona rəhmət
eləsin. O, hər zaman sənətkarlara qiymət verib. Mən də bu mükafata layiq
görüldüyüm üçün çox sevinirəm. Buna çox böyük ehtiyacım var. Çünki övladım
təhsil alır. Mən bu mükafatı onun təhsilinə sərf edəcəyəm. Bu, mənim üçün çox
böyük köməkdir. Eşidən kimi hər kəs məni təbrik etdi. Mən də həmkarlarımı
təbrik edirəm. Bu siyahıya bizim teatrımızdan yeni aktyorlar və rejissorlar
qatılıb. Buna görə çox sevindim. Hesab edirəm ki, hər kəsin əməyi
qiymətləndirilməlidir. Sənət adamına stimul verəndə, o daha çox həvəslənir, ona
verilən bu dəyərlə yaşayır. İncəsənət nümayəndələri çox həssasdırlar. Bizə
göstərilən qayğıya çox həssaslıqla yanaşırıq. Hər kəsə öz təşəkkürümü
bildirirəm. İlk növbədə tamaşaçılara minnətdarlığımı bildirirəm ki, bizi
yüksəldən də, sevindirən də onlardır. Onlarsız biz heç kimik”.
Bu yaxınlarda 60 yaşını
qeyd edən əməkdar artist Rəhman Rəhmanovisə dedi ki, dövlət tərəfindən mükafat almaq fərəhli bir işdir: "Hiss edirsən
ki, bu sənətdə səni istəyirlər, hörmət edirlər. Əgər prezident mükafatına layiq
görülmüşəmsə, bu mənim böyük uğurumdur. Həm sənətdə, həm də həyatda. Çox
razıyam. Ölkə başçısına minnətdarlığımı bildirirəm ki, mənim sənətimi bu cür
yüksək qiymətləndirdi. Sözün açığı, gözləmirdim. Nə xoş mənə ki, digər
sənətçilərin sırasına məni də əlavə etdilər. Mənim üçün ikiqat bayramdır, gözəl
bayramdır”.
Kukla
Teatrının baş rejissoru, əməkdar artist Qurban Məsimov da öz
təşəkkürünü bildirərək bunu sevindirici və qürurverici hal kimi qiymətləndirdi:
"Bu mükafata layiq görüldüyüm üçün məni teatr və kino ictimaiyyətindən olan
dostlarım təbrik etdi. Əslində bu mənim üçün gözlənilməz oldu. Çünki heç vaxt
mənə mükafat verəcəklər deyə oturub gözləmirəm. Mükafata layiq görülməyim
xəbərini aldığım anın özü elə mənə ən böyük sevinc oldu. Mən öz işimlə, çox
sevdiyim sənətimlə məşğulam. Əməyimizin dəyərləndirilməsini əlbəttə ki, istəyərəm.
Bunun üçün cənab prezidentə, Mədəniyyət və Turizm Nazirliyimizə təşəkkür edirəm”.
Əməkdar
artist, aparıcı Əkbər Əlizadə 22 ildir ki, Musiqili Teatrda çalışır. O, bu
illər ərzində televiziyada və müxtəlif teatrlarda maraqlı layihə və obrazları
ilə tamaşaçıların sevgisini qazanıb: "Çox
şadam ki, teatrımızın repertuarında yer alan bir çox tamaşalarda varam. Zamanında tanınmış rejissor Cənnət Səlimovanın rəhbərlik
etdiyi Bakı Kamera Teatrında, Afaq Bəşirqızının "Bəşir Teatrı”nda da işləmişəm.
Bu günə kimi bir çox obrazlarım və rollarım olub. Televiziyada bir çox
layihələrin müəllifi və aparıcısıyam. İncəsənət aləmində hərtərəfli çalışmışam.
Bu gün tamaşaçılar tərəfindən qəbul olunuramsa, arzu olunuramsa, bu, mənim üçün
fəxrdir. Bütün bunların müqabilində dövlət başçımız tərəfindən mükafata layiq
görülməyim isə başqa bir hissdir. Çox sevinirəm ki, bu gün mükafata layiq
görülən incəsənət nümayəndələri arasında mən də varam. Dövlət başçımıza sonsuz
təşəkkürümü və minnətdarlığımı bildirirəm. Bu, teatr fəaliyyətimə verilən böyük
dəyərdir, qiymətdir. Mənə elə gəlir ki, bundan o tərəfi yoxdur. Yaşasın
Azərbaycan teatrı! Çalışacağam ki, bundan sonra da oynayacağım rollarla
tamaşaçılarımızı sevindirim”.
Aktyor 2017-ci ilin ona
uğurlu gəldiyini deyir: "Bu il mənə çox düşərli oldu. Yanvarın 13-dən 18-nə qədər
Təbrizdə 35-ci Beynəlxalq Fəcr Festivalında "Ər və arvad” tamaşasını oynadıq.
Orada mən "Ən yaxşı kişi rolu”na görə mükafata layiq görüldüm”.
Ağdam
Dövlət Dram Teatrının baş rejissoru, əməkdar artist Sərvər Əliyev qeyd etdi
ki, əslində dövlət başçısının incəsənət nümayəndələrinə verdiyi bu mükafat
sənət adamı üçün bir stimuldur: "Bu, ölkə başçısı tərəfindən bizə göstərilən
böyük bir dəstəkdir. Bu il ilk dəfə olaraq Ağdam teatrından iki nəfər
mükafatçılar siyahısında yer alıb - mən və əməkdar artist Aida xanım Qasımova.
Buna görə çox sevincliyik. İnanın ki, bölgə teatrında çalışan teatr
nümayəndələri, yəni bizlər üçün bu, böyük diqqət və qayğıdır. Mükafata layiq
görülən bütün incəsənət xadimlərimizi, həmkarlarımı təbrik edirəm.
Respublikamızın prezidenti İlham Əliyevə, Teatr Xadimləri İttifaqına göstərdiyi
diqqət və qayğıya görə dərin təşəkkürümü bildirirəm”.
Təbriklərə gəlincə isə,
Sərvər Əliyev dedi ki, onu ilk olaraq Ağdam Teatrının direktoru təbrik edib:
"İlk zəng teatrımızın direktoru Məhəmməd Hüseynovdan gəldi. Bundan başqa,
"Facebook” səhifəmdə çoxlu təbrik mesajları almışam. Buradan məni təbrik edən
hər bir kəsə dərin təşəkkürlərimi bildirirəm”.
Gəncə
Dövlət Dram Teatrının baş rejissoru İradə Gözəlovanın da
sevincinin həddi-hüdudu yox idi: "Kim istəməz ki, belə çətin vaxtda əlavə
məbləğ alsın? Dövlət başçımızın mənə qarşı göstərdiyi etimadı görəndə çox şad
oldum. Sevinirik ki, dövlət öz incəsənət nümayəndələrinə diqqətini əsirgəmir.
Dünəndən zənglər bitmir. Eşidənlər təbrik edirlər. Bunun bizə həm maddi, həm də
mənəvi xeyri çoxdur. Bu həm də mənə böyük stimul verdi. Bu stimuldan sonra daha
çox, var gücümlə işləmək eşqi yaranır”.
Xəyalə Rəis