Məhəmməd peyğəmbərin mövludu münasibətilə tədbir keçirildi

Birlikdən verilən məlumata görə, tədbirdə ilk olaraq, "Qazi Qarabağ azanı” səsləndirilib. Sonra Milli Dirçəliş Günü münasibətilə müqəddəs vətən şəhidləri dualarla anılıb.

"Yeni Üfüq” Mənəvi İrsin Təbliği İctimai Birliyinin sədri Sevinc Əzimbəyli çıxış edərək bildirib ki, əsrlərdir müsəlman dünyası yaradılmışların ən əşrəflisi olan əziz İslam peyğəmbərinin mübarək doğum gününü vəhdət həftəsi olaraq qeyd edirlər: "Azərbaycan xalqı da yüz illərdir ki, peyğəmbərimizə, onun sevgili ev xalqına öz sevgi və ehtiramını göstərməkdədir. Ölkəmizdə birlik və bərabərliyimizin, dini mühitmizdə hökm sürən tolerant münasibətlərin mühafizə olunmasında peyğəmbər və onun əhli-beytinin mənəvi dərsləri danılmazdı. Qürurverici haldır ki, vətənimizdə mənəvi dəyərlərimizin həqiqi himayəçisi Azərbaycan dövlətidir”.

Təşkilat sədri söyləyib ki, vəhdət həftəsi günlərində dünya dini liderlərinin Bakıda Dünya dini liderlərinin II Sammiti bir daha ölkəmizin beynəlxalq arenada artan nüfuzunun möhkəmlənməsinə mübarək səbəb oldu.

Qeyd edək ki, tədbirdə şəhidlərimizin pak ruhuna müqəddəs "Qurani-Kərim”dən ayələr oxunub. Şəhidlərimizin əziz ruhuna ehsan süfrəsi təşkil olunub. Tədbirdə ölkənin bir qrup fəal xanımları iştirak edib.

Sonda təşkilatın sədri S.Əzimbəyli mübarək doğum həftəsi münasibətilə keçirdikləri tədbirlərə verdiyi xeyirsevər dəstəyə görə hər kəsə, o cümlədən "Cənnət ” MMC şirkətinə öz təşəkkürünü bildirib.