Məqsəd Azərbaycanı zəiflətməkdir
Milli Şuranın 11
sentyabrda baş tutan mitinqinə xarici qüvvələrin dəstək verməsi barədə səsləndirilən
fikirlər səngimir. Bildirilir ki, həmin qüvvələr ölkə daxilində sabitliyi
pozmaq istəyirlər və hakimiyyətə təzyiq edə bilmək üçün müxalif qurumlara dəstək
göstərirlər. Bu sırada isə daha çox Qərbin, "gülənçi”lərin və dindən siyasi alət
kimi istifadə edən dövlətlərin adı çəkilir. Bəs onların hədəfləri nədir? Azərbaycanda
sabitliyi pozmaqla nə əldə etmək istəyirlər və buna nail ola bilərlərmi?
Millət vəkili Jalə Əliyeva "Kaspi”nin suallarına cavabında dedi ki, tək bir
cavabı var - Azərbaycan durmadan inkişaf edir deyə müəyyən xarici dairələr
qısqanclıq nümayiş etdirirlər: "Biz dünyada gedən bəzi problemlərdən, maliyyə
böhranından çıxa bildik. Ölkəmiz demək olar ki, bütün problemlərdən, enişlərdən,
üzü ağ çıxıb. Dünyanı ağuşuna almış narahatlıqların Azərbaycandan yan keçməsi,
ölkəmizin balanslı xarici siyasət yürütməsi, iqtisadiyyatını idarə edə bilməsi
kimlərəsə xoş gəlmir. Bəzi qarışıqlıqlardan uzaq durmağımız, bölgədə nüfuz
sahibi olmağımız, getdikcə nüfuzumuzun bir qədər də artması, bölgənin, regionun
lider dövlətinə çevrilməyimiz və qüdrətli olmağımıza qısqanclıqla yanaşırlar.
Dünyada öz sözünü demiş və iradəsini diktə etməyə alışmış qüvvələrə bunlar sərf
etmir və kiçik dövlətlərin söz sahibi olmasını istəmirlər”.
J.Əliyeva
bildirdi ki, Azərbaycanın inkişafına və nüfuzunun artmasına mane olmaq istəyənlər
bunun üçün əllərindən gələni edirlər. Ən rahat yol isə buradakı əlaltıları
vasitəsilə qarışıqlıq yaratmaqdır: "Həmin adamlara maliyyə ayırmaqla ölkəmizdəki
sabitliyi, hökm sürən əmin-amanlığı boğmağa çalışırlar. Həmçinin xalqın ürəyinə
şübhə toxumu səpməyə cəhd edirlər. Bunu artıq hamı başa düşür. Çünki deyilənlər
gizlədilməsi mümkün olmayan həqiqətlərdir. Üstəgəl, təəssüf doğuran, arzuedilməz
həqiqətlərdir”.
J.Əliyeva onu da
nəzərə çatdırdı ki, ölkədə vacib proseslər yaşanan zaman həmin qüvvələr bir qədər
də aktivləşirlər: "Diqqət etsəniz, görərsiniz ki, bu cür proseslər hər zaman Azərbaycan
siyasi əhəmiyyətli proses ərəfəsində olduğu zaman daha da genişlənir. İstər seçkilər,
istərsə də referendum ərəfəsində həmişə bunu müşahidə edirik. Şübhə toxumları əkərək
xalqın diqqətini yayındırmağa, narazılıq yaratmağa çalışırlar. Toplumu mənfi tərəfə
yönəltmək istəyirlər. Amma təcrübə göstərir ki, xalq heç zaman öz düz yolundan
dönməyib, inanıram ki, bundan sonra da dönməyəcəklər. Çox uzağa getməyək -
aprel hadisələri zamanı bunu müşahidə etdik. Həmin vaxt hər kəs bir nöqtəyə
vururdu. Hamı Qarabağın azad olması üçün həm döyüşə, həm də birləşməyə hazır
idi. Xalq da öz liderinə inanır. Ona görə də xarici qüvvələrin daxildəki əlaltıları
vasitəsilə reallaşdırmağa çalışdıqları yeni təxribat planları da fiaskoya
uğrayacaq. Hətta başlamamış iflas edəcək”.
Politoloq Elxan Şahinoğlu da kənar qüvvələrin məqsədli şəkildə Azərbaycan
haqda mənfi fikirlər səsləndirdiyini düşünür: "Razıyam ki, insan haqları
hansısa ölkənin daxili işi deyil. Beynəlxalq təşkilatlar məhz onun üçündür ki,
gərəkli anlarda ölkə hakimiyyətinə demokratiya və insan haqları siyasətini
korrektə etmələri ilə bağlı tövsiyələrini versinlər, məruzəçi təyin etsinlər,
hesabat hazırlasınlar və s. Buna baxmayaraq, ABŞ Konqresində Azərbaycanda insan
haqları və demokratiyanın durumuyla bağlı dinləmələrin "Azərbaycan naminə”
olduğuna şübhə edirəm. Əgər dinləməni təşkil edənlərin içərisindəerməni
lobbisinin təsiri altında olan şəxslər çoxluq təşkil edirsə, belələrinin dinləmələri
Azərbaycanda insan haqları və demokratiya naminə həyata keçirdiklərinə
inanmıram. Onların əsl məqsədi Azərbaycanda insan haqları və demokratiyanın bərqərarı
deyil, Azərbaycanın tamamını - iqtidarlı və müxalifətli zəif durumda saxlamaq,
ölkəmizin Ermənistan üzərindəki üstünlüyünü artırmasına, Dağlıq Qarabağı nəzarətə
götürməsinə mane olmaqdır. Əgər həmin konqresmenlər bu qədər ədalətlidirlərsə,
niyə Azərbaycana qarşı ədalətsiz 907-ci düzəlişi tətbiq edirdilər, axı o zaman
insan haqları və demokratiya ilə bağlı Vaşinqtonun Bakıya hər hansı iradı yox
idi? Çünki həmin konqresmenləri Azərbaycanda insan haqları və demokratiya yox,
Ermənistanın işğalçı siyasətini müdafiə etmək düşündürürdü. Bu müddətdə dəyişən
bir şey yoxdur”.
Politoloqun qənaətinə
görə, Azərbaycan hakimiyyətinin tənqidçiləri Ricard Kozlariç və Devid Kramer öz
fikirlərini ifadə edirlər, bunu kimsə onlara qadağan edə bilməz. Ancaq digər tənqidçi
rolunda çıxış edən amerikalı konqresmenlərin əksəriyyətinin Azərbaycanı tənqid
etmələrində səmimiyyət azdır: "Azərbaycanda nə dəyişiklik baş verəcəksə, bu,
daxildəki qüvvələrin siyasi iradəsinin hesabına mümkün olacaq. Həmin dəyişikliklər
– siyasi və iqtisadi islahatların sürətləndirilməsi bizə lazımdır, amerikalı
konqresmenlərə yox! Rəsmi Vaşinqtonun Azərbaycanda inqilab olmasında maraqlı
olduğuna inanmıram. Ancaq amerikalı bir qrup konqresmenin Dövlət Departamenti və
Ağ Ev rəsmiləri kimi düşündüyünü zənn etmirəm. Onlar "Azərbaycan üçün nə qədər
pisdirsə, bizim üçün (erməni lobbisi) və Ermənistan üçün bir o qədər yaxşıdır”
prinsipindən çıxış edirlər”.
Şəfa Tapdıq