“Məsuliyyətimiz daha da artdı”
Mayın 27-də prezident İlham Əliyev mədəniyyət xadimlərinə fəxri
adların verilməsi ilə bağlı sərəncam imzaladı. Azərbaycan mədəniyyətinin
inkişafındakı xidmətlərinə görə bir çox sənət adamları fəxri adlarla təltif
olundu. Həmin gün siyahıda adları olan sənət adamlarının sevincinin
həddi-hüdudu yox idi. Bu gün isə mükafatlandırılan sənətçilər öz
təəssüratlarını "Kaspi” ilə bölüşdülər.
"Bu
,həyatımda ən böyük sevinc oldu”
Xalq artisti, tarzən Vamiq
Məmmədəliyev heç kimə müraciət etmədən, kiməsə minnətçi düşmədən belə bir ada
layiq görüldüyünün qürurunu yaşayır: "Fəxri adların siyahısında öz adımı
görəndə bir atalar sözünü xatırladım: "Sənətini gör, get dur dağın dibində.
Əgər yaxşı işləmisənsə, səni mütləq axtarıb tapacaqlar”. Qızım, heç vaxt sənəti
olan insan yaddan çıxmır. Hər kəs bilir ki, kim kimdir və qabında nə var. Bu
xalq, vətən üçün çalışan insanlar diqqətdən kənarda qalmırlar. Sevindirici
haldır ki, fəxri ad alanların siyahısına baxanda, orada layiqlilərin adlarını
gördüm. Mən özümü də o layiqlilər sırasında bildim. Çünki 51 il mənim bu
sənətdə təcrübəm var. Özümü xoşbəxt hiss etdim ki, diqqətdən kənarda qalmadım. Bu,
həyatımda ən böyük sevinc oldu”.
"Əlimdən
gələni əsirgəməyəcəyəm”
Xalq artisti adına layiq
görülən xanəndə Teyyub Aslanov bizimlə söhbətində prezidentə minnətdarlığını çatdırdı: "Azərbaycan
Xalq Cümhuriyyətinin 100 illiyi ərəfəsində, xalqımız üçün əlamətdar bir tarixdə
özümün və dəyərli sənətkarlarımızın fəxri adlara layiq görülməsindən qürur
hissi keçirirəm. Sizin vasitənizlə cənab prezidentimiz İlham Əliyevə sonsuz
təşəkkürlərimi bildirirəm. Ulu öndər
Heydər Əliyevin yolunu davam etdirərək Azərbaycan mədəniyyətinin və
incəsənətinin inkişafına xüsusi diqqət yetirir, sənət adamlarına böyük qayğı
göstərir. Dövlətimizin mənə göstərdiyi bu etimad, layiq görüldüyüm bu yüksək
fəxri ad mənə həvalə olunan böyük məsuliyyət hissi deməkdir. Bundan sonra da
yaradıcılığımla ölkəmizin uğurlarını daha da artırmaq üçün əlimdən gələni
əsirgəməyəcəyəm. Fəaliyyətimi qiymətləndirdiyi və mənə verdiyi dəyər üçün
Mədəniyyət Nazirliyimizə də minnətdaram. Çox sağ olun”.
"Həmkarlarıma
görə də ikiqat sevincliyəm”
Xalq artisti fəxri adına
layiq görülən Murad Dadaşov bu adı
doğrultmaq üçün bundan sonra qarşısına daha böyük məqsədlər qoyacağını deyir:
"Çox sağ olun, diqqətinizə görə. Prezidentimiz məni və əziz həmkarlarımızı,
dəyərli sənətkarlarımızı fəxri adlara layiq bildiyi üçün inanılmaz qürur hissi
keçirirəm. Mənə bu adı layiq bildiyi üçün prezidentimiz İlham Əliyevə sonsuz
təşəkkürlərimi bildirirəm. Gördüyüm hər bir işdə, ərsəyə gətirdiyim bütün
layihələrdə Azərbaycanın adını daha da yüksəklərə daşımaq və ölkəmizin uğurlarını
daha da artırmaq üçün əlimdən gələni əsirgəməyəcəyəm. Həmkarlarıma görə də
ikiqat sevinc içində olduğumu bildirir və hamını təbrik edirəm!”.
"Özümü
çox xoşbəxt hiss edirəm”
Xalq
artisti Naibə Allahverdiyeva deyir ki, fəxri ada layiq
görülərkən ömrünün ən unudulmaz gününü yaşayıb: "Çox sağ olun ki, siz mətbuat nümayəndələri
məni bu qədər diqqətdə saxlayırsınız. Mən elə sizin vasitənizlə cənab
prezidentimizə və onun xanımına təşəkkürümü bildirirəm. Hazırda sevincimin
həddi-hüdudu yoxdur, özümü çox xoşbəxt hiss edirəm. İlk dəfə xəbəri eşidəndə,
az qaldım sevincimdən öləm. Açığı, birdən-birə belə bir ad alacağımı
gözləmirdim. Neçə vaxtdır ki, özümü çox pis hiss edirəm. Qan təzyiqimlə bağlı
problemlərim var. Evdə oturmuşdum, birdən mənə zəng edib bildirdilər ki, fəxri
ad almışam. Xəbəri eşidəndə şoka düşdüm. Tez qonşuya qaçdım və onlarda danışa
bilmədim. Qonşum da elə bildi ki, nəsə bir hadisə baş verib. Axır ki, ona
fikrimi çatdırdım və biz ağlamağa başladıq”.
Xalq artisti bildirir ki, onun üçün bu ad ən yüksək bir tituldur: "Bu
titulu aldıqdan sonra mənim məsuliyyətim daha da artdı. İndiyə qədər xalqımıza,
dövlətimizə nə qədər xidmətlərim olubsa, ondan daha artıq xidmət göstərməliyəm.
Adın yükü çox böyükdür”.
"Bu
mənim deyil, bütün nağara ifaçılarının uğurudur”
Xalq artisti Natiq Şirinov bu adı
nağara zərb alətinə göstərilən böyük diqqətin göstəricisi hesab edir: "Əvvəla,
bu ada layiq görüldüyüm üçün dövlətimizin başçısı, cənab İlham Əliyevə və onun
xanımı, birinci vitse-prezidentimiz Mehriban xanıma minnətdarlığımı bildirirəm.
Birinci xanım nağara sənətinə böyük diqqət göstərir. Bizim sənətimizi
qiymətləndirir. İlk dəfə zərb aləti olan qoşanağara ifaçısı Sadıq Zərbəliyeva xalq artisti adı
verilmişdi. İndi isə bu ad mənim qismətimə düşdü. Bu mənim deyil, bütün nağara
ifaçılarının uğurudur. Bu bizi daha da həvəsləndirir. Allah bizə cansağlığı
versin ki, üzərimizə düşən işin öhdəsindən layiqincə gələk. Nə qədər
sənətkarlar ad alıb, onları da öz adımdan təbrik edirəm. Bundan da gözəl günlər
görsünlər”.
N.Şirinovdan bu adın yolunu gözləyib-gözləmədiyini xəbər alırıq:
"Çoxdan gözləyirdim. Amma hesab edirdim ki, bu dəfə mənə verməzlər. Ağlıma da
gəlməzdi. Fəxri adlar siyahısı açıqlanan gün məşqdə idim. Namazdan durduqdan
sonra bir dostum zəng etdi, bildirdi ki, sənə fəxri ad veriblər. İnanmadım,
dedim yəqin zarafat edir. Sonra digər dostlarım zəng etdi və gördüm ki, məsələ
ciddidir. Ondan sonra sevinməyə başladım. Ona qədər səsimi çıxarmırdım. Dedim
birdən yalan demiş olaram. Hər zaman vətənim, xalqım üçün çalışmışam və bundan
zövq almışam. Bu fəxri adları aldığımıza sevinirik. Ancaq ad aldıqdan sonra
passiv şəkildə yerimdə durmaq fikrində deyiləm. Daha da çox çalışacağıq və
vətənimizin adını göylərə qaldıracağıq”.
"Məsuliyyətim daha da
artdı”
Xalq artisti Firudin
Məhərrəmov əslində belə bir mükafatı gözləmədiyini bildirdi: "Açığı,
gözləmirdim ki, Cümhuriyyətimizin 100 illiyində məni belə bir adla
mükafatlandırarlar. Mənim üçün gözlənilməz oldu. Biz elə bu yaxınlarda yeni bir
mükafat almışdıq. Davamlı olaraq çalışırıq, festivallarda çıxışlar edirik. Yəqin
onları nəzərə alıb, məni bu mükafata layiq görüblər. Mən bu hissi digər
həmkarlarıma da dadmağı arzu edirəm. Bunun məsuliyyəti bir az ağırdır.
Düşünürdüm ki, gələn il 60 yaşım olacaq, bəlkə onda bu adı mənə layiq görərlər.
Ancaq gördüyüm işləri nəzərə alıb belə məsləhət biliblər. İndi düşünürəm ki,
məsuliyyətim daha da artdı”.
"Bu,
bütün kollektivimizin uğurudur”
Abdulla Şaiq adına Kukla Teatrının
aktrisası Cəmilə Allahverdiyeva əməkdar artist fəxri adına layiq görüldüyü
üçün özünü şanslı hesab edir. Deyir ki, siyahıda adını görəndə çox
həyəcanlanıb: "Diqqətiniz üçün təşəkkür edirəm. Bilirsiniz ki, üzərimdə mərhum
dramaturq, rejissor Rəhman Əlizadənin böyük əməyi var. Bu mənim adım yox, onun
zəhmətinin haqqı idi. Kaş ki, müəllimim həyatda olardı. O, bu günü görməyi çox
istəyirdi. bəlkə də onun xeyir-duası üzərimdədir. Kollektivin dəstəyi də bu
işdə böyük rol oynayır. Belə ki, Kukla Teatrının direktoru Rəşad Əhmədzadə
tərəfindən mənim təqdimatımdan da çox şey asılı idi. Çünki o, işçilərini
qiymətləndirir, əziyyətinə dəyər verir. Bunun üçün ilk növbədə prezidentimizə,
daha sonra teatrımızın direktoruna minnətdaram. Onlara təşəkkürümü bildirirəm”.
21 ildir teatrda işləyən, aparıcı səhnə ustası kimi fəaliyyət göstərən
Cəmilə xanım deyir ki, o, Kukla Teatrında ən erkən fəxri ad alan
sənətkarlardandır: "Bilirsiniz ki, bu il teatrımızın 80 illik yubileyidir. Yubileyimiz
ərəfəsində mənim mükafatlandırılmağım bizim əməyimizin qiymətləndirilməsidir.
Bu, təkcə mənim deyil, kollektivimizin uğurudur”.
"Təbrik edirəm, dostunuz
fəxri ada layiq görülüb”
Bakı Uşaq Teatrının
direktoru İntiqam Soltan əməkdar artist fəxri adına layiq görülməsi
münasibəti ilə sosial şəbəkədəki səhifəsində təəssüratlarını bölüşüb: "Fəxri ad
almağım münasibətilə gələn təbrik zəngləri məni özümü görməyə vadar etdi, mövcudluğumu
mənə göstərdi.Düşüncələrimdə belə çata bilmədiyim təriflər, alqışlar, xoş
sözlər yağdırıldı.İlk zəngdəki sevinc titrəyişlərindən tutmuş, sonuncu
zəngdəki səmimiyyət hıçqırıqlarına qədər. Müxtəlif nazirliklərdə işləyən
dostlarımdan tutmuş, əlindəki süpürgə ilə işinin başında duran dostlarıma
qədər. Hiss etdim ki, varam, sevilirəm, inanın ki, mən də sevirəm.Sağ olun ki,bir az daha yaşamaq məsuliyyətini boynuma qoydunuz. Mən də
sizi təbrik edirəm. Çünki dostunuz fəxri ada layiq görülüb”.
"Bu
günü görməyi anam çox istəyirdi”
Əməkdar artist adına layiq görülən sənətçi Rəşad İlyasov bizimlə söhbətində xəbəri eşitdiyi an
inanmadığını deyir: "Neçə il idi ki, bu xəbəri gözləyirdim. Hər dəfə mənə
deyirdilər ki, növbəti il ola bilər ki, bu ada layiq görüləsən. Əslində bu il
aldığıma görə çox şadam. Çünki Cümhuriyyətimizin 100 illiyi mənim üçün ikiqat
bayram oldu. İlk dəfə eşidəndə kövrəldim, hətta ağladım. O hissləri sözlə ifadə
etmək mümkün deyil. Bu günü görməyi anam çox istəyirdi. Ancaq ona qismət
olmadı. Əminəm ki, mənim bu uğurumu görür və sevincimə şərik olub, ruhu şad
olacaq”.
R.İlyasov bu ada layiq görüldüyü üçün minnətdarlığını da bildirdi:
"Sizin vasitənizlə dövlət başçımıza, mədəniyyətimizin keşikçisi olan birinci
xanıma təşəkkürümü bildirirəm. Sağ olsunlar, məni diqqətdən kənarda
qoymayıblar. Onlar biz sənətçilərin üzərinə böyük bir yük qoyublar. Fəxri ad
almaq çox böyük məsuliyyətdir. Bu ada layiq olan sənət dostlarımı təbrik
edirəm. Onlara bu məsuliyyəti layiqincə yerinə yetirməyi arzu edirəm”.
"Şad
xəbəri səhnədə aldım”
"Qaya” Dövlət Ansamblının
solisti Şölə Səfərəliyeva da fəxri ad alanlar siyahısındadır. Əməkdar artist
fəxri adına layiq görülən ifaçı deyir ki, bu xəbəri eşidəndə, "Crystall hall”da
məşqdə olub: "Konsert hazırlığı zamanı telefonumun internetini söndürmüşdüm.
İlk olaraq məni aparıcı həmkarım Əfsanə Mehdiyeva təbrik etdi. Mən də təəccüb
içində qaldım, açığı, heç inanmadım və bunun zarafat olduğunu düşündüm. Gülmək
tutdu məni ki, belə zarafat olmaz. Əllərim əsdi, gözlərim doldu. Bir anlıq çox
qarışıq hisslər keçirdim. Sevincimdən ağlamağa başladım. Məni elə oradaca ilk
olaraq "Qaya” kollektivinin üzvləri təbrik etdilər. Xəbəri eşidəndən 1 dəqiqə
sonra səhnəyə məşqə çıxdım. Səhnədə "Ey həyat, sən nə qəribəsən” mahnısını ifa
etdim. Bu məqamda göz yaşlarım dayanmırdı. Bir anlıq 23 illik peşəkar səhnə
fəaliyyətim gözümün qabağından keçdi. Bir vaxt balaca bir uşaq vokal dərslərinə
gəlmişdi, bu günsə o uşaq fəxri ad alırdı... İçimdə sonsuz təşəkkürlər var idi.
Bilirsiniz ki, mən "Bəri bax”dan "Qaya” qrupuna keçən yeganə solist oldum. Rauf
Babayevin birinci tələbəsiyəm ki, fəxri ada layiq görüldüm. Ürəyimdə ona təşəkkür
edirdim, Bu xəbəri böyük səhnədə aldım. Qeyd edim ki, mən bu adı
kollektivimizin solisti olaraq almışam. Bundan da böyük uğurlarımız olsun.
Kollektivimin adını daha da ucaldım”.
Əməkdar artist onu təbrik edən həmkarlarına da təşəkkürlərini
çatdırdı. Qeyd etdi ki, məhz Cümhuriyyətimizin 100 illiyi ərəfəsində belə bir
ad alması onun üçün xüsusilə sevincli olub: "Bu ada layiq görülməyimdə əziyyəti
keçən insanlara təşəkkürümü bildirirəm. Müəllimim Rauf Babayevə minnətdarlığımı
bildirirəm. Sağ olsun prezidentimiz, məni
də fəxri ada layiq gördü. Təəssüratlarım çox gözəldir. İlk olaraq anama zəng
edib, deyəndə ki siz əməkdar artistlə danışırsınız, əvvəlcə zarafat bildi.
Deyəndə ki prezidentimiz bu gün mənə fəxri ad verib, anam da sevincindən
ağladı. Atam isə məşqdən gəldiyim zaman gözəl bir tortla məni təbrik etdi. Çox
qürurvericidir”.
Xəyalə Rəis