Mehriban Əliyevanın fəaliyyəti sosial sahədə böyük dəyişikliklərə səbəb olacaq
Azərbaycanın Birinci vitse-prezidenti, Yeni Azərbaycan
Partiyasının (YAP) sədr müavini, UNESCO və İSESCO-nun xoşməramlı səfiri, Milli
Məclisin deputatı Mehriban Əliyeva özünəxas nəcib, humanist və insanpərvər
xarakterlə cəmiyyətdə mənəvi aşınma yaradan, eləcə də saf və ali dəyərləri
ucuzlaşdıran mənfi meyillərə qarşı barışmaz mövqe tutur, insanlığın təntənəsinə
xidmət edən nəcib təşəbbüsləri ilə həm də sivilizasiyalararası dialoq prosesinə
öz töhfəsini verir. Onun elm, təhsil, mədəniyyət və idman sahələrinin
inkişafına yönəlmiş fəaliyyəti, ölkədəki quruculuq proseslərində yaxından
iştirakı ciddi elmi əsaslara söykənir. Buna görə də Mehriban xanımın hərtərəfli
fəaliyyəti cəmiyyət tərəfindən yüksək qiymətləndirilir.
Uzun illərdir ölkənin ictimai-siyasi, mədəni,
humanitar, sosial həyatında mühüm və fəal rol oynayan Mehriban xanım Əliyeva Azərbaycan
Prezidenti İlham Əliyevin fevralın 21-də imzaladığı sərəncamla ölkənin Birinci
vitse-prezidenti təyin olunduqdan sonra da qeyd olunan sahələrdə fəaliyyətini
davam etdirəcəyini bildirib. O, Rusiyanın "Vesti nedeli” verilişinə müsahibəsində
deyib ki, Birinci vitse-prezident kimi bundan sonrakı işlərini sosial məsələlərin,
əhalinin aztəminatlı hissəsinin problemlərinin həlli üzərində qurmaq niyyətindədir.
Mehriban xanım mərhəmətsizlik və laqeydliyin qorxulu anlayışlar olduğunu diqqətə
çatdıraraq, istər ictimai xadim, istərsə də dövlət məmuru üçün humanizmi
qorumağın vacib olduğunu vurğulayıb. Mehriban xanım Əliyevanın bu məlum təyinata
qədər Azərbaycan üçün gördüyü işləri nəzərdən keçirsək, belə bir mühakimə
yürütmək olar ki, birinci xanım bundan sonrakı illərdə əvvəlki fəaliyyətini
dövlət idarəçiliyində daha sistemli şəkildə, uğurla həyata keçirəcək.
Milli Məclisin
Əmək və sosial siyasət komitəsinin üzvü, millət vəkili Musa Quliyev "Kaspi”yə açıqlamasında bildirib ki, Mehriban
Əliyeva Birinci vitse-prezident təyin olunana qədər bütün ictimai-siyasi fəaliyyəti
boyu humanitar, sosial sahələri daim diqqət mərkəzində saxlayıb. Millət vəkilinin
sözlərinə görə, Mehriban xanım məhz bu sahələrdə həyata keçirdiyi layihələr,
gördüyü işlər sayəsində xalqın etimadını, inamını, məhəbbətini qazanıb:
"Mehriban xanım Heydər Əliyev Fondunun prezidenti, UNESCO və İSESCO-nun xoşməramlı
səfiri, millət vəkili kimi həm deputat seçildiyi rayonda və ümumilikdə Azərbaycanda,
həm də dünyanın müxtəlif ölkələrində çoxsaylı layihələrə, mühüm işlərə imza
atıb. Buna misal kimi, valideyn himayəsindən məhrum olan uşaqlara dövlət
qayğısının göstərilməsi, xəstələrin müalicəsi, əlilliyi olan şəxslərin reabilitasiyası,
uşaqlar üçün müalicə və istirahət pansionatlarının, məktəblərin, uşaq
bağçalarının, xəstəxana və poliklinikaların tikilməsini və sair yüzlərlə belə
faktları sadalamaq olar. Bu layihələrin reallaşdırılması Mehriban xanımın təşəbbüsü
və rəhbərliyi ilə mümkün olub. Onun təşəbbüsü ilə Azərbaycandan xaricdə də
çoxsaylı humanitar aksiyalar həyata keçirilib. Bu humanist missiya bütün
dünyaya bəllidir və gözəl nümunədir. Azərbaycanın Birinci vitse-prezidenti kimi
Mehriban Əliyeva bundan sonra tamamilə yeni statusda, indiyə qədər olan fəaliyyətini
dövlət siyasəti səviyyəsində həyata keçirəcək. Heç şübhə etmirəm ki, o, bu
statusda daha böyük sosial, humanitar layihələrə imza atacaq”.
Milli Məclisin
Ailə, qadın və uşaq məsələləri komitəsinin üzvü, millət vəkili Sahibə Qafarova da qəzetimizə açıqlamasında deyib ki, Azərbaycan
prezidentinin daxili siyasətində sosial siyasət, xüsusən də əhalinin sosial
müdafiəsinin gücləndirilməsi, aztəminatlı ailələrin sosial problemlərinin həlli
həmişə prioritet təşkil edib. Millət vəkili bildirib ki, Birinci
vitse-prezident Mehriban Əliyeva da dövlətin bu siyasətinin, humanist
missiyasının həyata vəsiqə almasında mühüm rol oynayacaq: "Mehriban xanım
Əliyeva Heydər Əliyev Fondunun prezidenti kimi ümummilli lider Heydər Əliyevin zəngin
irsinin öyrənilməsi, onun milli dövlətçilik ideyalarının yeni nəsillərə
aşılanması üçün mühüm işlər görüb. Eyni zamanda o, milli-mənəvi dəyərlərin
qorunması, dünyada Azərbaycan mədəniyyətinin geniş təbliğ olunması istiqamətində
də zəngin fəaliyyət ortaya qoyub. Mehriban xanım bütün fəaliyyəti boyu əhalinin
rifahının yüksəldilməsinə yönəldilmiş müxtəlif proqram və tədbirləri, elm, təhsil,
mədəniyyət, səhiyyə və idmanın inkişafını təmin edən layihələri dəstəkləməklə,
təmsil olunduğu cəmiyyətə yalnız fayda gətirib. O, uşaq və gənclərin sağlam,
milli-mənəvi dəyərlərə sadiq, hərtərəfli biliklərə malik vətəndaş kimi
yetişdirilməsi işinə də xidmət edib. Azərbaycanın beynəlxalq nüfuzunun
artırılması istiqamətində də Mehriban xanım danılmaz işlər görüb. Onun zəngin fəaliyyəti
həm Azərbaycanda, həm də onun hüdudlarından kənarda böyük rəğbətlə
qarşılanır.Bütün bunları nəzərə alsaq, qətiyyətlə deyə bilərik ki, Azərbaycanın
Birinci vitse-prezidenti kimi də Mehriban xanım Əliyeva daha böyük işlər görəcək,
o cümlədən sosial sahədə mühüm layihələr həyata keçirəcək, Azərbaycan naminə
daha böyük uğurlar əldə edəcək”.
Rufik
İSMAYILOV