Mərkəzi Elmi Kitabxanada iki kitabın təqdimatı olub - Fotolar
AMEA Naxçıvan Bölməsinin
Mərkəzi Elmi Kitabxanasında İncəsənət, Dil və Ədəbiyyat İnstitutunun şöbə
müdiri, filologiya üzrə fəlsəfə doktoru, dosent Ramiz Qasımovun və Dilçilik şöbəsinin böyük elmi işçisi, filologiya
üzrə fəlsəfə doktoru, dosent Zülfiyyə İsmayılın birgə hazırladıqları "Müstəqillik yollarında: Liderlik missiyası” adlı
kitabın və həmin institutun Musiqi və teatr şöbəsinin böyük elmi işçisi, sənətşünaslıq
üzrə fəlsəfə doktoru, dosent Ələkbər Qasımovun "Naxçıvan teatrında tərcümə əsərlərinin
tamaşaları (1883-2013)” adlı monoqrafiyanın təqdimatı olub.
Tədbiri giriş sözü ilə açan
AMEA Naxçıvan Bölməsinin İncəsənət, Dil və Ədəbiyyat İnstitutunun direktoru,
AMEA-nın müxbir üzvü Əbülfəz Quliyev xalqımızın əldə etdiyi ən böyük nailiyyətlərdən
olan dövlət müstəqilliyimizin 25-ci ildönümünündə elmi işçilərin üzərinə düşən müəyyən
vəzifələrdən danışıb. Natiq qeyd edib ki, bu gün Azərbaycanın qazandığı nailiyyətlər,
görülən işlər ziyalı münasibətilə fərqlənən dəyərli elmi əsərlər ortaya qoyur.
Bu baxımdan institutun elmi işçiləri, filologiya üzrə fəlsəfə doktorları Ramiz
Qasımov və Zülfiyyə İsmayılın həmmüəllifliyi ilə ərsəyə gələn və dövlət müstəqilliyinin
əldə edlməsinin 25-ci ildönümünə həsr olunan "Müstəqillik yollarında: Liderlik
missiyası” kitabı da diqqəti cəlb edir.
Kitabda müstəqilliyimizin
qazanılmasında ulu öndər Heydər Əliyevin göstərdiyi misilsiz xidmətlər, Azərbaycanın
keçdiyi inkişaf yolu, əldə olunan uğurlar, ölkədə aparılan quruculuq və yenilənmə
işləri təhlil edilir.
Qeyd olunub ki, Musiqi və
teatr şöbəsinin böyük elmi işçisi, sənətşünaslıq üzrə fəlsəfə doktoru Ələkbər
Qasımovun Azərbaycan Respublikasında Multikulturalizm ilinə ithaf olunan
"Naxçıvan teatrında tərcümə əsərlərinin tamaşaları (1883-2013)” adlı
monoqrafiyası da öz aktuallığı ilə seçilir. Belə ki, yeni nəşrdə Naxçıvan Dövlət
Musiqili Dram Teatrının 130 illik tarixi ərzində tamaşaya qoyulmuş tərcümə əsərlərinin
səhnə təcəssümü ilk dəfə olaraq sistemləşdirilmiş şəkildə tədqiq olunub, eləcə
də bir sıra tamaşaların timsalında müfəssəl təhlillər verilib. Kitabda həmçinin
Naxçıvan Teatrının yaranma tarixi, eyni zamanda formalaşma dövrü, onun müasir
günümüzədək yaradıcılıq yolu, o cümlədən inkişafının ayrı-ayrı mərhələlərində
baş verən əlamətdar və tarixi hadisələr araşdırılıb.
Tədbirdə İncəsənət, Dil və
Ədəbiyyat İnstitutunun direktoru, AMEA-nın müxbir üzvü Əbülfəz Quliyevin "Dövlət müstəqilliyinin 25-ci ildönümünə həsr
olunan qiymətli əsər”, Bölmənin Əlyazmalar Fondunun direktoru, filologiya üzrə
elmlər doktoru Fərman Xəlilovun "Naxçıvan teatrına aid yeni tədqiqat əsəri” mözvusunda
məruzələri dinlənilib.
Daha sonra məruzə ətrafında
AMEA Naxçıvan Bölməsinin İncəsənət, Dil və Ədəbiyyat İnstitutunun Onomastika
şöbəsinin müdiri, filologiya üzrə fəlsəfə doktoru, dosent Firudin Rzayev, həmin
institutun aparıcı elmi işçisi, sənətşünaslıq üzrə fəlsəfə doktoru, dosent Əli
Qəhrəmanov, böyük elmi işçi, filologiya üzrə fəlsəfə doktoru Əli Həşimov çıxış
ediblər.
Sonda müəlliflər tədbir iştirakçılarına minnətdarlıqlarını bildiriblər.
Məlumat üçün onu da qeyd
edək ki, "Müstəqillik yollarında: Liderlik missiyası” və "Naxçıvan teatrında tərcümə
əsərlərinin tamaşaları (1883-2013)” adlı kitablar AMEA Naxçıvan Bölməsinin Mərkəzi Elmi Kitabxanasının "Yeni
kitabların daimi sərgisi”ndə nümayiş olunur.