Media rəhbərlərinin 8 Martda çəkəcəkləri xərc
Dünyanın
bir çox ölkəsində qeyd olunan "Beynəlxalq Qadınlar Günü”nü nədənsə, bütün
kişilər birmənalı qarşılamır. Hətta bəziləri bunu ayrı-seçkilik kimi də
qiymətləndirir. Amma hər halda, həmin gün xanımlar üçün özəl bir gündür və ildə
bir dəfə də olsa, onların könlünü xoş etmək lazımdır. Əslində xanımlar üçün
alınan hədiyyənin qiyməti önəmli deyil. Onlar üçün əsas olan diqqətdir. Yəni
heç nə almasanız belə, sadəcə iki kəlmə sözlə və ya zənglə bir xanımı xoşbəxt
edə bilərsiniz. Bir filmimizdə deyildiyi kimi, "iş pulda deyil, iş "vinimatelni”
olmaqdadır”. Yəni iş bahalı hədiyyə almaqda deyil, iş qarşı tərəfi düşünüb,
onun könlünü xoş etməyə, sevindirməyə çalışmaqdadır.
Media
rəhbərlərindən 8 Martda kimlərə hədiyyə alacaqlarını, təxmini nə qədər xərclərinin
çıxacağını proqnozlaşdırdıqlarını və ən əsası redaksiyadakı xanımları necə
təbrik edəcəklərini soruşduq.
Modern.az saytının baş redaktoru Elşad
Eyvazlı deyir ki, təbrik edəcəyim xanımların sayı
20-dən çoxdur: "Təbrik ediləsi o qədər xanım var ki, təqribi nə qədər xərcin
çıxacağını demək çətindir. Hələ ki, kimə nə hədiyyə alacağımı dəqiqləşdirməmişəm.
Amma onu bilərəm ki, bizim kimi düşüncəli kişilər bu bayramdan borcla çıxacaq
(gülür). Redaksiyamızdakı xanımları isə bayramdan bir gün əvvəl masalarının
üzərinə gül qoymaqla təbrik edirik. Bu, artıq bizdə ənənə formasını almış bir
təbrikdir”.
Qhtxeber.az saytının baş redaktoru
Sənan Nəcəfovla söhbətimiz zamanı aydın oldu ki,
bayramda 300-400 manat arası xərci çıxacaq: "Birmənalı şəkildə, ilk olaraq anamı,
2 bacımı, yoldaşımı və qızımı təbrik edəcəyəm. Onlar mənim üçün çox əzizdirlər.
Maddi vəziyyətimin imkan verdiyi yerə qədər çalışacağam ki, ətrafımda olan
başqa xanımları da təbrik edim. Təbii ki, sözlə və zənglə təbrik edəcəyimiz
xanımlar da var. Xanım iş yoldaşlarımızı isə ənənəvi üsulla təbrik edəcəyik və
onlar ayın 7-si yarım iş günü çalışacaqlar”.
Azərbaycan Jurnalistlər Şəbəkəsi İctimai
Birliyinin sədri, "Eurasia Diary” analitik informasiya portalının baş redaktoru
Ayaz Mirzəyev hər bayram həyat yoldaşına
müxtəlif hədiyyələr aldığını və bu il də fərqli bir hədiyyə ilə onu təbrik
edəcəyini deyir: "Həyatda bəzi şeylər var ki, dəyərlidir və onlar dəyərli
olduqları üçün sevilir. Dəyərli olmaq və sevilmək bir-biri ilə əlaqəlidir. Xanımlar
həm dəyəri, həm də sevgini özlərində birləşdiriblər. Bir kişinin ilk tanış
olduğu qadın anasıdır. O anasına necə qayğı və sevgi ilə yanaşırsa, digər
qadınlara da o cür münasibət bəsləyir. Bu bayramda anamızı, xanımımızı,
bacımızı, qızımızı və ümumiyyətlə, bütün xanımları təbrik edirik. Amma elə
etməliyik ki, yalnız ildə bir dəfə yox, hər gün bayram olsun. Yəni onlar hər
gün şad olsunlar, sevinsinlər. Mən də öz növbəmdə hər il olduğu kimi, bu il də
xanımıma fərqli bir hədiyyə almağı düşünürəm. Amma təəssüf ki, bunun nə olduğunu
deyə bilmərəm. İstəyirəm bu, onun üçün sürpriz olsun. İş yoldaşlarımızı da müəyyən hədiyyə və
şirniyyatlarla təbrik edəcəyik”.
Xanım
işçilərinə "Bu şəhərdə”nin konsertinə bilet hədiyyə edənXeberle.com saytının baş
redaktoru Kamal Almuradlı bununla kifayətlənməyib, xanımlara güllə birlikdə
tort da hədiyyə edəcəyini deyir: "Həmçinin anama, bacılarıma, xanımıma, qızıma
da xüsusi bir hədiyyə almağı düşünmüşəm. Əslində bizim evdə xanım çoxdur. Belə
təxmin edirəm ki, təqribi 500 manata yaxın xərcim çıxacaq”.
Avtosfer.az
saytının baş redaktoru Elməddin Muradlı sualımıza zarafatla cavab verdi: "Bəzən 8 mart ərəfəsində zarafatla
xəstə olduğumu və ya hər hansısa bir işlə bağlı rayona gedəcəyimi deyirəm (gülür).
Uzun müddətdir ki, elə bizim redaksiyada da bu söhbət gedir. Kişi
əməkdaşlarımızla aramızda pul toplayıb xanımlara hədiyyə almağı düşünürük. Evdə də təbii ki, anama, xanımıma, bacıma, qayınanama
hədiyyə alacam. Təəssüf ki, qızım yoxdur. Qızım olsaydı, tək ona hədiyyə
alardım. Başqaları da inciməzdi. Amma indi birinə alıb, digərinə almayanda
yaxşı çıxmır. Yəni kiçik də olsa, bir hədiyyə ilə xanımların könlünü xoş
etməliyik. Mən kişiləri xanımlardan ayrı təsəvvür etmirəm”.
Elməddin bəyin bu bayrama yanaşması birmənalı
deyil. O deyir ki, belə bayramın olması yaxşıdır, amma digər tərəfdən də sanki
bu, kişilərə qarşı haqsızlıqdır: "Hədiyyə almaq yaxşıdır. Amma nədənsə, elə
həmişə kişilər xanımlara hədiyyə alır. Bu sanki biz kişilərə qarşı bir az
haqsızlıqdır. Sevgililər günündə də, 8 Martda
da, digər bayramlarda da hədiyyəni biz alırıq. Məncə, bəzi bayramlarda
xanımların da üzərinə müəyyən qədər məsuliyyət düşsəydi, paralellik yaranardı”.
Azxeber.com
saytının baş redaktoru Hacıbəy Heydərli deyir ki, istənilən bayram sevinclə və xoş ovqatla qarşılanmalıdır:
"Üstəlik, bu, xanımların bayramıdırsa, sevincimiz birə beş artır. Bizim
redaksiyada da xanım həmkarlarımız var və onlar həmin gün çalışmayacaqlar. Onların
yerinə kişilər işləyəcək. Hər il olduğu kimi, bu il də xanımlara gül hədiyyə
edəcəyik. Yəni həmişə çalışmışıq ki, balansı qoruyaq, bütün xanımlara eyni
dəyərdə hədiyyə alaq. Şəxsi olaraq isə əlbəttə də ki, mənim üçün bu həyatda
dəyərli olan anama, xanımıma və yenicə doğulmuş 1 aylıq qızıma kiçik bir
hədiyyə almağı düşünürəm”.
Günel Azadə