Məkrli üçlük
Sosial bazası tükənən, xalqın etimadını itirən
radikal müxalifət partiyaları və onların "liderləri” Azərbaycanda keçirilən seçkilərdə
hər zaman məğlub olub, siyasi mübarizəni uduzublar. Hər dəfə eyni biabırçı aqibətlə
üzləşmək bu təşkilatları, orada təmsil olunan insanları bir-birindən narazı
salıb, partiyadaxili gərginlik, qarşıdurma, parçalanma pik həddə çatıb. İndi
siyasi partiyadan daha çox, dərnəyi xatırladan bu radikal təşkilatlar, həmçinin
onların rəhbərləri varlıqlarını qorumaq üçün çarəni xarici himayədarlara
sığınmaqda görürlər. Məhz xarici qüvvələrin maddi və mənəvi dəstəyi ilə radikal
müxalifət liderləri Azərbaycandakı seçkilərdə yenidən iştirak edir, aldıqları
siyasi sifarişlərə uyğun davranış nümayiş etdirir, "bəlkə də qaytardılar”
xülyası ilə yaşamlarını davam etdirirlər.
Xatırlayırsınızsa, sonuncu prezident seçkiləri öncəsi
xarici qüvvələrin təsiri altında Ziyalılar Forumu, "EL” Hərəkatı, Milli Şura təsis
edən radikallar aldıqları təlimat əsasında kinodramaturq kimi tanınan, cibində
ikili vətəndaşlıq pasportu gəzdirən Rüstəm İbrahimbəyovu özlərinin vahid namizədi
seçmişdilər. Böyük məbləğdə maliyyə vəsaiti müqabilində radikal müxalifət
liderləri heç bir siyasi fəaliyyəti olmayan R.İbrahimbəyovun az qala ətəyindən
öpür, onu dahi Mirzə Cəlilin "Ölülər” əsərindəki Şeyx Nəsrullah obrazında
görür, ümid edirdilər ki, o, xalqın gözündə ölmüş müxalifəti dirildəcək, ona
yeni nəfəs verəcək. Əli Kərimli, İsa Qəmbər, Cəmil Həsənli və onların ətrafındakı
kütlə sadəlövhlüklə inanırdılar ki, Rusiyada yaşayan və oradakı "Milyarderlər
İttifaqı”nın üzvü olan R.İbrahimbəyov Şimal qonşumuzun dəstəyi nəticəsində
prezident seçiləcək, AXCP-Müsavat liderləri və tərəfdarları da "ağ günə”
çıxacaqlar. Ancaq Azərbaycan xalqı öz qətiyyətini və iradəsini ortaya qoyaraq,
xarici dairələrə satılmış radikal müxalifət liderlərinin və onların
havadarlarının planlarını pozdu. Beləliklə də müxalifətçilər daha bir sarsıdıcı
zərbə alaraq, növbəti dəfə məğlub duruma düşdülər.
Lakin baş verən proseslər onu göstərir ki,
radikallar xalqın onlara verdiyi dərslərdən yenə də düzgün nəticə
çıxarmayıblar. Belə ki, sentyabrın 26-a ümumxalq səsverməsinin təyin olunması,
Konstitusiyaya əlavə və dəyişikliklərin ediləcəyi xəbərini alan AXCP, Milli
Şura, Müsavat Partiyası və onların ətrafına cəm olanlar yenidən "fəallaşıblar”.
Azərbaycanda sivil siyasi mübarizə aparmaq gücündə olmayan radikal müxalifət "ənənəvi”
taktikaya üstünlük verərək, referendum öncəsi yenidən ölkə daxili vəziyyəti gərginləşdirməyə,
daxili sabitliyi pozmağa cəhd edirlər. Mediada yayılan məlumatlardan belə məlum
olur ki, bu işdə onlara xarici ölkələrin Azərbaycandakı səfirliklərindən bir neçəsi
də yardım göstərməkdədir. Məhz bu məsləhət-məşvərətlərdən, yardımlardan sonra əvvəlcə
AXCP və Milli Şura, ardınca isə Müsavat Partiyası mitinq təyin edib, əhalini
siyasi hakimiyyətə qarşı çıxmağa, etiraz etməyə səsləyib. Bundan başqa, aksiya ərəfəsində
ABŞ səfirliyindən siyasi partiyalarla, QHT-lərlə intensiv əlaqə saxlanılması,
diplomatik korpusdan mitinqin dəstəklənməsi xahişinin edilməsi barədə mediada
gedən məlumatlar da bir daha təsdiq edir ki, radikallar, o cümlədən AXCP sədri Ə.Kərimli
və onun ətrafı Azərbaycanın imicini ləkələmək, ölkədə gərginlik yaratmaq üçün
konkret sifariş icra edirlər.
Qeyd edək ki, Ə.Kərimli və onun ətrafının anti-Azərbaycan
dairələrin sifarişlərini yerinə yetirməklə öz xəyanətkar məqsədlərini həyata keçirmək
cəhdləri iyulun 15-də Türkiyədə baş verən dövlət çevrilişinə cəhdə münasibətdə
də özünü açıq şəkildə büruzə verib. Həmin vaxt Azərbaycan iqtidarı birmənalı
mövqe ortaya qoyaraq Türkiyə dövlətini, dövlətçiliyini, onun qanuni hakimiyyətini
dəstəkləsə də, AXCP sədri Ə.Kərimli, onun təsiri altında olan Milli Şura,
rupora çevrilən "Azadlıq” qəzeti, "N!DA”çılar, həmçinin AXCP tərəfdarları,
xüsusən də Natiq Ədilov, Qənimət Zahid, Mahmud Şərifov, Rəşid Cəfərov Vüqar
Niftiyev və digərləri F.Gülənə dəstək xarakterli təbliğatlarını davam etdiriblər,
hətta Türkiyədə bu şəbəkənin darmadağın edilməsini pislədilər. Bu heş də səbəbsiz
deyildi. Belə ki, əgər Türkiyədə qiyamçılar prezident R.T.Ərdoğanı devirə bilsəydilər,
Azərbaycana qarşı da geniş mübarizə cəbhəsi açacaqdılar. Türkiyənin baş naziri
və xarici işlər naziri də o zaman açıq mətnlə bildiriblər ki, gülənçilər Azərbaycanda
da çevriliş hazırlayırmışlar. Dünyəvi Azərbaycanda gülənçiliyin sosial bazası
olmadığından bu rolu ənənəvi radikal müxalifət, daha dəqiqi, AXCP yerinə yetirməyə
çalışıb.
Bütün sadalanan faktlar bir daha nümayiş etdirir
ki, ABŞ-Gülən şəbəkəsi, eyni zamanda bəzi region ölkələri Azərbaycanda vəziyyəti
gərginləşdirməyə çalışırlar. Xarici dairələrin, diplomatik korpus nümayəndəsi
adı altında kəşfiyyat fəaliyyəti göstərən xarici qurumların bu məkrli
planlarının həyata keçirilməsində AXCP, Milli Şura və başqa təşkilatlar əsas
rol sahibidirlər. Cəmil Həsənlinin Strasburqa səfəri, ABŞ Konqresində, Haaqada
Azərbaycanla bağlı müzakirələrin təşkili də göstərir ki, bəzi Qərb dairələri Azərbaycanda
vəziyyəti gərginləşdirmək məqsədilə növbəti dəfə hərəkətə keçiblər. Elə AXCP və
Milli Şuranın ötən bazar günü keçirdiyi mitinqə Qərb dairələrinin, habelə bəzi
region ölkələrinin yaxından dəstəyi də buna əyani sübutdur. "İslam Hərəkatı
Birliyi”nin sədri Taleh Bağırzadənin və İslam Partiyasının rəhbəri olmuş Mövsüm
Səmədovun tərəfdarlarının 11 sentyabr mitinqinə qoşulması da bu prosesin bəzi
qonşu ölkələrin müəyyən dairələri tərəfindən dəstəkləndiyini aydın göstərir.
Yekun olaraq qeyd edək ki, müstəqil siyasət həyata
keçirən Azərbaycan günü-gündən inkişaf edib gücləndikcə, ölkə başçısının rəhbərliyi
altında yalnız milli və dövlətçilik maraqlarına uyğun, uzaqgörən addımlar
atıldıqca, ermənipərəst dairələr, anti-Azərbaycan şəbəkə bundan qıcıqlanır. Məhz
buna görə də Azərbaycanda siyasi proseslərin normal axarını çərçivədən
çıxarmaq, cəmiyyətdə gərginlik, qarşıdurma
yaratmaq üçün məkrli planlar hazırlanır. Çox təəssüflər olsun ki, belə xəyanətkar
"layihələrdə” - planlarda "sapı özümüzdən olan baltalar” əsas rol ifaçısı kimi
çıxış edirlər. AXCP və Milli Şura, ən əsas da Ə.Kərimli müxtəlif istiqamətlərdən
Azərbaycana qarşı yönəlmiş həmlələri dəstəkləməklə, anti-Azərbaycan dairələrin
sifarişlərini icra etməklə istənilən qüvvə ilə əməkdaşlığa hazır olduğunu bir
daha aydın göstərir. Bu səbəbdən də artıq Ə.Kərimlinin və onun anti-milli dəstəsinin
tam ifşa olunması, onların ölkənin siyasi səhnəsindən kənarlaşdırılmasının
vaxtı çatıb.
Alpər
TURAN