Mehmanla bağlı qətnaməyə səs verənlər Azərbaycan haqqında məlumatsızdırlar
Azərbaycanın əməkdaşlıq etdiyi Avropa strukturları müxtəlif
zamanlarda ölkəmizə qarşı insan haqları, demokratiya adı altında təzyiqlər
göstərməyə cəhd edir. Lakin irəli sürülən ittihamların bir bəhanə olduğu açıq
şəkildə ortada olur. Çünki Avropa institutları öz daxilindəki problemləri
görməzlikdən gəlir. Necə ki, ötən ilin sonlarından başlayaraq Fransada baş
verənlər göz qabağındadır. "Sarı jiletlilər” hərəkatının yatırılması üçün
assimetrik güc tətbiq edən rəsmi Parisin hərəkətlərinə laqeyd qalan Avropa
Parlamentinin görünməmiş çevikliklə Mehman Hüseynovun məsələsini müzakirəyə
çıxarıb qətnamə qəbul etməsi kifayət qədər şübhələrə yol açır. Çünki Avropa
İttifaqı son bir neçə ildə bütün sahələrdə Azərbaycanla əməkdaşlıq etməyə can
atır. Hətta bu il Azərbaycanla Avropa İttifaqı arasında saziş imzalanacağı
gözlənilir. Belə bir vəziyyətdə Avropanın digər bir strukturu - Avropa
Parlamenti tərəfindən qətnamənin qəbul edilməsi burada maraqlı tərəflərin
olduğunu təsdiqləmiş olur.
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Elman Nəsirov bildirdi ki, biz
dəfələrlə Avropanın ayrı-ayrı strukturlarının Azərbaycan əleyhinə qərəzli
yanaşmalarının şahidi olmuşuq: "Böhtan, iftira, yalanla dolu mövqeləri müşahidə
etmişik. Bu baxımdan Avropa Parlamentinin Mehman Hüseynovla bağlı qəbul etdiyi
qətnamə də istisna təşkil etmir. Hələ 2015-ci ildə Azərbaycanla bağlı qərəzli
bir mövqe ortalığa qoyulmuşdu və ölkəmizi qondarma insan hüquqları
məsələlərində ittiham edib, eninə-uzununa demokratiyadan dəm vururdular. Amma
Avropa Parlamentinin yerləşdiyi Strasburqda, yəni Fransanın özündə son
hadisələr fonunda insan hüquqlarının necə kütləvi şəkildə pozulmasının şahidi
olduq. Təəssüflər olsun ki, Avropa Parlamenti, Avropa Şurası Parlament
Assambleyası heç bir halda bu məsələlərlə bağlı konkret mövqe ortaya qoymadı,
insan haqlarının keşiyində dayanmadı. Bu da onunla bağlıdır ki, onlar bizdəki müsbət
prosesləri, keçirilən islahatları və Azərbaycanın sabit, təhlükəsiz ölkə, eləcə
də müsəlman aləmində sabitlik adası olmasını həzm edə bilmirlər. Müxtəlif
qondarma ittihamlarla Azərbaycana təzyiq göstərib, Avropa ictimai fikrində ölkəmizin
mənfi obrazını formalaşdırmaq istəyirlər. Bu, onların dəfələrlə sınaqdan
çıxardığı üsullardır və Azərbaycan ictimaiyyəti bunları çox gözəl bilir. Bu, o
Avropa Parlamentidir ki, Ermənistanın keçmiş prezidenti Serj Sarkisyanın
keçirdiyi prezident, parlament seçkilərini obyektiv, ədalətli, şəffaf və
demokratik seçkilər kimi qiymətləndirmişdilər. Bəs, nə oldu Ermənistanda 50
faizdən artıq səs toplayan Sarkisyana məxsus Respublikaçılar Partiyası son
parlament seçkilərində niyə heç 5 faiz səs səs toplamadı? Demək ki, onların heç
bir sosial bazası yox imiş, xalq onlara etimad göstərmirmiş. Bəs onda niyə
Avropa Parlamenti həmin seçkiləri ədalətli, obyektiv seçki adlandırırdı? Yəni,
bütün bunlar onu göstərir ki, ikiüzlü siyasət var və həm də Avropa
Parlamentində müəyyən deputatlar var ki, onlar Ermənistan hakimiyyəti, erməni
lobbisi və diasporu ilə qaranlıq əlaqələr qururlar. Hesab edirəm ki, bu
məsələləri Avropanın hüquq-mühafizə orqanları araşdırmalıdır”.
AZAD
Belə görünür ki, anti-Azərbaycan dairələri müsəlman aləmində öz
abadlığı və azadlığı, rahatlığı və sabitliyi, dincliyi və tolerantlığı,
multikulturallığı ilə seçilən Azərbaycanı qarışdırmağa çalışırlar.
E.Nəsirovun sözlərinə görə, nədənsə Avropa Parlamenti hesabatlarında
və qətnamələrində Ermənistanın təcavüzü nəticəsində Azərbaycanda bir milyondan
çox insanın məcburi köçün və qaçqın düşməsi ilə bağlıfakta toxunmur: "Amma bir
nəfərlə bağlı böyük hay-küy kampaniyası aparır, Azərbaycan əleyhinə qətnamə
qəbul edir və ölkəmizə qarşı siyasi təzyiq mexanizmlərini işə salır.
Unutmasınlar ki, Azərbaycan ictimaiyyəti onların bu siyasi təzyiqlərinin
arxasında nələrin dayandığını çox gözəl bilir, onların əsl simasını çox yaxşı
dərk edir. Eyni zamanda biz onun fərqindəyik ki, belə təzyiqlərlə heç bir halda
Azərbaycanı tutduğu yoldan döndərmək olmaz. Cənab prezidentin qeyd etdiyi kimi,
bizim işimiz haqq işidir, taleyimiz öz əlimizdədir və öz yolumuzla gedirik. Heç
kim bizi bu yoldan döndərə bilməz. Azərbaycan müstəqil dövlətdir və
dövlətimizin başçısı da müstəqil daxili və xarici siyasət həyata keçirir. Heç
bir böyük dövlətin, beynəlxalq təşkilatın diktəsi altında deyil, Azərbaycan
xalqının milli mənafelərindən irəli gələn siyasət həyata keçirilir və bunun da
sayəsində xalq öz prezidentini dəstəkləyir. Lakin bəzi qüvvələr bundan
əndişələnir və Azərbaycana qarşı cürbəcür təzyiq üsullarını işə salır. Avropa
Parlamentinin son qətnaməsi də bu baxımdan qiymətləndirilməlidir. Təəssüflər
olsun ki, Azərbaycanda da Avropa Parlamenti və digər beynəlxalq dairələrin
əlində alət çevrilən sapı özümüzdən olan baltalar da var. Onlar da ciddi-cəhdlə
çalışırlar ki, Azərbaycanda ictimai-siyasi sabitliyi və asayişi pozsunlar.
Ancaq bu, mümkün olmayan məsələdir. Çünki Azərbaycan xalqının siyasi iradəsi
var və heç bir zaman regionun lideri olmuş bir dövlətini seçdiyi yoldan nə
xaricdə olan anti-Azərbaycan qüvvələr, nə də onların ölkəmizdə mövcud olan
"5-ci kalon”unun nümayəndələri döndərə bilməz.
Millət vəkili, politoloq
Rasim Musabəyov bildirdi ki, xaricdən Azərbaycana qarşı yönələn
hücumlara birinci dəfə deyil: "Artıq illərdir ki, bəzi dairələr, Avropa
Parlamenti və digər təşkilatlar tərəfindən ölkəmizə qarşı əsasız təzyiqlər
edilir, obyektiv olmayan münasibət göstərirlər. Azərbaycan qarşı qərəz nümayiş
etdirən qüvvələrin məqsədi ölkəmizi istədikləri kimi yönəltməkdir. Ölkəmizi
istəməyən qüvvələr Azərbaycana qarşı apardığı qarayaxma kampaniyaları zamanı
bir çox hallarda məsələnin mahiyyətinə varmadan, əsassız fikirlər irəli sürür,
addımlar atırlar. Avropa Parlamentində Mehman Hüseynovla bağlı qəbul edilən
qətnaməyə səs verənlər nəinki məhbus haqqında, ümumiyyətlə Azərbaycan haqqında
bixəbərdirlər. Onlardan bu haqda nə isə soruşsaq, heç bir məlumata malik
deyillər”.
R.Musabəyov vurğuladı ki, bəzi dairələrin istəyi Azərbaycanı
yürütdüyü müstəqil siyasətdən çəkindirib, istədiklərini etdirməkdir:
"Azərbaycan Prezidenti İlham Əliyev dəfələrlə bununla bağlı qəti mövqeyini
ortaya qoyaraq bunun mümkünsüz olduğunu bəyan edib. Azərbaycan öz xarici
siyasətini müstəqil şəkildə qurub və onu davam etdirməkdədir. Bu baxımdan,
Azərbaycana edilən təzyiqləri hər zaman olub, indi də var. Biz həmin qüvvələrə
qarşı hər zaman mübarizə aparmışıq və bu gün də bunu davam etdirməkdəyik”.AZAD